న్యూఢిల్లీ: మన దేశంలోని వంటగదుల్లో త్వరలో ఒక భారీ విప్లవాత్మక మార్పు రాబోతోంది. గ్యాస్ సిలిండర్ల కోసం వేచి చూసే రోజులకు కేంద్ర ప్రభుత్వం స్వస్తి పలకనుంది. పైప్డ్ నేచురల్ గ్యాస్ (PNG) కనెక్షన్లు అందుబాటులోకి వచ్చిన ప్రాంతాల్లో ఎల్పీజీ (LPG) సిలిండర్ల పంపిణీని పూర్తిగా నిలిపివేయాలని కేంద్రం సంచలన నిర్ణయం తీసుకుంది.
3 నెలల గడువు.. లేదంటే కనెక్షన్ కట్!
పెట్రోలియం మరియు సహజ వాయువు విధానం-2026 ప్రకారం, ప్రభుత్వం కొత్త నిబంధనలను అమల్లోకి తెచ్చింది.
- నోటీసు అందిన 90 రోజుల్లో: మీ ప్రాంతంలో గ్యాస్ పైప్‌లైన్ సౌకర్యం ఉంటే, గ్యాస్ కంపెనీలు మీకు అధికారికంగా నోటీసు జారీ చేస్తాయి. ఆ నోటీసు అందిన 3 నెలల (90 రోజులు) లోపు మీరు తప్పనిసరిగా పీఎన్‌జీ (PNG) కనెక్షన్‌కు మారిపోవాలి.
- సరఫరా నిలిపివేత: ఇచ్చిన గడువు ముగిసిన తర్వాత కూడా మారకపోతే, మీ పాత ఎల్పీజీ కనెక్షన్ రద్దవుతుంది. మీకు ఇకపై సిలిండర్లు సరఫరా చేయరు.
ఎందుకీ మార్పు?
అంతర్జాతీయ మార్కెట్‌లో క్రూడ్ ఆయిల్ ధరల పెరుగుదల, మిడిల్ ఈస్ట్‌లో నెలకొన్న ఉద్రిక్తతల వల్ల ఎల్పీజీ దిగుమతి భారంగా మారింది. అందుకే దేశీయంగా లభించే సహజ వాయువు వినియోగాన్ని పెంచాలని కేంద్రం ఈ నిర్ణయం తీసుకుంది. నగరాల్లో మిగిలే సిలిండర్లను, పైప్‌లైన్ సౌకర్యం లేని మారుమూల గ్రామాలకు మళ్లించడం కూడా ఇందులో ప్రధాన ఉద్దేశం.
సిలిండర్ కంటే ‘పైప్ గ్యాస్’ ఎందుకు మేలు?
ఎల్పీజీ సిలిండర్లతో పోలిస్తే పీఎన్‌జీ వల్ల వినియోగదారులకు అనేక లాభాలు ఉన్నాయి:
- భారీగా పొదుపు: ఎల్పీజీ కంటే పీఎన్‌జీ 20 నుంచి 30 శాతం తక్కువ ధరకే లభిస్తుంది. దీనివల్ల సామాన్య కుటుంబాలకు నెలవారీ ఖర్చు తగ్గుతుంది.
- అరచేతిలో గ్యాస్: సిలిండర్ బుక్ చేయడం, అది వచ్చే వరకు వేచి చూడటం వంటి తలనొప్పులు ఉండవు. పైపుల ద్వారా 24 గంటల పాటు నిరంతరాయంగా గ్యాస్ అందుతుంది.
- అత్యంత సురక్షితం: పీఎన్‌జీ గాలి కంటే తేలికైనది. ఒకవేళ లీకేజీ జరిగినా అది వెంటనే గాలిలో కలిసిపోతుంది. దీంతో పేలుళ్లు సంభవించే ప్రమాదం చాలా తక్కువ.
- వాడినంతే బిల్లు: విద్యుత్ బిల్లు తరహాలోనే.. మీరు నెలకు ఎంత గ్యాస్ వాడారో దానికి మాత్రమే బిల్లు చెల్లిస్తే సరిపోతుంది. ముందుగా డబ్బు కట్టాల్సిన అవసరం లేదు.
కనెక్షన్ కోసం దరఖాస్తు చేసుకోండి ఇలా..
మీ ప్రాంతంలోని గ్యాస్ కంపెనీ (ఉదాహరణకు: అదానీ గ్యాస్, గెయిల్ గ్యాస్, లేదా ఐఓసీఎల్) వెబ్‌సైట్ లేదా యాప్ ద్వారా ఆన్‌లైన్‌లో దరఖాస్తు చేసుకోవచ్చు.
- ‘New Connection’ పై క్లిక్ చేసి మీ పేరు, చిరునామా, ఫోన్ నంబర్ నమోదు చేయాలి.
- ఆధార్ కార్డు, హౌస్ టాక్స్ రసీదు లేదా కరెంట్ బిల్లు ఫోటోను అప్‌లోడ్ చేయాలి.
- రిజిస్ట్రేషన్ ఫీజును ఆన్‌లైన్‌లో చెల్లిస్తే సరిపోతుంది.
పైప్‌లైన్ పనులను వేగవంతం చేయాలని హౌసింగ్ సొసైటీలకు, విల్లా అసోసియేషన్లకు ప్రభుత్వం కఠిన ఆదేశాలు జారీ చేసింది. పైప్‌లైన్ కంపెనీలు అనుమతి కోరిన 48 నుంచి 72 గంటల్లోగా అధికారులు అనుమతి ఇవ్వాలి. ఒకవేళ ఇవ్వకపోతే అది ‘డీమ్డ్ పర్మిషన్’ (అనుమతి వచ్చినట్లే) గా భావించి పనులు మొదలుపెట్టవచ్చు. కాబట్టి, మీ ఇంటి వద్దకు గ్యాస్ పైప్‌లైన్ వస్తే ఆలస్యం చేయకుండా పీఎన్‌జీకి మారిపోండి!