ఇరాన్, ఇజ్రాయెల్ మరియు అమెరికా మధ్య జరుగుతున్న యుద్ధం కారణంగా మధ్యప్రాచ్యంలో తీవ్ర ఉద్రిక్తత నెలకొంది. ఈ యుద్ధం నేపథ్యంలో ఇరాన్ ‘స్ట్రెయిట్ ఆఫ్ హోర్ముజ్’ (హోర్ముజ్ జలసంధి)ని మూసివేసింది. దీనివల్ల ప్రపంచంలోని అనేక దేశాలపై ఇంధన కొరత ముప్పు పొంచి ఉంది. ఇరాన్ తన మిత్రదేశాల కోసం ఈ మార్గాన్ని పాక్షికంగా తెరిచినప్పటికీ, మునుపటిలా చమురు రవాణా సాధ్యం కావడం లేదు.
మరోవైపు, అమెరికా ఇరాన్‌తో కాల్పుల విరమణ కోసం ప్రయత్నిస్తున్నా ఫలితం లభించడం లేదు. ఈ క్రమంలో యుద్ధంలోకి హౌతీ రెబల్స్ ఎంట్రీ ఇచ్చారు. యెమెన్ రాజధాని సనా నుండి హౌతీలు ఇజ్రాయెల్‌పై భీకర క్షిపణి దాడులు చేశారు. ఇది కేవలం ఇజ్రాయెల్, అమెరికాలకే కాకుండా మొత్తం ప్రపంచానికే ఆందోళన కలిగిస్తోంది. ఇప్పటికే హోర్ముజ్ జలసంధి మూతపడగా, ఇప్పుడు బాబ్-అల్-మండేబ్ జలసంధి మరియు సూయజ్ కాలువను కూడా హౌతీలు మూసివేసే అవకాశం ఉంది. ఈ మూడు కీలక సముద్ర మార్గాలు ఒకేసారి మూతపడితే ప్రపంచవ్యాప్తంగా ఎగుమతులు, దిగుమతులు నిలిచిపోయి ఆర్థిక వ్యవస్థ కుప్పకూలుతుంది. దీనివల్ల ముఖ్యంగా యూరోపియన్ దేశాలు తీవ్రంగా నష్టపోయే ప్రమాదం ఉంది.
భారతదేశానికి కూడా దీనివల్ల ఇబ్బందులు తప్పవు. కొన్ని రోజుల క్రితమే యుద్ధంలోకి వస్తామని హౌతీలు సంకేతాలిచ్చారు, ఇప్పుడు నేరుగా క్షిపణి దాడులతో రంగంలోకి దిగడంతో ప్రపంచ దేశాల్లో ఆందోళన పెరిగింది.