కండోమ్ ధరలు ప్రియం: అమెరికా మరియు ఇరాన్ మధ్య ఉద్రిక్తతల ప్రభావం ఇప్పటి వరకు కేవలం గ్యాస్ మరియు పెట్రోలియం ఉత్పత్తులకే పరిమితమైంది. కానీ ఈ యుద్ధం వల్ల సామాన్యుల కిచెన్ బడ్జెట్ మాత్రమే కాకుండా, కుటుంబ నియంత్రణ ప్రణాళికలు కూడా తలకిందులయ్యే అవకాశం ఉంది. ఈ విషయాన్ని స్వయంగా ప్రపంచంలోనే అతిపెద్ద కండోమ్ తయారీ సంస్థ ‘కారెక్స్’ (Karex) వెల్లడించింది.
యుద్ధం వల్ల పెరగనున్న ధరలు: ఇరాన్ ఉద్రిక్తతల వల్ల మలేషియాకు చెందిన కారెక్స్ కంపెనీ ఇబ్బందుల్లో పడింది. ఈ సంస్థ ఏటా 500 కోట్ల కండోమ్లను ఉత్పత్తి చేస్తూ 130 దేశాలకు ఎగుమతి చేస్తుంది. అయితే, గ్లోబల్ సప్లై చైన్ (సరఫరా గొలుసు) దెబ్బతినడంతో కండోమ్ ధరలను 20 నుండి 30 శాతం వరకు పెంచేందుకు కంపెనీ సిద్ధమవుతోంది. హోర్ముజ్ జలసంధిలో అమెరికా-ఇరాన్ల నాకేబందీ (దిగ్బంధం) కారణంగా, కండోమ్ తయారీలో వాడే కొన్ని ప్రత్యేక ముడి పదార్థాల సరఫరా నిలిచిపోవడమే దీనికి ప్రధాన కారణం.
డిమాండ్ పెంపు – స్టాక్ నిలిపివేత: రవాణా ఖర్చులు పెరగడం మరియు డెలివరీలో జాప్యం కారణంగా కండోమ్లకు డిమాండ్ పెరిగిందని, చాలా మంది డీలర్ల వద్ద స్టాక్ అయిపోతోందని కంపెనీ సీఈఓ గో మియా కియట్ (Goh Miah Kiat) తెలిపారు. పరిస్థితి చాలా తీవ్రంగా ఉందని, పెరిగిన ఖర్చుల భారాన్ని వినియోగదారులపై వేయక తప్పడం లేదని ఆయన స్పష్టం చేశారు.
కారెక్స్ సంస్థ కేవలం కండోమ్లే కాకుండా పర్సనల్ లూబ్రికెంట్స్, గ్లౌజులు, మెడికల్ క్యాథెటర్లను కూడా తయారు చేస్తుంది. ఈ సంస్థకు చెందిన వన్ (ONE), ట్రస్టెక్స్, కారెక్స్, పసాంటే వంటి బ్రాండ్లు భారత్ సహా అనేక దేశాల్లో అమ్ముడవుతాయి. ఈ పరిస్థితి ఇలాగే కొనసాగితే ధరలు పెరగడమే కాకుండా, మార్కెట్లో కండోమ్ల కొరత కూడా ఏర్పడవచ్చు.
ముడి పదార్థాల సరఫరాకు ఆటంకం: సింథటిక్ రబ్బరు, నైట్రైల్, సిలికాన్ ఆయిల్ మరియు ప్యాకేజింగ్ మెటీరియల్ వంటి పెట్రోకెమికల్ ఆధారిత ముడి పదార్థాలు మధ్యప్రాచ్యం (Middle East) నుండి సరఫరా అవుతాయి. యుద్ధం వల్ల వీటి ధరలు అమాంతం పెరిగాయి. మరోవైపు హోర్ముజ్ జలసంధి మూసివేత వల్ల ముడి చమురుతో పాటు ప్లాస్టిక్ మరియు ఇతర పెట్రోలియం ఉప ఉత్పత్తుల తయారీపై కూడా ప్రభావం పడింది. భారీ ఎత్తున స్టాక్ ఓడల మీద ఉన్నప్పటికీ, అవి గమ్యస్థానాలకు చేరుకోవడంలో జాప్యం జరుగుతోందని గో వెల్లడించారు.