చెన్నై: తమిళనాడు అసెంబ్లీ ఎన్నికల ఫలితాలు విడుదలయ్యే మే 4వ తేదీన ‘తమిళగ వెట్రి కళగం’ (TVK) అధ్యక్షుడు విజయ్ ఆస్ట్రేలియాకు వెళ్లేందుకు టికెట్ బుక్ చేసుకున్నట్లు సమాచారం అందుతోంది. ఒకవేళ ఎన్నికల ఫలితాల్లో టీవీకే ఆశించిన స్థాయిలో రాణించకపోతే, వెంటనే విదేశాలకు వెళ్లేలా విజయ్ ప్లాన్ చేసుకున్నారని రాజకీయ వర్గాల్లో చర్చ నడుస్తోంది.
తమిళనాడు అసెంబ్లీ ఎన్నికల పోలింగ్ మొన్నటితో ముగిసింది. రాష్ట్రవ్యాప్తంగా ఉన్న 234 నియోజకవర్గాల్లో శాంతియుతంగా పోలింగ్ జరగ్గా, మొత్తం 85.15% ఓటింగ్ నమోదైనట్లు ఎన్నికల కమిషన్ ప్రకటించింది. అయితే, ప్రతి నియోజకవర్గానికి సంబంధించిన అధికారిక ఓటింగ్ వివరాలను కమిషన్ ఇంకా పూర్తిగా వెల్లడించలేదు.
తమిళనాడు రాజకీయ చరిత్రలో తొలిసారిగా ఓటింగ్ శాతం 80% దాటడంతో రాజకీయ పార్టీల మధ్య తీవ్ర ఉత్కంఠ నెలకొంది. పోలింగ్ ముగియడంతో కీలక నేతలంతా విహారయాత్రలకు సిద్ధమయ్యారు. డిప్యూటీ సీఎం ఉదయనిధి స్టాలిన్ ఇప్పటికే దుబాయ్లో ఉండగా, సీఎం స్టాలిన్ ఈరోజు కొడైకెనాల్ వెళ్తున్నారు. అదేవిధంగా డీఎంకే, ఏఐఏడీఎంకే ముఖ్య నేతలు కూడా పర్యటనలకు ప్లాన్ చేసుకున్నారు.
ఈ నేపథ్యంలో టీవీకే అధినేత విజయ్ ప్లాన్ ఏంటన్నది అందరిలోనూ ఆసక్తిని రేకెత్తిస్తోంది. సాధారణంగా ప్రతి సినిమా షూటింగ్ ముగిసిన తర్వాత విజయ్ విదేశాలకు వెళ్లడం అలవాటు. కానీ ఎన్నికలు ముగిసినప్పటికీ ఆయన ఇంకా ఎక్కడికీ వెళ్లలేదు. దీనిపై విచారించగా, ఆయన విహారయాత్రకు సిద్ధమయ్యారని, అయితే అది ఫలితాల రోజే ఉంటుందని తెలిసింది. అంటే మే 4వ తేదీన ఆస్ట్రేలియా వెళ్లేందుకు విజయ్ టికెట్లు బుక్ చేసుకున్నారని సమాచారం.
అయితే ఈ పర్యటన ఎన్నికల ఫలితాలపైనే ఆధారపడి ఉంటుందని చెబుతున్నారు. ఒకవేళ ఎన్నికల ఫలితాల్లో టీవీకే మెజారిటీ సాధించి ప్రభుత్వం ఏర్పాటు చేసే అవకాశం ఉంటే విజయ్ ఈ పర్యటనను విరమించుకుంటారు. ఒకవేళ ఫలితాలు ఆశాజనకంగా లేకపోతే వెంటనే ఆస్ట్రేలియాకు ఎగిరిపోతారని తెలుస్తోంది. నిన్ననే విజయ్ తన పార్టీ ముఖ్య నేతలు బుస్సీ ఆనంద్, ఆదవ్ అర్జునతో చర్చలు జరిపారు. ఎన్నికల సమయంలో పార్టీ కార్యకర్తలు ఎదుర్కొన్న ఇబ్బందుల గురించి ఆయన ఆరా తీసినట్లు సమాచారం.