“ఎంత జీతం ఇస్తారో.. అంత పనే చేస్తా” అంటూ ఓ చైనా మహిళ కార్యాలయంలోనే ఏకంగా ఐదు గంటల పాటు నిద్రపోయి అందరినీ విస్తుపోయేలా చేసింది. జీతం తక్కువగా ఉందన్న అసంతృప్తితో ఆమె చేసిన ఈ ‘వింత నిరసన’ ఇప్పుడు సోషల్ మీడియాలో హాట్ టాపిక్ అయింది. అయితే, కేవలం నిద్రపోవడమే కాకుండా.. తన యజమాని ప్రాణాల మీదకు తీసుకురావడంతో ఆమెపై నెటిజన్లు తీవ్ర ఆగ్రహం వ్యక్తం చేస్తున్నారు.
నిద్రతో నిరసన.. ఏమందంటే?
చైనాలోని షాంగ్‌క్యూ నగరానికి చెందిన ఓ యువతి, తను చేస్తున్న పనికి కంపెనీ ఇచ్చే జీతం ఏమాత్రం సరిపోవడం లేదని భావించింది. తక్కువ వేతనానికి ఎక్కువ కష్టపడటం తన వల్ల కాదని నిర్ణయించుకుని, ఆఫీసు పని వేళల్లోనే డెస్క్ మీద పడుకుని ఐదు గంటల పాటు గాఢ నిద్రలోకి జారుకుంది. బాస్ వచ్చి నిలదీయగా.. “మీరు ఇచ్చే జీతానికి ఇంతే పని దొరుకుతుంది (You get what you pay for)” అంటూ నిర్మొహమాటంగా బదులిచ్చింది.
పని పట్ల నిర్లక్ష్యం వహిస్తే ఉద్యోగం నుంచి తొలగిస్తానని బాస్ హెచ్చరించడంతో, ఆమె సోషల్ మీడియాలో ఏడుస్తూ ఒక వీడియో పోస్ట్ చేసింది. “నా లాంటి తక్కువ జీతం వచ్చే వారి కష్టాలు మీకు అర్థం కావు” అంటూ తన చర్యను సమర్థించుకుంది.
బాస్ చాక్లెట్ తిని ప్రాణసంకటంలోకి!
కథ ఇక్కడితో ముగియలేదు. ఆ నిద్ర నుంచి లేచిన తర్వాత ఆ మహిళ చేసిన మరో పని పెను దుమారం రేపింది. తన బాస్ టేబుల్ మీద ఉన్న ఒక చాక్లెట్ స్నాక్‌ను ఆమె తీసి తినేసింది. వాస్తవానికి ఆ బాస్ రక్తంలో చక్కెర స్థాయిలు పడిపోయే సమస్య (Glucose intolerance)తో బాధపడుతున్నారు.
అకస్మాత్తుగా ఆయనకు నీరసం వచ్చి, చక్కెర స్థాయిని పెంచుకోవడానికి ఆ చాక్లెట్ కోసం వెతకగా అది కనిపించలేదు. సరైన సమయానికి అది దొరకకపోవడంతో ఆయన దాదాపు కుప్పకూలినంత పని అయింది. “ఆమె నన్ను చంపాలని చూస్తోంది” అంటూ సదరు యజమాని తీవ్ర ఆగ్రహం వ్యక్తం చేశారు.
నెటిజన్ల ఫైర్.. “ఇదేం పద్ధతి?”
ఈ ఘటనపై చైనీస్ సోషల్ మీడియాలో చర్చలు ఊపందుకున్నాయి. కార్మికుల హక్కుల గురించి కొందరు మాట్లాడినప్పటికీ, మెజారిటీ నెటిజన్లు మాత్రం ఆ మహిళ తీరును తప్పుబడుతున్నారు.
- “జీతం నచ్చకపోతే ఉద్యోగం మానేయాలి కానీ, ఇలా పని వేళల్లో పడుకోవడం, ఎదుటివారి ఆహారాన్ని దొంగిలించడం ఏమాత్రం ప్రొఫెషనల్ కాదు” అని ఒకరు కామెంట్ చేశారు.
- “వార్నీ.. నా జీవితంలో ఒక బాస్‌కు సపోర్ట్ చేస్తానని ఎప్పుడూ అనుకోలేదు” అని మరొకరు ఎద్దేవా చేశారు.
- “మరోసారి పడుకునేటప్పుడు అలారం పెట్టుకో.. కనీసం డ్యూటీ అయిపోయే సమయానికైనా లేస్తావు” అంటూ నెటిజన్లు ఆమెను ఓ రేంజ్‌లో ట్రోల్ చేస్తున్నారు.
మొత్తానికి తక్కువ జీతంపై ఆమె చేసిన ఈ ‘నిద్ర నిరసన’ ఇప్పుడు ప్రపంచవ్యాప్తంగా చర్చనీయాంశమైంది.