చైనాలోని డాలియన్ నగరంలో వైద్యులను సైతం ఆశ్చర్యపరిచిన ఒక వింత కేసు వెలుగులోకి వచ్చింది. 46 ఏళ్ల మిస్టర్ వాంగ్ అనే వ్యక్తికి ఒకరోజు ఉదయాన్నే గొంతులో విపరీతమైన నొప్పి మొదలైంది. పెయిన్ కిల్లర్ టాబ్లెట్లు వేసుకున్నా ఫలితం లేకపోవడంతో అతను ఆసుపత్రికి పరుగులు తీశాడు. అక్కడ పరీక్షలు చేసిన వైద్యులకు షాకింగ్ విషయం తెలిసింది.
8 ఏళ్ల నాటి చాప్స్టిక్: వాంగ్ గొంతులో 12 సెంటీమీటర్ల పొడవైన స్టీల్ చాప్స్టిక్ (Chopstick) ఇరుక్కుపోయి ఉందని వైద్యులు గుర్తించారు. దీని గురించి వాంగ్ను అడగ్గా, దాదాపు 8 ఏళ్ల క్రితం మద్యం మత్తులో భోజనం చేస్తుండగా పొరపాటున ఆ చాప్స్టిక్ గొంతులోకి జారిపోయిందని చెప్పాడు.
అప్పట్లో అతనికి కొంచెం నొప్పి, ఊపిరి ఆడనట్లు అనిపించినా.. శ్వాస తీసుకోవడంలో పెద్దగా ఇబ్బంది లేకపోవడంతో దానిని సీరియస్గా తీసుకోలేదు. అప్పట్లో డాక్టర్లకు చూపిస్తే, గొంతు వద్ద కోత కోసి ఆపరేషన్ చేయాలని చెప్పారు. కానీ మెడపై మచ్చ పడుతుందనే భయంతో వాంగ్ ఆపరేషన్కు నిరాకరించి, ఆ స్టీల్ రాడ్తోనే 8 ఏళ్లు గడిపేశాడు. అయితే ఇటీవల నొప్పి భరించలేనంతగా పెరగడంతో మళ్లీ ఆసుపత్రికి రాక తప్పలేదు.
వైద్యుల అద్భుతం – విజయవంతమైన ఆపరేషన్: డాలియన్ యూనివర్శిటీ ఆఫ్ టెక్నాలజీ వైద్యులు పరీక్షించగా.. ఆ చాప్స్టిక్ గొంతులోని కణజాలాలను నిరంతరం దెబ్బతీస్తున్నట్లు గుర్తించారు. అలాగే ఉంచితే అది రక్త నాళాలను చీల్చి ప్రాణాపాయానికి దారితీసే ప్రమాదం ఉంది. దీంతో డాక్టర్ల బృందం మెడపై కోత లేకుండా, నోటి ద్వారానే ఆ వస్తువును తీసేలా ఒక అత్యాధునిక శస్త్రచికిత్స (Minimally Invasive Surgery) ప్లాన్ చేశారు. డాక్టర్ హువాంగ్ వెయిపెంగ్ నేతృత్వంలో అత్యంత జాగ్రత్తగా ఆ 12 సెంటీమీటర్ల స్టెయిన్లెస్ స్టీల్ చాప్స్టిక్ను బయటకు తీశారు.
ప్రజలకు హెచ్చరిక: ఆపరేషన్ తర్వాత వాంగ్ పూర్తిగా కోలుకున్నాడు. శరీరంలోకి ఏదైనా పరాయి వస్తువు వెళ్లినప్పుడు దానిని అస్సలు నిర్లక్ష్యం చేయవద్దని వైద్యులు హెచ్చరిస్తున్నారు. అవి కాలక్రమేణా లోపలి భాగాలను కుళ్ళిపోయేలా చేసి ప్రమాదకరమైన ఇన్ఫెక్షన్లకు దారితీస్తాయని తెలిపారు. వాంగ్ గొంతులో 8 ఏళ్లుగా ఉన్న ఆ స్టీల్ రాడ్ ప్రధాన నరాలను కట్ చేయకపోవడం అతని అదృష్టమని వైద్యులు పేర్కొన్నారు.