అమెరికా అధ్యక్షుడు డోనాల్డ్ ట్రంప్ ఇరాన్‌కు చివరి హెచ్చరిక జారీ చేశారు. మంగళవారం రాత్రి (అమెరికా కాలమానం ప్రకారం) లోపు ఇరాన్ శాంతి ఒప్పందానికి అంగీకరించకపోతే, కేవలం నాలుగు గంటల వ్యవధిలో ఆ దేశాన్ని పూర్తిగా నాశనం చేస్తామని ఆయన హెచ్చరించారు.
వైట్ హౌస్ ప్రెస్ కాన్ఫరెన్స్‌లో రక్షణ మంత్రి పీట్ హెగ్‌సెత్‌తో కలిసి మాట్లాడిన ట్రంప్, ఇరాన్ మౌలిక సదుపాయాలపై భీకర దాడులు చేస్తామని స్పష్టం చేశారు. విద్యుత్ కేంద్రాలు, వంతెనలపై దాడులు చేయడం యుద్ధ నేరాల కిందకు వస్తుందా అన్న ప్రశ్నకు ఆయన “ఖచ్చితంగా రాదు” అని సమాధానమిచ్చారు.
ట్రంప్ హెచ్చరికలోని ప్రధానాంశాలు:
- వంతెనలు, పవర్ ప్లాంట్ల ధ్వంసం: “మా వద్ద పక్కా ప్రణాళిక ఉంది. మంగళవారం అర్థరాత్రి 12 గంటల లోపు ఇరాన్‌లోని ప్రతి వంతెనను కూల్చివేస్తాం. ప్రతి పవర్ ప్లాంట్‌ను పేల్చివేస్తాం. అవి మళ్ళీ ఎప్పటికీ వాడకంలోకి రాకుండా తగలబెట్టేస్తాం. మేము అనుకుంటే ఇది కేవలం 4 గంటల్లోనే జరిగిపోతుంది” అని ట్రంప్ ప్రకటించారు.
- గడువు (Deadline): మంగళవారం రాత్రి 8 గంటల (Eastern Time) లోపు అమెరికాతో ఒప్పందం కుదుర్చుకోవాలని, చమురు రవాణాకు అత్యంత కీలకమైన ‘హార్ముజ్ జలసంధి’ (Strait of Hormuz) ని వెంటనే తెరవాలని ఆయన ఆదేశించారు.
- యుద్ధం లేదా పునర్నిర్మాణం: ఒకవేళ ఇరాన్ ఒప్పందానికి అంగీకరిస్తే, ఆ దేశ పునర్నిర్మాణానికి అమెరికా సహాయం చేస్తుందని కూడా ట్రంప్ ఆఫర్ ఇచ్చారు.
ఇరాన్ మొండి వైఖరి: అమెరికా ప్రతిపాదించిన 45 రోజుల తాత్కాలిక యుద్ధ విరమణను ఇరాన్ తిరస్కరించింది. తమకు తాత్కాలిక విరమణ వద్దు, యుద్ధానికి శాశ్వత ముగింపు కావాలని ఇరాన్ డిమాండ్ చేస్తోంది.
రక్షణ మంత్రి ఘాటు వ్యాఖ్యలు: అమెరికా యుద్ధ కార్యదర్శి (రక్షణ మంత్రి) పీట్ హెగ్‌సెత్ మాట్లాడుతూ.. “ఈ రోజు కంటే రేపు జరిగే దాడులు చాలా తీవ్రంగా ఉంటాయి. ఇరాన్ ఆలోచించి నిర్ణయం తీసుకోవాలి. మా అధ్యక్షుడు తీసుకునే నిర్ణయాలు ఎంత కఠినంగా ఉంటాయో మీరు సులేమానీని అడిగినా తెలుస్తుంది, ఖమేనీని అడిగినా తెలుస్తుంది” అని హెచ్చరించారు.