దుబాయ్/టెల్ అవీవ్: పశ్చిమ ఆసియాలో శాంతి చిగురిస్తుందని ఆశించిన తరుణంలో మళ్ళీ యుద్ధ మేఘాలు కమ్ముకున్నాయి. అమెరికా-ఇరాన్ మధ్య రెండు వారాల కాల్పుల విరమణ (Ceasefire) కుదిరినట్లు ప్రకటన వెలువడిన కొద్ది గంటల్లోనే, ఇజ్రాయెల్ మరియు యునైటెడ్ అరబ్ ఎమిరేట్స్ (UAE) లో క్షిపణి హెచ్చరిక సైరన్లు మోగడం ప్రపంచాన్ని ఉలిక్కిపడేలా చేసింది. బుధవారం తెల్లవారుజామున చోటుచేసుకున్న ఈ పరిణామం, తాజా శాంతి ఒప్పందం అమలుపై నీలినీడలు కమ్మిస్తోంది.
సైరన్ల మోత.. ఏం జరుగుతోంది?
ఒకవైపు అమెరికా సంధి ప్రకటించగా, మరోవైపు ఇజ్రాయెల్, యూఏఈలలో క్షిపణి దాడుల హెచ్చరిక సైరన్లు హోరెత్తాయి. అయితే ఈ దాడులు ఎక్కడి నుంచి జరిగాయి? లక్ష్యం ఏంటి? అనే అంశాలపై ఇంకా స్పష్టత రావాల్సి ఉంది. యుద్ధం మొదలైనప్పటి నుండి ఈ రెండు దేశాలు క్షిపణి మరియు డ్రోన్ దాడులకు ప్రధాన కేంద్రంగా మారాయి, అందుకే తాజా హెచ్చరికలను రక్షణ విభాగాలు అత్యంత తీవ్రంగా పరిగణిస్తున్నాయి.
సంధి కుదిరినా.. ఇరాన్ కమాండర్లదే నిర్ణయమా?
యుద్ధ విరమణ ప్రకటించినా క్షిపణులు దూసుకురావడంపై రాజకీయ విశ్లేషకులు పలు అనుమానాలు వ్యక్తం చేస్తున్నారు. ఇరాన్‌కు చెందిన ఇస్లామిక్ రివల్యూషనరీ గార్డ్ కార్ప్స్ (IRGC) లోని స్థానిక కమాండర్లు కొన్నిసార్లు రాజకీయ నాయకత్వంతో సంబంధం లేకుండా స్వతంత్రంగా నిర్ణయాలు తీసుకుంటారని సమాచారం. కాల్పుల విరమణను క్షేత్రస్థాయిలోని అన్ని సైనిక విభాగాలు పాటిస్తున్నాయా? లేదా? అన్నది ఇప్పుడు పెద్ద ప్రశ్నగా మారింది.
అమెరికా దూకుడుకు బ్రేక్.. కానీ రక్షణ మాత్రం పక్కా!
ఏపీ (AP) నివేదిక ప్రకారం.. పశ్చిమ ఆసియాలో మోహరించిన అమెరికా దళాలు ఇరాన్‌పై దాడులను ప్రస్తుతానికి నిలిపివేసినట్లు ప్రకటించాయి. అయితే, తన రక్షణ వ్యవస్థలను మాత్రం హైఅలెర్ట్‌లో ఉంచినట్లు స్పష్టం చేసింది. శత్రువుల నుండి వచ్చే ఎలాంటి దాడులనైనా సమర్థవంతంగా తిప్పికొడతామని అమెరికా సైన్యం పేర్కొంది.