ఘజియాబాద్: ఉత్తరప్రదేశ్లోని ఘజియాబాద్ నుండి ఒక విస్తుపోయే ఉదంతం వెలుగులోకి వచ్చింది. ఇక్కడ ఒక యువకుడికి కోతి కరిచిన ఆరు నెలల తర్వాత అకస్మాత్తుగా రేబిస్ లక్షణాలు కనిపించడం మొదలయ్యాయి. ఆ యువకుడి పరిస్థితి ఎంతలా విషమించిందంటే.. అతను కోతిలాగా ప్రవర్తించడం చూసి కుటుంబ సభ్యులు మరియు వైద్యులు సైతం షాక్కు గురయ్యారు.
దీనాగఢికి చెందిన 28 ఏళ్ల యువకుడిని సుమారు ఆరు నెలల క్రితం ఒక కోతి కరిచింది. ఆ సమయంలో అతను ఈ విషయాన్ని సీరియస్ గా తీసుకోలేదు మరియు ఎటువంటి యాంటీ-రేబిస్ వ్యాక్సిన్ తీసుకోలేదు. సమయం గడిచేకొద్దీ అంతా బానే ఉందని అనుకున్నారు, కానీ ఇటీవల అతని ప్రవర్తనలో అకస్మాత్తుగా మార్పు రావడం మొదలైంది. కుటుంబ సభ్యుల కథనం ప్రకారం.. ఆ యువకుడు అసాధారణ రీతిలో స్పందించడం ప్రారంభించాడు.
కోతి లాగే అరుస్తున్నాడు: పరిస్థితి చేయిదాటడంతో కుటుంబ సభ్యులు వెంటనే అతడిని ఆసుపత్రికి తరలించారు. అక్కడ ఎమర్జెన్సీ మెడికల్ ఆఫీసర్ డాక్టర్ ఖుష్బూ సింగ్ ఆ యువకుడిని పరీక్షించారు. ఆ యువకుడి ప్రవర్తన ఏమాత్రం సాధారణంగా లేదని ఆమె తెలిపారు. అతను కోతిలాగా ఒళ్లంతా గోక్కుంటున్నాడని, టీ లేదా నీళ్లు ఇచ్చినా గ్లాసుతో తాగకుండా.. అరచేతిలో పోసుకుని తాగుతున్నాడని చెప్పారు. అంతేకాకుండా కోతి లాగే వింత శబ్దాలు చేస్తున్నాడని పేర్కొన్నారు. ఈ లక్షణాలను బట్టి వైద్యులు అది రేబిస్ అని అనుమానించారు.
కోతి కరిచిన తర్వాత తాము ఎటువంటి చికిత్స లేదా టీకాలు తీసుకోలేదని ఆ యువకుడి భార్య వైద్యులకు వివరించారు. ఆ అశ్రద్ధ కాస్తా ఇప్పుడు ప్రాణాపాయ స్థితికి దారితీసింది. వైద్యులు ఆలస్యం చేయకుండా మెరుగైన చికిత్స కోసం అతడిని జీటీబీ (GTB) ఆసుపత్రికి రిఫర్ చేశారు. ప్రస్తుతం అక్కడ అతనికి ప్రత్యేక చికిత్స అందుతోంది.
కుటుంబ సభ్యులకు యాంటీ-రేబిస్ వ్యాక్సిన్: జాగ్రత్త చర్యగా వైద్యులు ఆ యువకుడితో కాంటాక్ట్ లో ఉన్న అతని తండ్రి, సోదరుడు, భార్య మరియు ఏడాది వయసున్న బిడ్డకు కూడా యాంటీ-రేబిస్ వ్యాక్సిన్ వేశారు. ఆసుపత్రి వర్గాల సమాచారం ప్రకారం.. సకాలంలో చికిత్స అందడంతో యువకుడి ఆరోగ్యం ప్రస్తుతం స్వల్పంగా మెరుగుపడుతోంది, అయినప్పటికీ అతను ఇంకా నిఘాలోనే ఉన్నాడు.
ఈ ఘటనపై నోడల్ అధికారి డాక్టర్ ఆర్.కె. గుప్తా స్పందిస్తూ.. జంతువులు కరిచినప్పుడు అస్సలు తేలికగా తీసుకోవద్దని ప్రజలకు విజ్ఞప్తి చేశారు. రేబిస్ ప్రాణాంతకమైన వ్యాధి అని, కానీ సకాలంలో వ్యాక్సిన్ తీసుకుంటే దీనిని పూర్తిగా నివారించవచ్చని ఆయన చెప్పారు. కుక్క, కోతి లేదా మరే ఇతర జంతువు కరిచినా వెంటనే సమీపంలోని ఆరోగ్య కేంద్రానికి వెళ్లి టీకాలు వేయించుకోవాలని సూచించారు.