లక్నో: అంగరంగ వైభవంగా సాగాల్సిన పెళ్లిళ్ల సందడికి గ్యాస్ కొరత సెగ తగులుతోంది. ఏప్రిల్ 14 నుంచి ఉత్తరప్రదేశ్‌లో వివాహాల సీజన్ ఊపందుకోనుండగా, గత 40 రోజులకు పైగా కొనసాగుతున్న ఎల్‌పీజీ (LPG) సంక్షేమం వేలాది కుటుంబాలను, క్యాటరర్లను బెంబేలెత్తిస్తోంది. లక్నో నగరవ్యాప్తంగా ఏప్రిల్, మే నెలల్లో సుమారు 15,000 పెళ్లిళ్లు జరగాల్సి ఉండగా.. వంట గ్యాస్ దొరక్క విందు భోజనాల తయారీ ఇప్పుడు పెను సవాలుగా మారింది.
శుభలేఖ ఉంది.. కానీ సిలిండర్ లేదు!
నగరంలోని దాదాపు 1,200 మ్యారేజ్ గార్డెన్లు, హోటళ్లు ఇప్పటికే ఫుల్ బుక్ అయ్యాయి. కానీ, వేలాది మంది అతిథులకు వంటలు వండటానికి కావాల్సిన కమర్షియల్ సిలిండర్ల కోసం యజమానులు అల్లాడిపోతున్నారు.
- “గతంలో సిలిండర్ల కోసం డీలర్లు మా చుట్టూ తిరిగేవారు, ఇప్పుడు మేము వారి వెంట పడుతున్నాం” అని హార్దోయ్ రోడ్డులోని ఒక మ్యారేజ్ హాల్ యజమాని ఆవేదన వ్యక్తం చేశారు.
- మెనూలో కోతలు: గ్యాస్ ఎక్కువగా ఖర్చయ్యే వంటకాలను మెనూ నుంచి తొలగిస్తున్నారు. చుట్టుపక్కల వారు, బంధువుల సాయంతో ఇంటి సిలిండర్లను సేకరించి పెళ్లిళ్లు జరిపించుకోవాల్సిన దుస్థితి నెలకొంది.
తిరిగి పాత కాలానికి.. బొగ్గు, కట్టెల పొయ్యిలే దిక్కు!
యూపీ టెంట్ అండ్ క్యాటరర్స్ అసోసియేషన్ ప్రకారం.. 250 మందికి వంట చేయాలంటే కనీసం 8 సిలిండర్లు కావాలి. కానీ ఇప్పుడు 4 సిలిండర్లతోనే నెట్టుకొస్తున్నారు. గ్యాస్ లేని చోట బొగ్గు, పిడకలు, కట్టెలు, కిరోసిన్, చివరికి డీజిల్ కూడా ఇంధనంగా వాడుతున్నారు. ఇది వంట తయారీ ఖర్చును పెంచడమే కాకుండా, పాతకాలపు పద్ధతుల్లో వండాల్సి రావడంతో క్యాటరర్లకు పనిభారం పెరుగుతోంది.
బ్లాక్ మార్కెట్ ‘దందా’.. ఒక్కో సిలిండర్ ₹2,700!
గ్యాస్ కొరతను కొందరు అక్రమార్కులు సొమ్ము చేసుకుంటున్నారు. కమర్షియల్ సిలిండర్లు దొరక్కపోవడంతో చాలా మంది డొమెస్టిక్ (ఇంటి) సిలిండర్లను బ్లాక్‌లో కొంటున్నారు. గతంలో ₹1,300 ఉన్న బ్లాక్ రేటు ఇప్పుడు అమాంతం పెరిగింది. ఒక బాధితుడు తెలిపిన వివరాల ప్రకారం.. అతి కష్టం మీద రెండు సిలిండర్లను ఏకంగా ₹5,500 వెచ్చించి బ్లాక్‌లో కొనుగోలు చేశారు.