టెక్ డెస్క్: గూగుల్ పే (Google Pay) వినియోగదారులారా.. మీరు యాప్‌ను అప్‌డేట్ చేశారా? అయితే ‘People’ సెక్షన్‌లో మొదటి ఐకాన్ కింద ‘Pocket Money’ అనే సరికొత్త ఆప్షన్ మీకు కనిపిస్తూ ఉండొచ్చు. అయితే ఈ ఫీచర్‌పై ప్రస్తుతం సోషల్ మీడియాలో ఒక భయంకరమైన ఆడియో క్లిప్ వైరల్ అవుతోంది. ఆ ఐకాన్‌ను క్లిక్ చేస్తే మీ బ్యాంకు ఖాతాలోని డబ్బు మొత్తం దొంగిలించబడుతుందని, ఇది ఒక పెద్ద స్కామ్ అని అందులో హెచ్చరిస్తున్నారు.
నిజంగానే ఇది మోసమా? లేక గూగుల్ పే తీసుకొచ్చిన కొత్త సౌకర్యమా? దీనిపై మా ‘ఫ్యాక్ట్ చెక్’ రిపోర్ట్ ఇక్కడ ఉంది.
ఏమిటీ ‘పాకెట్ మనీ’ ఫీచర్?
మనం స్కూలుకో, కాలేజీకో వెళ్లేటప్పుడు అమ్మానాన్నలు మన చేతికి కొంత చిల్లర డబ్బులు ఇచ్చేవారు. ఈ డిజిటల్ యుగంలో ఆ కాన్సెప్ట్‌నే గూగుల్ పే ఆన్‌లైన్‌లోకి తెచ్చింది.
- ఎవరి కోసం?: తమ పిల్లలకు లేదా కుటుంబ సభ్యులకు నెలవారీ ఖర్చుల కోసం డబ్బులు పంపాలనుకునే వారికి ఇది ఒక ‘వాలెట్’ లాంటిది.
- ఎలా పనిచేస్తుంది?: ఉదాహరణకు, మీరు మీ కూతురికి నెలకు రూ. 5,000 పాకెట్ మనీగా సెట్ చేశారనుకోండి. ఆమె తన ఫోన్ ద్వారా జరిపే లావాదేవీలకు ఆ రూ. 5,000 వరకు మీ బ్యాంకు ఖాతా నుండే డబ్బులు కట్ అవుతాయి.
నియంత్రణ మీ చేతుల్లోనే!
ఖాతా ఖాళీ అయిపోతుందనే భయం అక్కర్లేదు. ఎందుకంటే గూగుల్ ఇందులో రెండు రకాల ఆప్షన్లు ఇచ్చింది:
- లిమిట్ సెట్ చేయడం: ఒక నిర్దిష్ట మొత్తాన్ని (ఉదాహరణకు రూ. 2,000) పాకెట్ మనీగా కేటాయించవచ్చు.
- ప్రతి పేమెంట్ అప్రూవల్ (Approve Every Payment): మీ పిల్లలు ఎక్కడైనా పేమెంట్ చేస్తున్నప్పుడు, ప్రతిసారీ మీ ఫోన్‌కు నోటిఫికేషన్ వస్తుంది. మీరు ‘ఓకే’ అంటేనే మీ అకౌంట్ నుండి డబ్బు కట్ అవుతుంది.
ముఖ్యమైన నిబంధనలు:
- మీరు ఎవరికైనా పాకెట్ మనీ సెట్ చేయాలంటే, మొదట వారికి ‘ఇన్వైట్’ పంపాలి. వారు దానిని ‘యాక్సెప్ట్’ చేస్తేనే మీ అకౌంట్ లింక్ అవుతుంది.
- ఒక వ్యక్తి గరిష్టంగా ఐదుగురికి మాత్రమే పాకెట్ మనీ సెట్ చేయగలరు.
- ఎవరికి సెట్ చేస్తున్నారో వారి నంబర్ మీ ఫోన్‌లో సేవ్ అయి ఉండాలి. వారు కూడా గూగుల్ పే వినియోగదారులై ఉండాలి.
- ఆ పాకెట్ మనీతో వారు ఎక్కడెక్కడ ఖర్చు చేస్తున్నారో మీరు మీ ఫోన్ నుండే ట్రాక్ చేయవచ్చు.