కెంటకీ (అమెరికా): హాలీవుడ్ హారర్ సినిమాలను మించిపోయేలా, వెన్నులో వణుకు పుట్టించే ఒక భయంకరమైన సంఘటన అమెరికాలో వెలుగులోకి వచ్చింది. వైద్యులు ‘బ్రెయిన్ డెడ్’ (మెదడు మృతి) అని నిర్ధారించి, అవయవ దానం కోసం ఆపరేషన్ థియేటర్కు తరలించిన ఒక వ్యక్తి.. కత్తి పెట్టే కొన్ని క్షణాల ముందు ప్రాణాలతో తేరుకున్నాడు. తను ఇంకా బతికే ఉన్నానంటూ కన్నీళ్లు పెట్టుకున్నా, వైద్యులు కనికరం చూపకుండా సర్జరీ కొనసాగించేందుకు ప్రయత్నించడం ఇప్పుడు ప్రపంచవ్యాప్తంగా కలకలం రేపుతోంది.
బ్రెయిన్ డెడ్ అని తేల్చేసిన డాక్టర్లు:
కెంటకీ రాష్ట్రానికి చెందిన ఆంథోనీ థామస్ ‘డీజే’ హూవర్ అనే వ్యక్తికి గుండెపోటు రావడంతో కుటుంబ సభ్యులు ఆసుపత్రిలో చేర్పించారు. అతడిని పరీక్షించిన వైద్యులు, మెదడు పనితీరు పూర్తిగా నిలిచిపోయిందని (బ్రెయిన్ డెడ్) ప్రకటించారు. పుట్టెడు దుఃఖంలో ఉన్న కుటుంబ సభ్యులు, కనీసం మరికొందరికైనా ప్రాణదానం జరుగుతుందన్న ఉద్దేశంతో ఆంథోనీ అవయవాలను దానం చేసేందుకు అంగీకరించారు.
థియేటర్లో కనిపించిన భయంకర దృశ్యం:
అవయవాలను సేకరించేందుకు ఆంథోనీని ఆపరేషన్ థియేటర్కు తరలించారు. సర్జరీ ప్రారంభించబోతుండగా, మత్తులో ఉండాల్సిన ఆంథోనీ ఒక్కసారిగా బెడ్పై కదలడం మొదలుపెట్టాడు. అక్కడి సిబ్బంది షాక్కు గురయ్యేలా.. అతడి కళ్ల నుండి నీళ్లు కారడం చూసిన నటాషా మిల్లర్ అనే ఉద్యోగిని నివ్వెరపోయింది. ఆంథోనీ అల్లాడుతూ కన్నీళ్లు పెట్టుకోవడం చూసి థియేటర్లో ఉన్న వారు భీతావహానికి గురయ్యారు.
కనికరం లేని అధికారులు.. ఉద్యోగాలకు రాజీనామా!
ఆంథోనీ కదులుతున్నాడని, కళ్లు తెరిచి ఏడుస్తున్నాడని సిబ్బంది పైఅధికారులకు సమాచారం ఇచ్చారు. అయితే అక్కడి నుండి వచ్చిన సమాధానం మరింత ఘోరంగా ఉంది. “అవసరమైతే అతడికి మళ్ళీ మత్తు ఇచ్చి సర్జరీ కొనసాగించండి.. ఆపరేషన్ చేయడానికి వేరే డాక్టర్ను వెతకండి” అని అధికారులు ఆదేశించినట్లు సమాచారం. ఈ అమానుష నిర్ణయంతో ఆగ్రహం వ్యక్తం చేసిన పలువురు ఆసుపత్రి సిబ్బంది, తమ ఉద్యోగాలకు తక్షణమే రాజీనామా చేశారు.
బతికి ఉండగానే ‘చచ్చాడు’ అని ముద్ర!
ఆంథోనీ సోదరి డోనా మాట్లాడుతూ.. “ఐసీయూ నుండి తీసుకెళ్లేప్పుడే ఆంథోనీ కళ్లు తెరవడం నేను గమనించాను. కానీ వైద్యులు అది కేవలం బాడీ రిఫ్లెక్స్ అని కొట్టిపారేశారు” అని ఆవేదన వ్యక్తం చేశారు. ప్రకృతి వైచిత్రం వల్ల ఆంథోనీ నేడు ప్రాణాలతో బయటపడినప్పటికీ, బతికున్న మనిషిని చనిపోయాడని ప్రకటించి అవయవాలు కోయబోవడం వైద్య చరిత్రలో ఒక ‘నల్లటి మచ్చ’గా మిగిలిపోయింది. ఈ ఘటనపై ఇప్పుడు అమెరికా వ్యాప్తంగా విచారణ జరుగుతోంది.