పశ్చిమ బెంగాల్ అసెంబ్లీ ఎన్నికలు 2026 చివరి దశ పోలింగ్ ముగిసిన తర్వాత పలు సంస్థలు ఎగ్జిట్ పోల్ ఫలితాలను విడుదల చేశాయి. కానీ, అత్యంత నమ్మదగినదిగా పేరున్న ‘యాక్సిస్ మై ఇండియా’ మాత్రం బెంగాల్ సర్వేను విడుదల చేయలేదు.
ఈ విషయంపై ఆ సంస్థ అధినేత ప్రదీప్ గుప్తా స్పందిస్తూ.. అక్కడ భయానక వాతావరణం నెలకొందని, ప్రజలు మాట్లాడటానికి సిద్ధంగా లేనందున ఈ గణాంకాలను విడుదల చేయడం లేదని స్పష్టం చేశారు.
ప్రదీప్ గుప్తా మాట్లాడుతూ, “అక్కడ భయం ఎంతలా ఉందంటే.. అది మా శాంప్లింగ్ (నమూనా సేకరణ) ప్రక్రియపై తీవ్ర ప్రభావం చూపుతోంది. మా వద్ద అసంపూర్ణ డేటా మాత్రమే మిగిలింది. 70 నుండి 80 శాతం మంది ప్రజలు మాతో మాట్లాడటానికి ఇష్టపడనప్పుడు, మా సర్వే పద్ధతి సరిగ్గా పని చేయదు. అందుకే ఇటువంటి స్థితిలో ఫలితాలను ప్రకటించకపోవడమే మంచిదని నిర్ణయించుకున్నాం” అని తెలిపారు.
‘కెమెరా వైపు చూస్తే చాలు సమస్యలు మొదలవుతాయి’
“ఓటర్లు తమ మనసులో మాటను అస్సలు బయటపెట్టడం లేదు. వారు కెమెరాల వైపు చూసినా చాలు ఏదో సమస్య తలెత్తుతుందనే ఆందోళనలో ఉన్నారు. అక్కడ అంతటి భయానక వాతావరణం ఉంది,” అని ఆయన వ్యాఖ్యానించారు. నిన్నటి ఎన్నికల సమయంలో జరిగిన హింసాకాండ తర్వాత పరిస్థితి మరింత దిగజారిందని ఆయన సంకేతాలిచ్చారు. “ప్రతిచోటా గొడవలు జరుగుతున్నాయి, ప్రజలకు గాయాలవుతున్నాయి, కార్లపై రాళ్లు రువ్వుతున్నారు” అని ఆయన బెంగాల్ పరిస్థితులను వివరించారు.
పశ్చిమ బెంగాల్ సమీకరణాలు
పశ్చిమ బెంగాల్ అసెంబ్లీలో మొత్తం 294 స్థానాలు ఉన్నాయి. అధికారాన్ని దక్కించుకోవడానికి 148 సీట్ల మెజారిటీ అవసరం. రెండో దశ పోలింగ్ ముగిసిన తర్వాత విడుదలైన ఆరు ప్రధాన ఎగ్జిట్ పోల్స్లో.. నాలుగు సంస్థలు బీజేపీ విజయం సాధిస్తుందని అంచనా వేయగా, రెండు సంస్థలు మాత్రం మమతా బెనర్జీ (TMC) మళ్ళీ అధికారంలోకి వస్తారని పేర్కొన్నాయి. అయితే, కాంగ్రెస్ మరియు వామపక్షాలు ఈసారి కూడా నిరాశాజనకమైన ప్రదర్శననే కనబరుస్తాయని అన్ని ఏజెన్సీలు ఏకీభవించాయి.