బెళగావి: ఇంట్లో నైటీ ధరించడంపై తలెత్తిన వివాదం చిలికి చిలికి గాలివానలా మారి, ఒక వ్యక్తి తన భార్యపై కిరోసిన్ పోసి నిప్పంటించిన దిగ్భ్రాంతికర ఘటన కర్ణాటకలో చోటుచేసుకుంది. ఖానాపూర్ తాలూకాలోని నందగడ్ గ్రామంలో మంగళవారం రాత్రి ఈ ఘాతుకం జరిగింది.
కృష్ణ పాటిల్ (34) అనే వ్యక్తి తన భార్య మంజుల పాటిల్ (32)పై ఈ క్రూరమైన దాడికి పాల్పడ్డాడు.
పోలీసులు తెలిపిన వివరాల ప్రకారం: మంజుల ఇంట్లో శారీకి బదులుగా నైటీ ధరించడాన్ని కృష్ణ పాటిల్ మొదటి నుండీ తీవ్రంగా వ్యతిరేకిస్తున్నాడు. ఇదే విషయంపై దంపతుల మధ్య తరచూ గొడవలు జరుగుతుండేవి. మంగళవారం రాత్రి కూడా వీరిద్దరి మధ్య ఇదే అంశంపై వాగ్వాదం జరిగింది. ఈ క్రమంలో తీవ్ర ఆగ్రహానికి లోనైన కృష్ణ, భార్యపై కిరోసిన్ పోసి నిప్పంటించాడు.
ఈ దాడిలో మంజుల శరీరంలో 80 శాతం వరకు కాలిపోయింది. ప్రాణాపాయ స్థితిలో ఉన్న ఆమెను తొలుత బెళగావి ఇన్స్టిట్యూట్ ఆఫ్ మెడికల్ సైన్సెస్లో చేర్చారు. అయితే పరిస్థితి విషమించడంతో మెరుగైన చికిత్స కోసం గోవాలోని ఆసుపత్రికి తరలించారు. ఈ ఘటనపై నందగడ్ పోలీసులు కేసు నమోదు చేసి, నిందితుడు కృష్ణ పాటిల్ను అరెస్ట్ చేశారు. కేసుపై తదుపరి విచారణ కొనసాగుతోందని ఉన్నత పోలీసు అధికారులు వెల్లడించారు.