పాట్నా: బీహార్ ఎంపీ పప్పు యాదవ్ తీవ్ర దుమారం రేపే వ్యాఖ్యలు చేశారు. రాజకీయ నాయకుల బెడ్రూమ్ల్లోకి వెళ్లకుండా 90 శాతం మంది మహిళలు రాజకీయం చేయలేరంటూ ఆయన చేసిన ప్రకటన రాజకీయ వర్గాల్లో పెను సంచలనం సృష్టించింది. లోక్సభలో మహిళా రిజర్వేషన్ బిల్లు సవరణ వీగిపోయిన కొద్ది రోజులకే ఈ స్వతంత్ర ఎంపీ మీడియా ముఖంగా ఈ వ్యాఖ్యలు చేయడం గమనార్హం.
భారతదేశంలో మహిళలకు గౌరవం లేదని చెబుతూ పూర్ణియా ఎంపీ ఈ అభ్యంతరకర ప్రకటన చేశారు.
పప్పు యాదవ్ ఏమన్నారంటే: “లోక్సభలో మహిళా గౌరవం గురించి మాట్లాడటం ఒక హాస్యాస్పదమైన విషయం. భారత్లో మహిళలను దేవతలుగా చూస్తాం కానీ, వారికి ఎప్పుడూ గౌరవం లభించదు. గృహ హింసకు ఎవరు పాల్పడుతున్నారు? మహిళలపై గద్ద దృష్టి ఎవరికి ఉంది? రాజకీయ నాయకులకే! నాయకుల గదుల్లోకి వెళ్లకుండా 90% మంది మహిళలు రాజకీయం చేయలేరు” అని పప్పు యాదవ్ వివాదాస్పద వ్యాఖ్యలు చేశారు. నేడు రాజకీయ నాయకుల సీసీటీవీ ఫుటేజీలు బయటపడుతున్నాయని, మహిళలను దోచుకోవడం ఒక సంస్కృతిగా మారిందని ఆయన ఆరోపించారు.
తీవ్ర స్థాయిలో ధ్వజమెత్తిన బీజేపీ, కాంగ్రెస్: పప్పు యాదవ్ వ్యాఖ్యలపై రాజకీయ పక్షాలు తీవ్రంగా మండిపడుతున్నాయి.
- బీజేపీ నేత తుహిన్ సిన్హా: “సొంతంగా ఎదిగిన మహిళా నాయకులను అవమానించడం హేయమైన చర్య. ప్రియాంకా గాంధీ ఇటువంటి నాయకుడిని దూరం పెడుతుందా లేక మద్దతు ఇస్తుందా?” అని ప్రశ్నించారు.
- షెహజాద్ పూనావాలా: రాహుల్ గాంధీ కనుసన్నల్లోనే పప్పు యాదవ్ ఇటువంటి వ్యాఖ్యలు చేశారని, ఇది కాంగ్రెస్ పార్టీ నీచమైన ఆలోచనా ధోరణికి నిదర్శనమని విమర్శించారు.
- కాంగ్రెస్ నేత షమా మొహమ్మద్: “ఈ థర్డ్ క్లాస్ ఎంపీకి కాంగ్రెస్ పార్టీ ఎప్పటికీ మద్దతు ఇవ్వకూడదు. కష్టపడి పైకి వచ్చిన మహిళా నాయకులు ఎందరో ఉన్నారు. ఆయన వెంటనే క్షమాపణ చెప్పాలి” అని డిమాండ్ చేశారు.
నోటీసులు జారీ చేసిన మహిళా కమిషన్: పప్పు యాదవ్ వ్యాఖ్యలను బీహార్ రాష్ట్ర మహిళా కమిషన్ సుమోటోగా స్వీకరించింది. ఆయనకు షోకాజ్ నోటీసులు జారీ చేస్తూ, ఇటువంటి వ్యాఖ్యలు ఎందుకు చేశారో వివరణ ఇవ్వాలని ఆదేశించింది. అంతేకాకుండా, ఆయన లోక్సభ సభ్యత్వాన్ని ఎందుకు రద్దు చేయకూడదో తెలపాలంటూ మూడు రోజుల గడువు విధించింది.