విపక్షాలు అధికారంలో ఉన్న పలు రాష్ట్రాలు ముస్లింలందరినీ ఓబీసీ జాబితాలో చేరుస్తున్నాయని, ఇది రిజర్వేషన్ల నిబంధనలను ఉల్లంఘించడమేనని బీజేపీ ఎంపీ కె. లక్ష్మణ్ సోమవారం రాజ్యసభలో ఆరోపించారు. దీనిపై నిరసన వ్యక్తం చేస్తూ ప్రతిపక్షాలు సభ నుండి వాకౌట్ చేశాయి.
Zero Hour లో లక్ష్మణ్ మాట్లాడుతూ.. మతం పేరుతో ఓబీసీ రిజర్వేషన్లు దుర్వినియోగం అవుతున్నాయని మండిపడ్డారు. తెలంగాణ, పశ్చిమ బెంగాల్, తమిళనాడు మరియు కేరళ వంటి రాష్ట్రాలు ముస్లింలందరినీ ఓబీసీ కోటాలో చేర్చాయని ఆయన పేర్కొన్నారు. మతం ఆధారంగా రిజర్వేషన్లు కల్పించడం రాజ్యాంగ విరుద్ధమని, దీనిపై సమగ్ర సమీక్ష జరగాలని ఆయన డిమాండ్ చేశారు. ముస్లింలందరికీ ఓబీసీ కోటాను వర్తింపజేయడాన్ని ప్రశ్నిస్తూ గతంలో ఆంధ్రప్రదేశ్, తమిళనాడు హైకోర్టులు ఇచ్చిన తీర్పులను కూడా ఆయన ఈ సందర్భంగా ప్రస్తావించారు.
ప్రతిపక్షాల వాకౌట్‌ను రాజ్యసభ పక్ష నేత జేపీ నడ్డా తీవ్రంగా విమర్శించారు. కాంగ్రెస్ నాయకత్వంలోని ఇండియా (INDIA) కూటమికి చర్చలపై ఆసక్తి లేదని, వారికి రాజ్యాంగం మరియు ప్రజాస్వామ్య విలువలపై గౌరవం లేదని ఆయన విమర్శించారు. ప్రతిపక్షాలు ముస్లింలను కేవలం ఓటు బ్యాంకుగా చూస్తూ Appeasement రాజకీయాలకు పాల్పడుతున్నాయని నడ్డా ఆరోపించారు.
గతంలో కూడా పశ్చిమ బెంగాల్‌లోని టీఎంసీ ప్రభుత్వం 2010-2012 మధ్య పలు ముస్లిం వర్గాలను ఓబీసీ జాబితాలో చేర్చడంపై బీజేపీ విమర్శలు గుప్పించింది. అలాగే కర్ణాటకలో ప్రభుత్వ కాంట్రాక్టుల్లో ముస్లింలకు 4% రిజర్వేషన్లు కల్పించడంపై కూడా కాంగ్రెస్ ప్రభుత్వాన్ని బీజేపీ లక్ష్యంగా చేసుకుంది.