వయస్సు 30 లేదా 35 దాటగానే “లైఫ్ ముగిసిపోయింది, ఇకపై ఏమీ చేయలేము” అని నిర్ణయించుకునే వారు చాలా మంది ఉంటారు. చేతిలో బ్యాంకు బ్యాలెన్స్ లేదు, సమాజంలో ఒక హోదా లేదు అని లోలోపల నిరాశ చెందడం సహజం.
కానీ ఆచార్య చాణక్యుడి నీతి మరియు ప్రపంచ ప్రసిద్ధ విజేతల చరిత్రను చూస్తే అసలు చిత్రం వేరేలా ఉంది. దీనికి సంబంధించిన ఒక ప్రత్యేక కథనం ఇక్కడ ఉంది.
అనుభవమే అసలైన శక్తి! 20 ఏళ్ల యువకుడిలో ఉండే ఉత్సాహం మీలో లేకపోవచ్చు, కానీ ఆ యువకుడికి లేని ‘అనుభవం’, ‘పరిణతి’ మీలో ఉన్నాయి. చాణక్యుడు చెప్పినట్లుగా.. యుద్ధం గెలవాలంటే కేవలం ఆయుధాలు ఉంటే సరిపోదు, వాటిని ఉపయోగించే ట్రిక్కులు కూడా తెలిసి ఉండాలి. గత 30 ఏళ్లలో మీరు ఎదుర్కొన్న అవమానాలు, ఓటములే మీ తదుపరి విజయానికి కావాల్సిన ఇంధనం. ఆలీబాబా సంస్థ వ్యవస్థాపకుడు జాక్ మా 35 ఏళ్ల వయస్సు వరకు కేఎఫ్సీలో చిన్న ఉద్యోగానికి కూడా రిజెక్ట్ అయ్యారనే విషయం గుర్తుంచుకోండి.
వయస్సు కేవలం ఒక సంఖ్య మాత్రమే! మెక్డొనాల్డ్స్ సామ్రాజ్యాన్ని నిర్మించిన రే క్రాక్ తన 52వ ఏట వ్యాపారాన్ని ప్రారంభించారు. అంతేకాదు, మన దేశ గర్వకారణం మేరీ కోమ్ ఇద్దరు పిల్లలు పుట్టిన తర్వాత, అంటే తన 35వ ఏట వరల్డ్ ఛాంపియన్గా నిలిచి చరిత్ర సృష్టించారు. సాధించాలనే సంకల్పం ఉంటే వయస్సుతో సంబంధం లేదని వీరంతా నిరూపించారు.
సోమరితనాన్ని వదలండి, రిస్క్ తీసుకోండి! మీ అతిపెద్ద శత్రువు ఎవరో తెలుసా? మీ లోపల ఉన్న సోమరితనం మరియు “రేపు చేద్దాం” అనే ఆలోచనా విధానం. చాణక్యుడి ప్రకారం, సోమరితనం మనిషిని జీవించి ఉండగానే చంపేస్తుంది. ఈ వయస్సులో మనకు ‘ఓడిపోతామనే భయం’ ఎక్కువగా ఉంటుందని ‘మోటివేషనల్ మంత్ర’ కన్నడ యూట్యూబ్ ఛానెల్ తెలిపింది. కానీ రిస్క్ తీసుకోకపోవడమే జీవితంలో అతిపెద్ద రిస్క్. లెక్కించిన రిస్క్ (Calculated Risk) తీసుకోండి, ప్లాన్-బి సిద్ధంగా ఉంచుకోండి. గెలిస్తే చరిత్ర సృష్టిస్తారు, ఓడిపోతే ఒక పాఠం నేర్చుకుంటారు.
అప్డేట్ కాకపోతే అవుట్డేట్ అవుతారు! “నాకు అంతా తెలుసు” అనే అహాన్ని వీడి మార్కెట్కు తగ్గట్లుగా కొత్త నైపుణ్యాలు (Skills) నేర్చుకోవడం అలవాటు చేసుకోండి. వేరా వాంగ్ అనే మహిళ తన 40వ ఏట డిజైనింగ్ నేర్చుకుని ప్రపంచ ప్రసిద్ధురాలయ్యారు. ఇవాల్టి డిజిటల్ యుగంలో నేర్చుకోవడానికి కావాల్సింది కేవలం ఇంటర్నెట్ మరియు నేర్చుకోవాలనే పట్టుదల మాత్రమే.
ఆర్థిక క్రమశిక్షణ మరియు సానుకూల వ్యక్తుల స్నేహం: 35 ఏళ్ల తర్వాత మీ ప్లానింగ్ చాలా స్మార్ట్గా ఉండాలి. అనవసరపు ఖర్చులకు బ్రేక్ వేసి, ఇన్వెస్ట్మెంట్ (పెట్టుబడుల) వైపు దృష్టి పెట్టండి. వారెన్ బఫెట్ తన 50 ఏళ్ల తర్వాతే నిజమైన ధనవంతుడు అయ్యారనేది మర్చిపోవద్దు. అలాగే మిమ్మల్ని తక్కువ చేసి చూసేవారిని మీ జీవితం నుండి తొలగించి, మిమ్మల్ని ప్రోత్సహించే సానుకూల వ్యక్తులతో స్నేహం చేయండి.
గుర్తుంచుకోండి.. ఆట ఇంకా ముగియలేదు, ఎందుకంటే మీరు ఇంకా మైదానంలోనే ఉన్నారు. 30 ఏళ్లు అనేది జీవితానికి ‘ఎండ్ కార్డ్’ కాదు, ఇది మీ సెకండ్ ఇన్నింగ్స్ గ్రాండ్ ఓపెనింగ్ కావాలి.