న్యూ ఢిల్లీ: పశ్చిమ బెంగాల్ అసెంబ్లీ ఎన్నికలు ఏప్రిల్ 23 నుండి ప్రారంభం కానున్నాయి. మొదటి దశ పోలింగ్కు ముందు, తృణమూల్ కాంగ్రెస్ (TMC) నేత ఒకరు ఓటర్లను బహిరంగంగా బెదిరిస్తున్న వీడియో సోషల్ మీడియాలో వైరల్ అవుతోంది. ఈ వీడియో చూసిన నెటిజన్లు తీవ్ర ఆగ్రహం వ్యక్తం చేస్తున్నారు.
ఘటన ఎక్కడ జరిగింది? నివేదికల ప్రకారం, ఈ ఘటన బీర్భూమ్ జిల్లాలోని లాబ్పూర్ అసెంబ్లీ నియోజకవర్గ పరిధిలోని సౌగ్రామ్లో జరిగింది. వైరల్ అవుతున్న వీడియోలో స్థానిక టీఎంసీ నేత దాలీమ్ షేక్, “ఓట్లు గనుక వేరే పార్టీకి పడితే, వారిని ముక్కలు ముక్కలుగా నరికేస్తాం” అని అనడం స్పష్టంగా వినిపిస్తోంది. ఈ ఘటనపై భారత ఎన్నికల సంఘానికి (ECI) భారతీయ జనతా పార్టీ (BJP) ఇప్పటికే ఫిర్యాదు చేసింది.
టీఎంసీ నేత బెదిరింపులపై బీజేపీ ఆందోళన: సౌగ్రామ్లో జరిగిన ఒక పార్టీ సమావేశంలో దాలీమ్ షేక్ గ్రామస్థులను బెదిరించినట్లు సమాచారం. ప్రజలు ఏ గుర్తుకు ఓటు వేశారో ఆ ఓటర్ల జాబితా మొత్తం తనకు అందుతుందని, టీఎంసీ కాకుండా వేరే పార్టీకి ఓటు వేసినట్లు తెలిస్తే తీవ్ర పరిణామాలు ఉంటాయని ఆయన హెచ్చరించారు. సున్నితమైన ప్రాంతంగా పిలువబడే బీర్భూమ్ జిల్లాలో, ఎన్నికలకు సరిగ్గా కొన్ని గంటల ముందు ఇలాంటి వ్యాఖ్యలు చేయడం ఓటర్లలో భయాందోళనలు రేకెత్తిస్తోంది.
లాబ్పూర్ బీజేపీ అభ్యర్థి దేబాసిస్ ఓజా మాట్లాడుతూ, “పోలీసులు ఇప్పుడు టీఎంసీ కోసం పనిచేస్తున్నారు. ఇటువంటి బెదిరింపుల తర్వాత ప్రజలు నిర్భయంగా ఓటు వేయడానికి ఎలా బయటకు వస్తారు? ఈ పరిస్థితుల్లో పారదర్శకమైన ఎన్నికలు నిర్వహించడం అసాధ్యం” అని మండిపడ్డారు.
భారీగా బలగాల మోహరింపు: బీజేపీ ఫిర్యాదు నేపథ్యంలో ఎన్నికల సంఘం అప్రమత్తమైంది. పశ్చిమ బెంగాల్ ఎన్నికల కోసం రికార్డు స్థాయిలో 2.4 లక్షల మంది సెంట్రల్ ఆర్మ్డ్ పోలీస్ ఫోర్స్ (CAPF) సిబ్బందిని (2,400 కంపెనీలు) మోహరించారు. అంటే మొదటి దశలో ప్రతి 140 మంది ఓటర్లకు ఒక కేంద్ర భద్రతా సిబ్బంది అందుబాటులో ఉంటారు.