మార్చి 31 ఉదయం, అమెరికా అధ్యక్షుడు డొనాల్డ్ ట్రంప్ తన సోషల్ మీడియా ప్లాట్‌ఫారమ్ ‘ట్రూత్ సోషల్’లో ఇలా రాశారు: “ఎవరికైనా ఇంధనం కావాలంటే మా దగ్గరకు రండి – మా వద్ద పుష్కలంగా ఉంది. అలాగే, ఇరాన్ ముగింపులో మాకు సహకరించని దేశాలు, ఇకపై మీ కోసం మీరు పోరాడటం నేర్చుకోవాలి. మీరు మాకు అండగా లేనప్పుడు, అమెరికా మీ కోసం అక్కడ నిలబడదు. కఠినమైన పని పూర్తయింది. వెళ్లి మీ చమురును మీరే తెచ్చుకోండి!”
ట్రంప్ మాటల్లో స్పష్టమైన మార్పు కనిపిస్తోంది. అంతకుముందు హోర్ముజ్ జలసంధి (Strait of Hormuz) పై అమెరికా పట్టు సాధించాలని భావించిన ఆయన, యుద్ధం మొదలైన నెల రోజుల్లోనే ఈ వివాదం నుండి తప్పుకుంటున్నట్లు సంకేతాలిచ్చి ప్రపంచాన్ని ఆశ్చర్యపరిచారు. ఈ ఆకస్మిక నిర్ణయం వెనుక 57 ఏళ్ల జనరల్ డానియల్ కేన్ (Dan Kane) ఇచ్చిన ‘మాస్టర్‌క్లాస్’ ప్రెజెంటేషన్ ఉంది.
మార్చి 16, వైట్ హౌస్ – ఓవల్ ఆఫీస్ సమావేశం
ఒక ఉన్నత స్థాయి సమావేశంలో ట్రంప్, రక్షణ మంత్రి పీట్ హెగ్సెత్ మరియు భద్రతా సలహాదారు జనరల్ డానియల్ కేన్ పాల్గొన్నారు. అమెరికా నౌకాదళం ఇంత బలంగా ఉన్నప్పటికీ, ఇరాన్ హోర్ముజ్ మార్గాన్ని ఎలా బ్లాక్ చేయగలిగింది? అని ట్రంప్ ఆగ్రహం వ్యక్తం చేశారు. “మనం అక్కడ పూర్తి సైనిక శక్తిని ఎందుకు ప్రయోగించడం లేదు?” అని కేన్‌ను ప్రశ్నించారు.
జాయింట్ చీఫ్స్ ఆఫ్ స్టాఫ్ ఛైర్మన్ డానియల్ కేన్ చాలా శాంతంగా వాస్తవాలను వివరించారు. న్యూయార్క్ టైమ్స్ నివేదిక ప్రకారం.. హోర్ముజ్ వంటి ఇరుకైన జలసంధిలో భారీ యుద్ధనౌకలను ప్రయోగించడం ఆత్మహత్యతో సమానమని కేన్ వాదించారు. ఇరాన్ అక్కడ తన రెగ్యులర్ నౌకాదళం కంటే IRGCకి చెందిన చిన్న, వేగవంతమైన ‘సూసైడ్ బోట్లు’ మరియు రిమోట్ కంట్రోల్ డ్రోన్లను మోహరించిందని, అవి అమెరికాకు చెందిన బిలియన్ డాలర్ల యుద్ధనౌకలను క్షణాల్లో ధ్వంసం చేయగలవని వివరించారు.
జనరల్ కేన్ వివరించిన అసలు విషయం
హోర్ముజ్ మార్గం చాలా ఇరుకైనది, అక్కడ పెద్ద నౌకలు సులభంగా లక్ష్యంగా మారుతాయి. అంటే ఆ వలయంలోకి వెళ్లడం సులభం కానీ, సురక్షితంగా బయటకు రావడం చాలా కష్టం మరియు ఖర్చుతో కూడుకున్న పని. చివరిగా కేన్ చెప్పిన మాట ట్రంప్‌పై బాగా పనిచేసింది: “హోర్ముజ్ బ్లాక్ అవ్వడం వల్ల అమెరికాకు వచ్చే నష్టం తక్కువ, ఎందుకంటే మనం చమురు కోసం ఈ మార్గంపై ఆధారపడటం లేదు. దీనివల్ల చైనా, జపాన్ వంటి దేశాలకే ఇబ్బంది. మనకు ‘అమెరికా ఫస్ట్’ ముఖ్యం, ఇతరుల కోసం మనం ఎందుకు రిస్క్ తీసుకోవాలి?”
ట్రంప్ నిర్ణయం
జనరల్ కేన్ వాదనలతో ఏకీభవించిన ట్రంప్, హోర్ముజ్ మార్గంతో అమెరికాకు సంబంధం లేదని ప్రకటించారు. ఈ మార్గం ద్వారా చమురు కావాలనుకునే దేశాలు తమ ఏర్పాటు తామే చేసుకోవాలని కఠినంగా చెప్పారు. ఇప్పుడు అమెరికా నేరుగా యుద్ధం చేయకుండా, కేవలం దూరం నుండి ఇరాన్ క్షిపణి కేంద్రాలను మాత్రమే లక్ష్యంగా చేసుకునే అవకాశం ఉంది.
ఎవరు ఈ జనరల్ డానియల్ కేన్?
ప్రపంచంలోనే అత్యంత శక్తివంతమైన వ్యక్తిని తన మాటలతో ప్రభావితం చేసిన జనరల్ డానియల్ కేన్ (AKA “రైజిన్ కేన్”), అమెరికా 22వ జాయింట్ చీఫ్స్ ఆఫ్ స్టాఫ్. 2,800 గంటల పైగా విమాన ప్రయాణ అనుభవం ఉన్న ఆయన, ఇరాక్ యుద్ధంలో పాల్గొన్న అనుభవజ్ఞుడు. F-16 యుద్ధ విమానాల్లో ప్రావీణ్యం ఉన్నందున ఆయన్ను రక్షణ రంగంలో “రైజిన్ కేన్” అని పిలుస్తారు. గతంలో ఆయన CIA లో మిలిటరీ అఫైర్స్ అసోసియేట్ డైరెక్టర్‌గా కూడా పనిచేశారు. ఇరాన్‌తో సుదీర్ఘ యుద్ధం అమెరికాకు ఆర్థికంగా భారమని ఆయన మొదటి నుండీ హెచ్చరిస్తూనే ఉన్నారు.