న్యూఢిల్లీ: పశ్చిమ బెంగాల్ ఎన్నికల సమీక్షా సమావేశంలో హైడ్రామా చోటుచేసుకుంది. ఒక సాధారణ ప్రశ్న ఐఏఎస్ అధికారికి, కేంద్ర ఎన్నికల ప్రధాన కమిషనర్‌కు (CEC) మధ్య తీవ్ర వాగ్వాదానికి దారితీసింది. “సర్వీసులో మాకూ 25 ఏళ్ల అనుభవం ఉంది.. మాతో ఇలా మాట్లాడకూడదు” అంటూ సీఈసీ జ్ఞానేష్ కుమార్‌కే ఎదురుతిరిగిన యూపీ కేడర్ ఐఏఎస్ అధికారి అనురాగ్ యాదవ్ ఉదంతం ఇప్పుడు దేశవ్యాప్తంగా ఐఏఎస్ వర్గాల్లో చర్చనీయాంశమైంది.
అసలేం జరిగింది?
పశ్చిమ బెంగాల్ ఎన్నికల సన్నద్ధతపై బుధవారం సీఈసీ జ్ఞానేష్ కుమార్ వర్చువల్ మీటింగ్ నిర్వహించారు. బెంగాల్‌లోని కూచ్ బెహార్ నియోజకవర్గానికి ఎన్నికల పర్యవేక్షకుడిగా (Observer) అనురాగ్ యాదవ్‌ను కమిషన్ నియమించింది. సమీక్షలో భాగంగా, మీ పరిధిలో ఎన్ని పోలింగ్ బూత్‌లు ఉన్నాయి? అని సీఈసీ ప్రశ్నించారు.
వాగ్వాదం: ఈ ప్రాథమిక ప్రశ్నకు సమాధానం ఇవ్వడంలో అనురాగ్ యాదవ్ తడబడ్డారు, కొంత జాప్యం జరిగింది. దీంతో అసహనం వ్యక్తం చేసిన సీఈసీ, ఏదో వ్యాఖ్య చేశారు. అది నచ్చని అనురాగ్ యాదవ్ వెంటనే స్పందిస్తూ.. “మీరు మాతో ఇలా మాట్లాడలేరు. నేను కూడా 25 ఏళ్ల సర్వీస్ పూర్తి చేసిన అధికారిని. మీ పద్ధతి సరికాదు” అంటూ తీవ్రంగా అభ్యంతరం తెలిపారు.
నిశ్శబ్దం: ఐఏఎస్ అధికారి నుంచి ఇలాంటి సమాధానం వస్తుందని ఊహించని కమిషన్ సభ్యులు కొద్దిసేపు నిశ్శబ్దంలోకి వెళ్లిపోయారు. ఆ తర్వాత ఏదోలా సమావేశాన్ని ముగించారు.
పర్యవేక్షకుడి బాధ్యతల నుంచి తొలగింపు
ఈ ఘటన జరిగిన కొద్దిసేపటికే అనురాగ్ యాదవ్‌ను ఎన్నికల పర్యవేక్షకుడి బాధ్యతల నుంచి తప్పిస్తూ ఎన్నికల కమిషన్ నిర్ణయం తీసుకుంది. అయితే, వాగ్వాదం వల్ల ఆయన్ను తొలగించలేదని.. తన పరిధిలోని బూత్‌ల సంఖ్య వంటి కనీస సమాచారం తెలియకపోవడం, విధుల్లో అశ్రద్ధ చూపడం వల్లే ఈ నిర్ణయం తీసుకున్నట్లు కమిషన్ వర్గాలు పేర్కొంటున్నాయి.
“ఎన్నికల పర్యవేక్షకులు కమిషన్‌కు కళ్లు, చెవుల వంటివారు. క్షేత్రస్థాయిలో ఉండి కూడా బేసిక్ వివరాలు తెలియకపోవడం ఆందోళనకరం” అని కమిషన్ అధికారి ఒకరు వ్యాఖ్యానించారు.
ఎవరీ అనురాగ్ యాదవ్?
అనురాగ్ యాదవ్ ఉత్తరప్రదేశ్ కేడర్‌కు చెందిన సీనియర్ ఐఏఎస్ అధికారి.
ప్రస్తుత హోదా: వారం రోజుల క్రితమే ఆయనకు యూపీ ప్రభుత్వం సాంఘిక సంక్షేమ మరియు సైనిక సంక్షేమ శాఖ ప్రిన్సిపల్ సెక్రటరీగా బాధ్యతలు అప్పగించింది.
గత అనుభవం: గతంలో ఆయన ఐటీ (IT) విభాగంలో కూడా పనిచేశారు. సుదీర్ఘ అనుభవం ఉన్నప్పటికీ, ఎన్నికల విధుల్లో ఇలా వివాదానికి కేంద్రబిందువు కావడం చర్చకు దారితీసింది.
నిబంధనలు కఠినంగా అమలు చేసే ఎన్నికల కమిషన్ ముందు.. ఒక సీనియర్ ఐఏఎస్ తన ‘అనుభవం’ ప్రదర్శించి ఎదురుతిరగడం ఇప్పుడు అధికార వర్గాల్లో హాట్ టాపిక్‌గా మారింది. కమిషన్ తీరును కొందరు సమర్థిస్తుంటే.. మరికొందరు అధికారుల ఆత్మాభిమానం గురించి మాట్లాడుతున్నారు.