నేటి కాలంలో స్మార్ట్‌ఫోన్ ఎంత ముఖ్యమో.. దాన్ని ఛార్జ్ చేసే ఛార్జర్ కూడా అంతే ముఖ్యం. అయితే, మనం కొనే చాలా ఛార్జర్‌లపై ‘R’ అక్షరంతో మొదలయ్యే ఒక కోడ్ నంబర్ ఉండటాన్ని మీరు ఎప్పుడైనా గమనించారా? ఆ గుర్తు చాలా చిన్నదిగా అనిపించినా, మీ ఫోన్ భద్రతకు అది ఒక బలమైన గ్యారెంటీ వంటిది. ఆ ఛార్జర్ ప్రభుత్వ భద్రతా ప్రమాణాలకు అనుగుణంగా ఉందా లేదా అని నిర్ధారించేది ఇదే. ఛార్జర్ల విశ్వసనీయతను తనిఖీ చేయకుండా వాడే అలవాటు మీకు ఉంటే, ఈ సమాచారం మీకోసమే!
అసలు ‘R’ గుర్తు అంటే ఏమిటి?
మొబైల్ ఛార్జర్‌పై ‘R’ అక్షరంతో మొదలయ్యే కోడ్ నంబర్, ‘బ్యూరో ఆఫ్ ఇండియన్ స్టాండర్డ్స్’ (BIS) అందించే రిజిస్ట్రేషన్ నంబర్. భారత ప్రభుత్వం నిర్ణయించిన భద్రత మరియు నాణ్యతా ప్రమాణాలను ఎలక్ట్రానిక్ వస్తువులు పాటిస్తున్నాయని నిర్ధారించడానికి ఈ నంబర్ కేటాయిస్తారు.
- రిజిస్ట్రేషన్: ఇందులో ‘R’ అంటే రిజిస్ట్రేషన్ అని అర్థం. దీని పక్కన ఎనిమిది అంకెల ప్రత్యేక సంఖ్య ఉంటుంది.
- భద్రతా పరీక్షలు: ఈ సర్టిఫికేషన్ ఉందంటే.. ఆ ఛార్జర్ ఓవర్ హీటింగ్ (అధికంగా వేడెక్కడం), షార్ట్ సర్క్యూట్ వంటి ప్రమాదాల నుంచి రక్షణ కల్పించేలా అనేక కఠినమైన పరీక్షలను పాస్ అయిందని అర్థం. ఈ గుర్తు లేని ఛార్జర్లను వాడటం వల్ల మీ స్మార్ట్‌ఫోన్ పాడయ్యే అవకాశం ఉండటమే కాకుండా, పేలుడు సంభవించే ప్రమాదం కూడా ఉంటుంది.
ఒరిజినల్ ఛార్జర్‌ను గుర్తించడం ఎలా?
మీరు వాడుతున్న ఛార్జర్ అసలైనదా? కాదా? అని తెలుసుకోవడానికి ఈ ‘R’ కోడ్ నంబర్ కీలకం. దీన్ని మీరు సులభంగా చెక్ చేయవచ్చు:
- BIS CARE యాప్: ప్లేస్టోర్ నుండి ‘BIS CARE’ అనే యాప్‌ను డౌన్‌లోడ్ చేసుకోండి.
- వెరిఫికేషన్: ఆ యాప్‌లో ఛార్జర్‌పై ఉన్న రిజిస్ట్రేషన్ నంబర్‌ను ఎంటర్ చేయండి.
- వివరాలు: ఒకవేళ అది ఒరిజినల్ అయితే, ఆ వస్తువు తయారీదారు, నాణ్యత వంటి పూర్తి వివరాలు అక్కడ కనిపిస్తాయి.
ఒకవేళ మీ ఛార్జర్‌పై ఈ గుర్తు లేకపోయినా లేదా యాప్‌లో తప్పుడు వివరాలు వచ్చినా, వెంటనే ఆ ఛార్జర్‌ను వాడటం మానేయండి. చౌకగా వస్తున్నాయి కదా అని నాసిరకం ఛార్జర్లను వాడి మీ ఖరీదైన ఫోన్‌ను, మీ ప్రాణాలను రిస్క్‌లో పడేసుకోకండి.