భబువా (బీహార్): బయట దొరికే రంగురంగుల మసాలా వంటకాలు, నోరూరించే జంక్ ఫుడ్ ప్రియులకు ఇదొక హెచ్చరిక. స్నేహితులతో కలిసి సరదాగా పార్టీ చేసుకుందామని హోటల్‌కు వెళ్లిన ఒక యువకుడికి అదే చివరి భోజనమైంది. హోటల్‌లో వడ్డించిన మంచూరియా, పనీర్ కడాయ్ తిన్న ముగ్గురిలో ఒకరు ప్రాణాలు కోల్పోగా, మరో ఇద్దరు మృత్యువుతో పోరాడుతున్నారు. ఈ విషాద ఘటన బీహార్‌లోని భబువాలో చోటుచేసుకుంది.
అసలేం జరిగింది?
వివరాల్లోకి వెళ్తే.. విశాల్ కుమార్ అనే యువకుడు తన తమ్ముడు వినాయక్ మరియు స్నేహితుడు దేవరాజ్‌తో కలిసి స్థానిక రెస్టారెంట్‌కు పార్టీ కోసం వెళ్లారు. అక్కడ వారు వెజ్ మంచూరియా మరియు పనీర్ కడాయ్‌ని ఆర్డర్ చేశారు. ఎంతో ఇష్టంగా తిన్న వారు, భోజనం ముగించుకుని హాయిగా ఇంటికి చేరుకున్నారు.
అర్ధరాత్రి మొదలైన నరకం
ఇంటికి వెళ్లిన కొద్దిసేపటికే ముగ్గురికీ తీవ్రమైన కడుపునొప్పి, వాంతులు మొదలయ్యాయి. అర్ధరాత్రి దాటాక విశాల్ పరిస్థితి విషమించింది. తెల్లవారుజామున 4:30 గంటల ప్రాంతంలో కుటుంబ సభ్యులు అతడిని భబువా ఆసుపత్రికి తరలించారు. అయితే, అప్పటికే విశాల్ మృతి చెందినట్లు వైద్యులు ధృవీకరించారు. వినాయక్, దేవరాజ్ ప్రస్తుతం ఆసుపత్రిలో అత్యవసర చికిత్స పొందుతున్నారు.
వైద్యుల ప్రాథమిక నిర్ధారణ: ‘ఫుడ్ పాయిజనింగ్’
విశాల్ మృతికి ప్రధాన కారణం ‘ఫుడ్ పాయిజనింగ్’ (విషపూరితమైన ఆహారం) అని వైద్యులు ప్రాథమికంగా నిర్ధారించారు. ఆహారంలో కలిసిన ప్రమాదకర రసాయనాలు లేదా కుళ్ళిపోయిన పదార్థాల వల్ల ఇన్ఫెక్షన్ వేగంగా వ్యాపించిందని, సరైన సమయానికి చికిత్స అందకపోవడంతో ప్రాణాలు పోయాయని తెలిపారు.
రంగంలోకి పోలీసులు.. హోటల్ సీజ్!
ఈ ఘటనపై ఆగ్రహం వ్యక్తం చేసిన విశాల్ కుటుంబ సభ్యులు పోలీసులకు ఫిర్యాదు చేశారు. కేసు నమోదు చేసుకున్న పోలీసులు వెంటనే సదరు హోటల్‌పై దాడి చేసి, దానిని సీజ్ చేశారు. ఆహార నమూనాలను సేకరించి ల్యాబ్‌కు పంపారు. హోటల్ యాజమాన్యంపై కఠిన చర్యలు తీసుకుంటామని పోలీసులు హామీ ఇచ్చారు.