తిరునల్వేలి: మద్యం మత్తు మనిషిని మృగంగా మార్చింది. నమ్మిన స్నేహితుడని కూడా చూడకుండా కేవలం అప్పుగా తీసుకున్న ఏడు వేల రూపాయల కోసం ఓ యువకుడిని కిరాతకంగా హతమార్చిన ఘటన నెల్లై (తిరునల్వేలి) ప్రాంతంలో కలకలం రేపింది.
అసలేం జరిగింది?
నెల్లై పెరుమాళ్‌పురానికి చెందిన జోసెఫ్ రాజా (30), తాళైయూత్తు సమీపంలోని బండారకుళంకు చెందిన మాడసామి (31) ప్రాణ స్నేహితులు. ఇద్దరూ కలిసి భవన నిర్మాణ కార్మికులుగా పని చేసేవారు. అయితే, గతంలో జోసెఫ్ రాజా తన స్నేహితుడు మాడసామి వద్ద రూ. 7,000 అప్పుగా తీసుకున్నాడు. ఇదే వారి మధ్య చిచ్చు పెట్టింది.
మద్యం మత్తులో పెరిగిన వివాదం
మొన్న రాత్రి నెల్లై కొత్త బస్టాండ్ సమీపంలోని నిర్మానుష్య ప్రాంతంలో కూర్చుని వీరిద్దరూ మద్యం సేవించారు. మత్తు తలకెక్కాక, మాడసామి తన డబ్బు తిరిగి ఇవ్వాలని జోసెఫ్‌ను నిలదీశాడు. ఈ క్రమంలో ఇద్దరి మధ్య వాగ్వాదం తీవ్రమైంది. ఆగ్రహంతో ఊగిపోయిన మాడసామి, పక్కనే ఉన్న ఒక భారీ బండరాయిని తీసి జోసెఫ్ తలపై బాదాడు.
కిరాతకంగా హత్య.. ముఖం గుర్తుపట్టలేనంతగా!
దెబ్బకు జోసెఫ్ కింద పడిపోగా.. అంతటితో ఆగని మాడసామి, రాళ్లతో అతని ముఖాన్ని ఛిద్రం చేశాడు. అనంతరం మెడకు తువ్వాలు బిగించి, కాళ్లతో తొక్కి అత్యంత పాశవికంగా హతమార్చాడు. రక్తం మడుగులో స్నేహితుడు విగతజీవిగా పడి ఉన్నా ఆ కిరాతకుడిలో కనికరం కలగలేదు.
నేరుగా పోలీస్ స్టేషన్‌కు..
అర్ధరాత్రి ఒంటి గంట సమయంలో మాడసామి నేరుగా బస్టాండ్ సమీపంలోని పోలీస్ అవుట్‌పోస్టుకు వెళ్లి, “నేను ఒకరిని చంపేశాను” అని చెప్పడంతో పోలీసులు షాక్‌కు గురయ్యారు. వెంటనే సంఘటనా స్థలానికి చేరుకున్న మేలపాళ్యం పోలీసులు, ఛిద్రమైన స్థితిలో ఉన్న జోసెఫ్ రాజా మృతదేహాన్ని స్వాధీనం చేసుకుని పోస్టుమార్టం నిమిత్తం పాళయంకోట్టై ప్రభుత్వ ఆసుపత్రికి తరలించారు.
ప్రస్తుతం పోలీసులు కేసు నమోదు చేసి నిందితుడు మాడసామిని కటకటాల వెనక్కి నెట్టారు. అప్పుగా తీసుకున్న కొద్దిపాటి సొమ్ము కోసం కన్న స్నేహితుడినే కడతేర్చిన ఈ దారుణం స్థానికంగా పెను సంచలనం సృష్టించింది.