బరేలీ/లక్నో: సైబర్ నేరగాళ్లు విసిరిన మాయావలలో చిక్కుకుని, కళ్లముందే లక్షలాది రూపాయలు పోగొట్టుకునే స్థితిలో ఉన్న తన తల్లిదండ్రులను ఒక 13 ఏళ్ల బాలుడు ప్రాణాలకు తెగించి కాపాడుకున్నాడు. ఉత్తరప్రదేశ్‌లోని బరేలీలో చోటుచేసుకున్న ఈ ‘డిజిటల్ అరెస్ట్’ ఉదంతం ఇప్పుడు దేశవ్యాప్తంగా చర్చనీయాంశమైంది. ఎనిమిదో తరగతి చదువుతున్న తన్మయ్ చూపిన సమయస్ఫూర్తికి పోలీసు ఉన్నతాధికారులు సైతం ఫిదా అయ్యారు.
ఏటీఎస్ అధికారులమంటూ ‘డిజిటల్’ దెబ్బ!
బరేలీలోని ప్రేమ నగర్ ప్రాంతానికి చెందిన సంజయ్ కుమార్ కుటుంబానికి ఏప్రిల్ 6న ఒక గుర్తు తెలియని నంబర్ నుండి వీడియో కాల్ వచ్చింది. అవతలి వ్యక్తి పోలీసు యూనిఫాంలో ఉండి, తాను ‘ఏటీఎస్’ (ATS) అధికారినని పరిచయం చేసుకున్నాడు. సంజయ్ భార్య రోషీ సక్సేనా ఆధార్ నంబర్ చెప్పి.. ఆమెకు ఉగ్రవాదులతో సంబంధాలు ఉన్నాయని, దేశ రహస్యాలను లీక్ చేస్తోందని బెదిరించాడు. ఆపై కాల్‌ను ‘పూణే హెడ్‌క్వార్టర్స్’కు ట్రాన్స్ ఫర్ చేస్తున్నట్లు నటించి, మరికొందరు నకిలీ అధికారులతో మాట్లాడించి ఆ దంపతులను భయభ్రాంతులకు గురిచేశారు.
10 గంటల గృహనిర్బంధం..
“తనిఖీ పూర్తయ్యే వరకు ఇంటి తలుపులు మూసేయాలి.. ఎవరూ బయటకు వెళ్లకూడదు.. వెళ్తే అరెస్ట్ చేస్తాం” అంటూ ఆ కరుడుగట్టిన కేటుగాళ్లు ఆ కుటుంబాన్ని ఏకంగా 10 గంటల పాటు ‘డిజిటల్ అరెస్ట్’లో ఉంచారు. భయంతో వణికిపోయిన సంజయ్ దంపతులు తమ బ్యాంక్ ఖాతా వివరాలు, పిన్ నంబర్లు, పాన్ కార్డు వివరాలన్నీ నేరగాళ్లకు ఇచ్చేశారు. రోషీ సక్సేనా పేరుతో ఒక నకిలీ అరెస్ట్ వారెంట్‌ను కూడా పంపి వారిని పూర్తిగా తమ గుప్పిట్లోకి తెచ్చుకున్నారు.
చిచ్చరపిడుగు తన్మయ్ ‘రివర్స్ అటాక్’!
అయితే, ఈ డ్రామానంతటినీ గమనిస్తున్న వారి కుమారుడు తన్మయ్ అస్సలు భయపడలేదు. పేపర్లలో వచ్చే వార్తలు, సోషల్ మీడియా ద్వారా ‘డిజిటల్ అరెస్ట్’ మోసాల గురించి అతనికి ముందే అవగాహన ఉంది.
- సైలెంట్ ఆపరేషన్: తన్మయ్ సైగలతో తండ్రికి ధైర్యం చెబుతూనే.. నేరగాళ్లు ఫోన్‌లో ఇన్‌స్టాల్ చేయించిన యాప్‌లను రహస్యంగా డిలీట్ చేశాడు.
- సాహసోపేత నిర్ణయం: నేరగాళ్ల కళ్లు గప్పి మెల్లగా ఇంటి నుంచి బయటకు జారుకున్న తన్మయ్, పొరుగువారి సహాయంతో పోలీసులకు సమాచారం అందించాడు.
10 నిమిషాల్లో ఖాతా సీజ్.. రూ. 6 లక్షలు పైగా సేఫ్!
సమాచారం అందిన వెంటనే ప్రేమ నగర్ పోలీసులు, సైబర్ సెల్ బృందం మెరుపు వేగంతో స్పందించాయి. కేవలం 10 నిమిషాల్లోనే సంజయ్ బ్యాంక్ ఖాతాను ఫ్రీజ్ చేయించారు. అప్పటికే కేటుగాళ్లు డబ్బు డ్రా చేసేందుకు ప్రయత్నిస్తుండగా పోలీసులు అడ్డుకోవడంతో ఖాతాలో ఉన్న రూ. 6 లక్షలు సురక్షితంగా మిగిలాయి.
బహుమతులు.. ప్రశంసలు!
బాలుడి తెలివితేటలకు ముగ్ధులైన ఎస్ఎస్పీ అనురాగ్ ఆర్య.. సైబర్ టీమ్‌కు రూ. 10 వేల రివార్డు ప్రకటించడమే కాకుండా, తన్మయ్‌ను ప్రత్యేకంగా అభినందించారు. “డిజిటల్ అరెస్ట్ అనే చట్టమే లేదు.. ఎవరైనా వీడియో కాల్‌లో బెదిరిస్తే వెంటనే కాల్ కట్ చేయండి” అని పోలీసులు ప్రజలకు అవగాహన కల్పించారు.
అవగాహన ఉంటే ప్రాణాలనే కాదు, కష్టపడి సంపాదించిన సొమ్మును కూడా కాపాడుకోవచ్చని తన్మయ్ మరోసారి నిరూపించాడు.