మీరట్ : ఒక మనిషి రోజంతా పని ముగించుకుని ఇంటికి వచ్చాక, కుళ్ళిపోయిన శవంతో గడుపుతాడంటే ఎవరైనా నమ్ముతారా? వినడానికే ఒళ్ళు గగుర్పొడిచే ఈ అమానుష ఘటన ఉత్తరప్రదేశ్‌లోని మీరట్‌లో వెలుగులోకి వచ్చింది. కన్నకూతురు ప్రాణం పోయినా, ఆ తండ్రి అంత్యక్రియలు చేయలేదు సరే.. కనీసం ఎవరికీ చెప్పకుండా ఐదు నెలల పాటు ఆ శవంతోనే ఒకే ఇంట్లో కాపురం చేశాడు. ఆ కిరాతక ఉదంతం వివరాల్లోకి వెళ్తే..
గుట్టురట్టు అయిందిలా..
మీరట్ పరిధిలోని సదర్ తెలీ మొహల్లాలో బెంగాల్‌కు చెందిన ఉదయ్ భాను బిశ్వాస్ నివసిస్తున్నాడు. అతనికి 34 ఏళ్ల ప్రియాంక అనే కుమార్తె ఉంది. గత కొంతకాలంగా వీరిద్దరూ ఎవరికీ కనిపించకపోవడంతో బంధువులకు అనుమానం వచ్చింది. ప్రియాంక బంధువు బిశ్వజిత్ ఫోన్ చేయగా, ఉదయ్ పొంతన లేని సమాధానాలు చెప్పాడు. తన కూతురికి ఆరోగ్యం బాగోలేదని, డెహ్రాడూన్ ఆస్పత్రిలో చికిత్స పొందుతోందని అబద్ధాలు ఆడాడు.
అయితే శుక్రవారం సాయంత్రం ఉదయ్ ఒక టీ కొట్టు వద్ద కనిపించాడన్న సమాచారంతో బంధువులందరూ కలిసి అతన్ని పట్టుకుని నిలదీశారు. తప్పించుకునే దారి లేక అతను అసలు నిజాన్ని ఒప్పుకోవడంతో అందరూ హతాశులయ్యారు.
ఇంట్లో నరకం.. అస్థిపంజరంగా మారిన దేహం!
పోలీసులు ఉదయ్ ఇంటి తలుపులు తెరిచి లోపలికి వెళ్లగానే అక్కడ కనిపించిన దృశ్యానికి వెన్నులో వణుకు పుట్టింది. ఇల్లంతా చెత్తాచెదారం.. దుర్వాసన! బెడ్‌పై ప్రియాంక మృతదేహం అస్థిపంజరంగా మారి ఉంది.
- భయంకర నిజం: ప్రియాంక ఐదు నెలల క్రితమే మరణించింది. కంప్యూటర్ సైన్స్ టీచర్‌గా పనిచేసే ఆమె మరణవార్తను తండ్రి ప్రపంచానికి తెలియనివ్వలేదు.
- వాసన రాకుండా అత్తరు: శవం కుళ్ళిపోయి వాసన రాకుండా ఉండేందుకు ఉదయ్ డజన్ల కొద్దీ ‘సెంట్’ బాటిళ్లను వాడాడు. ప్రతిరోజూ ఆ అస్థిపంజరానికి అత్తరు పూస్తూ దాని పక్కనే గడిపేవాడు. పోలీసులు అతని ఇంటి నుండి అనేక సుగంధ ద్రవ్యాల సీసాలను స్వాధీనం చేసుకున్నారు.
క్షుద్రపూజలే కారణమా?
పోలీసుల విచారణలో ఉదయ్ మరో విస్తుపోయే విషయం చెప్పాడు. ప్రియాంక ‘క్యాన్సర్’ (నలుపు కామెర్లు)తో బాధపడుతుండేదని, ఆమెకు దెయ్యం పట్టిందని భావించి దెయ్యాలను వదిలించే పూజలు చేశాడని, ఆ క్రమంలోనే ఆమె చనిపోయిందని తెలిపాడు. ఆమె చనిపోయిన తర్వాత కూడా రెండు నెలలు అక్కడే ఉండి, ఆపై డెహ్రాడూన్ వెళ్లి మళ్ళీ కొద్దిరోజుల క్రితమే తిరిగి వచ్చాడు.
గతంలో భార్య ఆత్మహత్య!
ఈ దారుణం వెనుక కుటుంబ విషాదం కూడా ఉంది. 2013లో ఉదయ్ వారణాసిలో పనిచేస్తున్నప్పుడు ఇంటికి సరిగ్గా రాకపోయేవాడు. ఆ మనస్థాపంతో అతని భార్య శర్మిష్ట మీరట్‌లోని ఇంట్లోనే ఉరివేసుకుని ఆత్మహత్య చేసుకుంది. ఆ ఘటన తర్వాత ప్రియాంక తీవ్ర మానసిక కుంగుబాటులోకి వెళ్లి మూగబోయింది. ఇప్పుడు అదే ఇంట్లో ఆమె కూడా అనాథగా ప్రాణాలు విడిచి, తండ్రి పిచ్చితనానికి బలై అస్థిపంజరంగా మిగిలిపోయింది.
ప్రస్తుతం పోలీసులు ఉదయ్‌ను అదుపులోకి తీసుకుని విచారిస్తున్నారు. శవాన్ని పోస్టుమార్టం నిమిత్తం తరలించారు. ఈ ఘటన స్థానికంగా తీవ్ర కలకలం రేపుతోంది.