కోహినూర్ వజ్రం: బ్రిటన్ రాజు కింగ్ చార్లెస్ III మరియు రాణి కెమిల్లా ప్రస్తుతం అమెరికాలో అధికారిక పర్యటనలో ఉన్నారు. బుధవారం నాడు వారు న్యూయార్క్లోని ‘వన్ వరల్డ్ ట్రేడ్ సెంటర్’ వద్ద సెప్టెంబర్ 11 దాడుల 25వ వార్షికోత్సవ స్మారకార్థం చేరుకున్నప్పుడు, అక్కడ వారికి న్యూయార్క్ మేయర్ జోహ్రాన్ మమ్దానీతో ముఖాముఖి జరిగింది.
సాధారణంగా ఇలాంటి భేటీలు కేవలం అధికారిక మర్యాదలకు మాత్రమే పరిమితమవుతాయి. కానీ మేయర్ జోహ్రాన్ మమ్దానీ ఇచ్చిన ఒక ప్రకటన భారత్ మరియు బ్రిటన్ మధ్య చాలా కాలంగా ఉన్న చారిత్రక వివాదాన్ని మళ్ళీ తెరపైకి తెచ్చింది. తనకు కింగ్ చార్లెస్తో వ్యక్తిగతంగా మాట్లాడే అవకాశం వస్తే, కోహినూర్ వజ్రాన్ని భారత్కు తిరిగి ఇచ్చేయాలని తాను కోరుతానని ఆయన స్పష్టంగా చెప్పారు.
‘కోహినూర్ కేవలం వజ్రం మాత్రమే కాదు, అది భారత్ చరిత్ర’ బుధవారం జరిగిన విలేకరుల సమావేశంలో రాజుతో మీరు ఏం మాట్లాడతారని మేయర్ మమ్దానీని ప్రశ్నించగా, ఆయన ఎటువంటి మొహమాటం లేకుండా నేరుగా ఈ విషయాన్ని ప్రస్తావించారు. “కోహినూర్ కేవలం ఒక వజ్రం మాత్రమే కాదు, అది భారత చరిత్రకు, గర్వానికి మరియు బ్రిటిష్ పాలనలో జరిగిన అన్యాయానికి ప్రతీక” అని ఆయన అన్నారు.
జోహ్రాన్ మమ్దానీకి భారతదేశంతో లోతైన సంబంధం ఉంది. ఆయన తల్లి ప్రముఖ చిత్రనిర్మాత మీరా నాయర్. కింగ్ చార్లెస్ మరియు రాణి కెమిల్లా 9/11 మెమోరియల్ వద్ద నివాళులు అర్పించడానికి వెళ్ళినప్పుడు, న్యూయార్క్ మరియు న్యూజెర్సీ గవర్నర్లతో పాటు మమ్దానీ కూడా అక్కడ ఉన్నారు.
కోహినూర్ వజ్రం చరిత్ర: కోహినూర్ వజ్రం భారతదేశంలోని గోల్కొండ గనుల నుండి లభించింది. శతాబ్దాల పాటు ఇది మొఘల్ మరియు సిక్కు పాలకుల వద్ద ఉంది. 1849లో రెండో ఆంగ్లో-సిక్కు యుద్ధం తర్వాత, బ్రిటిష్ వారు 10 ఏళ్ల మహారాజా దలీప్ సింగ్తో కుదుర్చుకున్న ఒప్పందం ద్వారా ఈ వజ్రాన్ని స్వాధీనం చేసుకున్నారు. ప్రస్తుతం 105.6 క్యారెట్ల బరువున్న ఈ వజ్రం బ్రిటిష్ రాజ కిరీటంలో భాగంగా ఉంది మరియు దీనిని ‘టవర్ ఆఫ్ లండన్’లో ఉంచారు.