ఓటర్ల జాబితా ప్రత్యేక సవరణ (SIR) అంశంపై బెంగాల్ కాంగ్రెస్ సీనియర్ నేత అధీర్ రంజన్ చౌదరి స్పందిస్తూ.. “ఇది ఎన్నికల సంఘం మరియు మమతా బెనర్జీ ప్రభుత్వం కలిసి ప్రజాస్వామ్యాన్ని అపహాస్యం చేయడం. ప్రతి అసలైన ఓటరుకు ఓటు వేసే అవకాశం కల్పించే వరకు అవసరమైతే ఎన్నికలను వాయిదా వేయాలి” అని డిమాండ్ చేశారు.
ఐదుసార్లు ఎంపీగా పనిచేసిన 70 ఏళ్ల అధీర్ చౌదరి, మూడు దశాబ్దాల తర్వాత తన సొంత గడ్డ అయిన బహరంపూర్ అసెంబ్లీ నియోజకవర్గం నుండి పోటీ చేస్తున్నారు. ఈ సందర్భంగా ఆయన పంచుకున్న కొన్ని కీలక విషయాలు:
ఓటర్ల జాబితా వివాదం (SIR row): నిష్పక్షపాతమైన ఓటర్ల జాబితా లేనిదే స్వేచ్ఛాయుత ఎన్నికలు జరగవని ఆయన అన్నారు. ఓటర్ల పేర్లు తొలగించబడటం వారి తప్పు కాదని, దీనికి ఎన్నికల సంఘం మరియు రాష్ట్ర ప్రభుత్వమే బాధ్యత వహించాలని పేర్కొన్నారు. పేద ప్రజలు ట్రిబ్యునళ్ల చుట్టూ తిరుగుతూ లాయర్లను పెట్టుకోలేరని, ఇది ప్రజాస్వామ్యానికి మాయని మచ్చని విమర్శించారు.
30 ఏళ్ల తర్వాత అసెంబ్లీ పోటీ ఎందుకు? 1991లో తన మొదటి ఎన్నికల అనుభవాన్ని ఆయన గుర్తు చేసుకున్నారు. అప్పట్లో సీపీఎం కార్యకర్తలు తనపై కాల్పులు జరిపారని, ఆత్మరక్షణ కోసం తాను కూడా ఎదురు కాల్పులు జరపాల్సి వచ్చిందని చెప్పారు. ఆ తర్వాత 2024 లోక్‌సభ ఎన్నికల్లో టీఎంసీ కుట్ర వల్ల ఓడిపోయానని, ప్రస్తుతం పార్టీ బలహీనంగా ఉన్న తరుణంలో పార్టీ ఆదేశాల మేరకు మళ్లీ అసెంబ్లీ బరిలోకి దిగుతున్నానని తెలిపారు.
ముస్లిం ఓట్ల ప్రభావం: బెంగాల్‌లోని ముస్లింలు మమతా బెనర్జీ ప్రభుత్వంపై విరక్తితో ఉన్నారని అధీర్ అభిప్రాయపడ్డారు. “ముస్లింలు ఎప్పుడూ వ్యూహాత్మకంగా ఓటు వేస్తారు. ఓట్లు చీలిపోతే బీజేపీ గెలుస్తుందన్న భయం ఉంటే వారు మమతకు ఓటు వేస్తారు. కానీ, కాంగ్రెస్ గెలిచే అవకాశం ఉన్న చోట మాకే మద్దతు ఇస్తారు. వారి ఓటు ‘విన్నబిలిటీ ఇండెక్స్’ (గెలుపు అవకాశాలు)పై ఆధారపడి ఉంటుంది” అని విశ్లేషించారు. ముర్షిదాబాద్‌లోని ముస్లింలకు రాహుల్ గాంధీపై అమితమైన నమ్మకం ఉందని ఆయన చెప్పుకొచ్చారు.