ప్రస్తుతం ఓటీటీలో వేల సంఖ్యలో సినిమాలు అందుబాటులో ఉన్నాయి. మనకు నచ్చిన వాటిని ఎంపిక చేసుకుని ఎంజాయ్ చేయవచ్చు. అయితే, ఏ సినిమా చూడాలి అని నిర్ణయించుకోవడమే ప్రేక్షకులకు పెద్ద తలనొప్పిగా మారింది. చాలామంది కేవలం సినిమాను సెలెక్ట్ చేయడానికే గంటల తరబడి సమయం వృథా చేస్తున్నారు. మీ ఆ కన్ఫ్యూజన్ను దూరం చేస్తూ, ఈ వారం ఓటీటీలో తప్పక చూడాల్సిన ఒక క్రైమ్ థ్రిల్లర్ గురించి ఇక్కడ తెలుసుకుందాం.
దేవీ ప్రసాద్ రెడ్డి దర్శకత్వంలో కన్నడంలో విడుదలైన చిత్రం ‘సెకండ్ కేస్ ఆఫ్ సీతారాం’ (Second Case of Seetharama). ఈ సినిమాలో విజయ్ రాఘవేంద్ర, ప్రదీప్, ఉష తదితరులు నటించారు. ప్రస్తుతం ఈ చిత్రం అమెజాన్ ప్రైమ్ ఓటీటీలో అందుబాటులో ఉంది.
కథాంశం: కర్ణాటకలోని ఉడుపి పోలీస్ స్టేషన్లో పోలీస్ ఆఫీసర్గా పనిచేస్తుంటాడు విజయ్ రాఘవేంద్ర. ఒకే తరహాలో (Pattern) జరుగుతున్న వరుస హత్యల (Serial Killings) కేసును అతను విచారిస్తుంటాడు. హత్యకు గురైన వారందరి వయస్సు 50 ఏళ్ల పైబడిన వారే. హంతకుడు ఎవరో తెలియక పోలీసులు తలలు పట్టుకుంటారు. అయితే, ప్రతి హత్య జరిగిన చోట హంతకుడు ఒక ‘వీణ బొమ్మ’ను ఆధారంగా వదిలి వెళ్తుంటాడు. ఆ హంతకుడు ఎవరు? అతను ఈ హత్యలు ఎందుకు చేస్తున్నాడు? పోలీసులు అతడిని ఎలా పట్టుకున్నారు? అనే అంశాలను ఎన్నో మలుపులతో ఈ సినిమాలో చూపించారు.
సినిమా ఎలా ఉందంటే: తమిళ చిత్రం ‘పోర్ త్రిల్లీల్’ (Por Thozhil) తరహాలోనే, గతంలో జరిగిన ఒక సీరియల్ కిల్లింగ్ ప్యాటర్న్ మళ్ళీ మొదలైతే ఎలా ఉంటుంది అనే కోణంలో ఈ సినిమా సాగుతుంది. అక్కడక్కడ కథ కొంచెం నెమ్మదించినట్లు అనిపించినా, చివరి 20 నిమిషాల వరకు హంతకుడు ఎవరనే సస్పెన్స్ మాత్రం తగ్గదు.
ప్లస్ పాయింట్స్: ఈ సినిమాకు అతిపెద్ద బలం ఏమిటంటే, ప్రతి సీన్ చూస్తున్నప్పుడు ‘ఇతనే హంతకుడు’ అని మనం నమ్మేలా దర్శకుడు కథను నడిపించాడు. కానీ ఆ తర్వాత ఇచ్చే ట్విస్ట్ మన ఊహకు అందదు. ఇందులో పెద్దగా పరిచయం ఉన్న నటులు లేకపోయినా, ప్రతి పాత్ర మన మనసులో ముద్ర వేస్తుంది. మేకింగ్ పరంగా ఇది ఒక మలయాళ క్రైమ్ థ్రిల్లర్ లాగా అనిపిస్తుంది. సినిమాలో అనవసరమైన ప్రేమ కథలు, పాటలు లేకపోయినా.. ప్రతి సన్నివేశంలో ఒక ఎమోషన్ ఉంటుంది, అది ప్రేక్షకులను సినిమాతో కనెక్ట్ అయ్యేలా చేస్తుంది.