కంపాలా/అంకారా: అంతర్జాతీయ దౌత్య చరిత్రలో ఎన్నడూ లేని విధంగా ఒక దేశ సైన్యాధిపతి నోరు పారేసుకున్నారు. యుగాండా ఆర్మీ చీఫ్ ముహూజీ కైనరుగాబా తన వివాదాస్పద వ్యాఖ్యలతో మరోసారి ప్రపంచ దేశాలను విస్మయానికి గురిచేశారు. నాటో సభ్య దేశమైన టర్కీని లక్ష్యంగా చేసుకుని ఆయన చేసిన వ్యాఖ్యలు ఇప్పుడు ఇరు దేశాల మధ్య తీవ్ర దౌత్య ఉద్రిక్తతలకు దారితీశాయి.
సోషల్ మీడియా వేదికగా ఆయన చేసిన అరాచక వ్యాఖ్యల వివరాలు ఇలా ఉన్నాయి:
- బిలియన్ డాలర్ల డిమాండ్: టర్కీ వెంటనే యుగాండాకు ఒక బిలియన్ డాలర్లు (దాదాపు రూ. 9,400 కోట్లు) చెల్లించాలని కైనరుగాబా డిమాండ్ చేశారు. ఒకవేళ ఈ డిమాండ్‌ను నెరవేర్చకపోతే యుగాండాలోని టర్కీ రాయబార కార్యాలయాన్ని మూసివేస్తామని, దౌత్య సంబంధాలను తెంచుకుంటామని హెచ్చరించారు. టర్కీ తమ దేశం వెన్నులో పొడిచిందని ఆయన ఆరోపించారు.
- మహిళలపై నీచమైన వ్యాఖ్యలు: కేవలం డబ్బుతో ఆగకుండా, టర్కీ మహిళల పట్ల ఆయన అత్యంత అభ్యంతరకర వ్యాఖ్యలు చేశారు. “శాంతి నెలకొనాలంటే టర్కీ తమ దేశ మహిళలను యుగాండాకు అప్పగించాలి” అని, అంతటితో ఆగకుండా “టర్కీలోనే అత్యంత అందమైన అమ్మాయిని తనకిచ్చి పెళ్లి చేయాలని” వితండవాదం చేశారు.
- ఇజ్రాయెల్‌కు అండగా లక్ష మంది సైన్యం: పశ్చిమాసియా యుద్ధంలో తాను ఇజ్రాయెల్‌కు మద్దతు ఇస్తున్నట్లు ప్రకటించిన ఆయన, ‘పవిత్ర భూమి’ రక్షణ కోసం లక్ష మంది యుగాండా సైనికులను పంపిస్తానని ఆఫర్ ఇచ్చారు. ఒకవేళ యుద్ధం అంటూ వస్తే టర్కీకి బతికే అవకాశం ఉండదని కూడా హెచ్చరించారు.
- గతంలోనూ ఇటలీ ప్రధానిపై ఇలాగే..: కైనరుగాబాకు ఇలాంటి పిచ్చి వ్యాఖ్యలు చేయడం కొత్తేమీ కాదు. గతంలో ఇటలీ ప్రధాని జార్జియా మెలోనిని పెళ్లి చేసుకుంటానని, కట్నంగా 100 ఆవులను ఇస్తానని ప్రకటించి వార్తల్లో నిలిచారు. ఆమె నిరాకరిస్తే రోమ్ నగరంపై దాడి చేస్తానని కూడా బెదిరించారు.
ఎవరీ ముహూజీ కైనరుగాబా? ముహూజీ కైనరుగాబా యుగాండాలో సుదీర్ఘకాలం అధ్యక్షుడిగా ఉన్న యువేరి ముసెవేని కుమారుడు. ప్రస్తుతం ఆయన యుగాండా పీపుల్స్ డిఫెన్స్ ఫోర్స్ అధిపతిగా ఉన్నారు. అయితే, ఆయన వ్యక్తిగతంగా చేసే ఈ వింత వ్యాఖ్యలు యుగాండా ప్రభుత్వ అధికారిక విధానాలా లేక ఆయన వ్యక్తిగత పైత్యమా అనేది ఇప్పటికీ స్పష్టం కాలేదు. టర్కీ ప్రభుత్వం మాత్రం ఈ వ్యాఖ్యలపై ఇప్పటివరకు స్పందించలేదు.