నటి ఎస్తర్ అనిల్ లండన్ స్కూల్ ఆఫ్ ఎకనామిక్స్ నుండి పోస్ట్ గ్రాడ్యుయేషన్ పూర్తి చేసుకుని తిరిగి వచ్చారు. ఈ సందర్భంగా ‘ది క్యూ స్టూడియో’కు ఇచ్చిన ఇంటర్వ్యూలో ఆమె యూకే జీవితం గురించి, తన స్నేహితురాలు సానియా అయ్యప్పన్ గురించి జరిగిన ఒక వివాదంపై సంచలన వ్యాఖ్యలు చేశారు.
సానియాను కించపరిచిన కథనాలు: లండన్లో ఎస్తర్ చదువు పూర్తి చేసిన సమయంలో ఒక ప్రముఖ వార్తా సంస్థ ఆమెను పొగుడుతూ, తన సహచర నటి సానియా అయ్యప్పన్ను తక్కువ చేసి ఒక కథనం రాసింది. సానియా లండన్లో జాతి వివక్ష (Racism) ఎదుర్కొని, అక్కడ ఉండలేక భయపడి వెనక్కి వచ్చేసిందని, ఎస్తర్ మాత్రం అక్కడ గొప్పగా విజయం సాధించిందని ఆ కథనం సారాంశం. దీనిపై ఎస్తర్ స్పందిస్తూ.. “ఒకరిని తక్కువ చేసి నన్ను పొగడటంలో అర్థం లేదు. సానియాకు స్టార్డమ్ లేదని, ఆమె అక్కడి పరిస్థితులకు తట్టుకోలేక పారిపోయి వచ్చిందని రాయడం నన్ను చాలా బాధించింది” అని అన్నారు.
స్నేహమే ముఖ్యం: ఈ వార్త వల్ల తమ మధ్య దూరం పెరగకూడదని ఎస్తర్ వెంటనే సానియాకు మెసేజ్ చేశారట. అయితే సానియా చాలా పరిణతితో స్పందించిందని, బయటి వ్యక్తుల వల్లే నటీనటుల మధ్య విభేదాలు వస్తాయని, తాము ఇప్పటికీ మంచి స్నేహితులమని ఎస్తర్ స్పష్టం చేశారు.
యూకే జీవితం – భ్రమలు వద్దు: “ఫొటోల్లో చూసే యూకే జీవితం వేరు, అక్కడి అసలు జీవితం వేరు” అని ఎస్తర్ హెచ్చరించారు. “నాకు అక్కడ మంచి అనుభవమే ఎదురైంది. నేను బాగా రీసెర్చ్ చేసి వెళ్లాను కాబట్టి ఇబ్బంది పడలేదు. కానీ సోషల్ మీడియాలో ఫొటోలు చూసి లండన్ లైఫ్ అదిరిపోతుందని వచ్చే మలయాళీ పిల్లలు ఎంతో మంది ఇబ్బందులు పడటం నేను చూశాను. కనీసం 10 శాతం కూడా రీసెర్చ్ చేయకుండా వెళ్తే అక్కడ ఇరుక్కుపోవడం ఖాయం” అని ఆమె తెలిపారు.
రేసిజం మరియు సంస్కృతి: యూకేలో జాతి వివక్ష (Racism) ఖచ్చితంగా ఉందని, అయితే తాను వ్యక్తిగతంగా దానికి పెద్దగా గురికాలేదని ఆమె చెప్పారు. “మనం అక్కడి సంస్కృతిని గౌరవించాలి. మనం రెండో తరగతి పౌరులుగా అక్కడికి వెళ్తాము. ఇక్కడ మనం సరదాగా చేసే పనులు, మాట్లాడే మాటలు అక్కడ వారికి కోపం తెప్పించవచ్చు. ఉదాహరణకు, అక్కడ చెరువుల్లో చేపలు పట్టడం నిషేధం, కానీ భారతీయులు వెళ్లి చేపలు పడుతుంటారు. అలాంటి పనులు వారిని రెచ్చగొడతాయి” అని ఎస్తర్ వివరించారు.