టెహ్రాన్: కూల్చివేతకు గురైన అమెరికా విమానం నుండి తప్పించుకున్న పైలట్‌ను తమ దళాలు సురక్షితంగా రక్షించాయని అమెరికా అధ్యక్షుడు డొనాల్డ్ ట్రంప్ చేసిన ప్రకటనపై ఇరాన్ తీవ్రంగా స్పందించింది. ట్రంప్ చెబుతున్నవన్నీ అవాస్తవాలని, అమెరికా చేపట్టిన రెస్క్యూ ఆపరేషన్ పూర్తిగా విఫలమైందని ఇరాన్ స్పష్టం చేసింది.
అమెరికా విమానాలపై దాడి: దక్షిణ ఇస్ఫాహాన్ ప్రాంతంలోని ఒక పాత విమానాశ్రయం వద్ద అమెరికా దళాలు పైలట్‌ను రక్షించేందుకు ప్రయత్నించాయని, అయితే ఆ ప్రయత్నాన్ని తమ సైన్యం తిప్పికొట్టిందని ఇరాన్ సైనిక ప్రతినిధి ఇబ్రహీం సోల్ఫగారి తెలిపారు. ఈ ఆపరేషన్ సమయంలో అమెరికాకు చెందిన రెండు సి-130 (C-130) రవాణా విమానాలు మరియు రెండు బ్లాక్ హాక్ హెలికాప్టర్లను తాము ధ్వంసం చేశామని ఇరాన్ ప్రకటించింది. దీనికి ఆధారంగా ఎడారిలో చెల్లాచెదురుగా పడి ఉన్న విమాన శకలాల వీడియోలను కూడా ఇరాన్ ప్రభుత్వ మీడియా విడుదల చేసింది.
ఐదుగురి మృతి: ఈ రెస్క్యూ ఆపరేషన్ సమయంలో జరిగిన దాడుల్లో ఇరాన్ నైరుతి ప్రాంతంలో ఐదుగురు మరణించారు. అయితే మరణించిన వారు సామాన్య పౌరులా లేక సైనికులా అనే విషయంపై ఇంకా స్పష్టత రాలేదు.
పైలట్ ఎక్కడ? అమెరికా వైపు నుండి వస్తున్న సమాచారం ప్రకారం.. పైలట్‌ను రక్షించామని, ఆయన క్షేమంగా ఉన్నారని చెబుతున్నారు. కానీ ఇరాన్ మాత్రం అమెరికా ప్రయత్నం విఫలమైందని, విమానాలను కూల్చేశామని చెబుతోంది. గత శుక్రవారం నుండి ఆ అమెరికా పైలట్‌ను వెతికి పట్టుకున్న వారికి భారీ బహుమతి ఇస్తామని ఇరాన్ ప్రభుత్వం ప్రకటించింది. దీంతో స్థానిక ప్రజలు తుపాకులు, జెండాలతో పైలట్ కోసం గాలిస్తున్న దృశ్యాలు కూడా వెలుగులోకి వచ్చాయి.
ప్రస్తుతానికి ఆ పైలట్ అమెరికా దళాల చెంత ఉన్నాడా లేక ఇరాన్ దళాలకు దొరికాడా అనే విషయంపై సస్పెన్స్ కొనసాగుతోంది. ఒకవేళ పైలట్ ఇరాన్ వద్ద ఉంటే, అతడిని బందీగా ఉంచుకోవడమే ఆ పైలట్‌కు రక్షణ అని ఇరాన్ అధికారులు వ్యాఖ్యానించడం గమనార్హం.