మధ్యప్రాచ్యంలో ముదిరిన యుద్ధ మేఘాలు ప్రపంచాన్ని వణికిస్తున్నాయి. అమెరికా-ఇరాన్ మధ్య శాంతి చర్చలు విఫలం కావడంతో, అమెరికా అధ్యక్షుడు డొనాల్డ్ ట్రంప్ అత్యంత కఠినమైన నిర్ణయం తీసుకున్నారు. ప్రపంచ చమురు రవాణాకు అత్యంత కీలకమైన ‘హోర్ముజ్ జలసంధి’ (Strait of Hormuz) ను దిగ్బంధించాలని అమెరికా నౌకాదళాన్ని ఆయన ఆదేశించారు. ఇరాన్‌కు వెళ్లే, అక్కడి నుంచి వచ్చే ప్రతి నౌకను అడ్డుకోవాలని, అవసరమైతే ఇరాన్‌ను పూర్తిగా మట్టికరిపించేందుకు (Finish up) సిద్ధమని ట్రంప్ ప్రకటించడం ఇప్పుడు ప్రపంచవ్యాప్తంగా ప్రకంపనలు సృష్టిస్తోంది.
హోర్ముజ్ మూసివేత.. ట్రంప్ స్ట్రాటజీ ఏంటి?
పాకిస్థాన్‌లోని ఇస్లామాబాద్‌లో జరిగిన శాంతి చర్చలు ఎటువంటి ఒప్పందం లేకుండా ముగియడంతో ట్రంప్ ఈ నిర్ణయం తీసుకున్నారు. “ఇరాన్ తన అణు ఆశయాలను వీడటం లేదు. అందుకే యుద్ధం ముగియడం లేదు” అని ఆయన స్పష్టం చేశారు.
- దిగ్బంధం: హోర్ముజ్ జలసంధిలోకి ప్రవేశించే లేదా బయటకు వచ్చే అన్ని నౌకలను అమెరికా నేవీ అడ్డుకుంటుంది.
- టోల్ వసూళ్లు: జలసంధి గుండా వెళ్లే నౌకల నుంచి ఇరాన్ టోల్ వసూలు చేయడాన్ని ట్రంప్ తీవ్రంగా వ్యతిరేకిస్తున్నారు. అంతర్జాతీయ జలాల్లో ఇరాన్‌కు డబ్బులు చెల్లించిన ప్రతి నౌకను అడ్డుకోవాలని ఆదేశించారు.
- మైన్ల బెదిరింపు: సముద్రంలో మైన్లు (పేలుడు పదార్థాలు) అమర్చామన్న ఇరాన్ బెదిరింపులను ట్రంప్ కొట్టిపారేశారు. వారి నౌకాదళం ఇప్పటికే నాశనమైందని ఆయన ఎద్దేవా చేశారు.
ఒక్క రోజులో ఇరాన్ ఖతం!
ఫాక్స్ న్యూస్‌తో మాట్లాడిన ట్రంప్, ఇరాన్ తీరుపై నిప్పులు చెరిగారు. “నేను అనుకుంటే ఇరాన్‌ను ఒక్క రోజులో అంతం చేయగలను. వారు మళ్లీ చర్చల టేబుల్ వద్దకు వస్తారు.. మేము అడిగిందల్లా ఇస్తారు. ఎందుకంటే ఇప్పుడు వారి దగ్గర ఆడేందుకు ఎటువంటి కార్డులు లేవు” అని ధీమా వ్యక్తం చేశారు. గతంలో ఇరాన్ ‘అమెరికాకు మరణం’ (Death to America) అంటూ చేసిన నినాదాలను గుర్తు చేస్తూ.. ఇప్పుడు సమయం మారిందని హెచ్చరించారు.
ముగియనున్న కాల్పుల విరమణ.. తదుపరి ఏంటి?
అమెరికా-ఇజ్రాయెల్ మరియు ఇరాన్ మధ్య కుదిరిన 14 రోజుల కాల్పుల విరమణ గడువు ఏప్రిల్ 22తో ముగియనుంది. అప్పటిలోగా ఏదైనా ఒప్పందం కుదరకపోతే, పూర్తిస్థాయి యుద్ధం మొదలయ్యే ప్రమాదం ఉంది. పాకిస్థాన్ మధ్యవర్తులు శాంతి కోసం ప్రయత్నిస్తున్నప్పటికీ, ఇరాన్ అణు కార్యక్రమం విషయంలో ఇరు పక్షాల మధ్య ఏకాభిప్రాయం కుదరడం లేదు.
ఉపాధ్యక్షుడు జెడి వాన్స్, స్పెషల్ ఎన్వాయ్ స్టీవ్ విట్‌కాఫ్ మరియు జారెడ్ కుష్నర్ అందించిన నివేదికల ఆధారంగా ట్రంప్ ఈ కఠిన చర్యలకు ఉపక్రమించారు. ప్రపంచ ఆర్థిక వ్యవస్థపై ప్రభావం చూపే హోర్ముజ్ జలసంధి మూసివేత నిర్ణయం, రాబోయే రోజుల్లో ఎటు దారితీస్తుందోనని అంతర్జాతీయ సమాజం ఆందోళన చెందుతోంది.