మహారాజ్‌గంజ్ (ఉత్తరప్రదేశ్): బంధుత్వాలకు వెలకట్టలేని భారతీ సమాజంలో, కామంతో కళ్ళు మూసుకుపోయిన ఓ కిరాతకుడు మరదిలపై లైంగిక దాడికి ఒడిగట్టాడు. అయితే, తన కొడుకు చేసిన పాపాన్ని చూసి ఆ తల్లి మౌనంగా ఉండలేదు. కన్నప్రేమ కంటే బాధితురాలికి న్యాయం చేయడమే మిన్న అని భావించిన ఆమె, స్వయంగా తన కుమారుడిపైనే పోలీసులకు ఫిర్యాదు చేసి సమాజానికి ఆదర్శంగా నిలిచింది. ఈ సంచలన ఘటన ఉత్తరప్రదేశ్‌లోని మహారాజ్‌గంజ్ జిల్లా భితౌలీ పోలీస్ స్టేషన్ పరిధిలో వెలుగుచూసింది.
అనాథగా వచ్చిన మేనకోడలిపై అఘాయిత్యం
పోలీసులు తెలిపిన వివరాల ప్రకారం.. బాధితురాలు చిన్నతనంలోనే తల్లిని కోల్పోయింది. తండ్రికి దురలవాట్లు ఉండటంతో, ఆమె మేనత్త (ఫిర్యాదుదారు) ఆ అమ్మాయిని అక్కున చేర్చుకుంది. సొంత కూతురిలాగే చిన్నప్పటి నుండి సాకుతూ పెంచి పెద్ద చేసింది. అయితే, అదే ఇంట్లో ఉంటున్న మేనత్త కుమారుడు (నిందితుడు), ఆ యువతిని లోబర్చుకున్నాడు. పెళ్లి చేసుకుంటానని నమ్మించో లేదా మరే ఇతర మాయమాటలు చెప్పి ఆమెపై నిరంతరం లైంగిక దాడికి పాల్పడ్డాడు.
గర్భవతి కావడంతో బయటపడ్డ బండారం
ఇంతకాలం నిశ్శబ్దంగా సాగిన ఈ అన్యాయం, బాధితురాలు గర్భవతి కావడంతో బయటపడింది. భయంతో వణికిపోయిన ఆ యువతి జరిగిన విషయాన్ని తన మేనత్తకు వివరించింది. తన కొడుకు ఇంతటి నీచానికి ఒడిగట్టాడని తెలిసి ఆ తల్లి దిగ్భ్రాంతికి గురైంది. వెనుకాముందు ఆలోచించకుండా వెంటనే పోలీస్ స్టేషన్‌కు వెళ్లి తన కొడుకుపైనే రేప్ కేసు పెట్టింది.
పోలీసుల చర్యలు:
- బాధితురాలి మేనత్త ఇచ్చిన ఫిర్యాదు మేరకు నిందితుడిపై కేసు నమోదు చేసినట్లు పోలీసులు తెలిపారు.
- విషయం బయటకు పొక్కడంతో నిందితుడు పరారీలో ఉన్నాడు.
- నిందితుడి కోసం గాలింపు చర్యలు ముమ్మరం చేశామని, త్వరలోనే అరెస్ట్ చేస్తామని భితౌలీ పోలీసులు వెల్లడించారు.