దావూద్ ఇబ్రహీంకు అత్యంత సన్నిహితుడైన సలీం డోలాను ఇటీవల టర్కీలో అరెస్టు చేశారు. ఆ తర్వాత అతడిని టర్కీ నుండి భారత్కు అప్పగించారు (Extradition). ముంబైలోని డోంగ్రీ ప్రాంతానికి చెందిన సలీం డోలాను ఇంటర్పోల్ జారీ చేసిన ‘రెడ్ కార్నర్ నోటీసు’ ఆధారంగా అదుపులోకి తీసుకున్నారు.
59 ఏళ్ల సలీం డోలా, భారతదేశంలో అనేక డ్రగ్స్ (నార్కోటిక్స్) కేసుల్లో నిందితుడు. అతను చాలా కాలంగా పరారీలో ఉన్నాడు. భారత భద్రతా సంస్థలు డోలా ఆచూకీ కోసం ఏళ్ల తరబడి గాలిస్తున్నాయి. ఈ ఆపరేషన్లో పాల్గొన్న అధికారులు మాట్లాడుతూ.. సలీం డోలాను కనిపెట్టడం గడ్డివాములో సూదిని వెతకడం లాంటిదని పేర్కొన్నారు. అయితే డోలా చేసిన ఒక్క తప్పు అతడిని జైలు పాలు చేసింది.
డోలా ఎలా దొరికాడంటే?
భారత భద్రతా సంస్థల భయంతో సలీం డోలా ఇస్తాంబుల్కు పారిపోయాడు. అక్కడ అతను ‘అండర్ గ్రౌండ్’ అయిపోయాడు. సుమారు ఏడాదిన్నర పాటు తన గది నుండి కనీసం బయటకు కూడా రాలేదు. కానీ అదే సమయంలో అతను ఒక చిన్న పొరపాటు చేశాడు. తన తప్పు తనను అరెస్టు చేయిస్తుందని అతను ఊహించి ఉండడు.
ఒక కొరియర్ ఆర్డర్.. కథ ముగిసింది!
అసలు విషయం ఏమిటంటే, డోలా ఒక కొరియర్ను ఆర్డర్ చేశాడు. అయితే అతను తాను దాక్కున్న నివాసానికే ఆ కొరియర్ వచ్చేలా చిరునామా (Address) ఇచ్చాడు. ఈ లావాదేవీల ఆధారంగా భారతీయ ఏజెన్సీలు, ఇంటర్పోల్ సహాయంతో డోలా ఎక్కడ ఉన్నాడో కచ్చితంగా గుర్తించగలిగాయి. వెంటనే భారత అధికారులు ఇస్తాంబుల్ పోలీసులకు సమాచారం అందించారు. వారు దాడి చేసి అతడిని అరెస్టు చేశారు. మంగళవారం అతడిని టర్కీ నుండి ఢిల్లీకి తీసుకువచ్చారు.
సలీం డోలా వద్ద మూడు పాస్పోర్టులు:
సోదాల సమయంలో సలీం డోలా వద్ద రెండు భారతీయ పాస్పోర్టులు మరియు ఒక బల్గేరియా పాస్పోర్టు లభించాయి. అతను బల్గేరియా పాస్పోర్టుపై ‘హమ్జా’ అనే పేరుతో టర్కీలో నివసిస్తున్నాడు. ఆ పాస్పోర్టు అసలైనదా లేక నకిలీదా అనే కోణంలో దర్యాప్తు జరుగుతోంది.
ముంబైలోని స్థానిక కోర్టు గురువారం డోలాను మే 8 వరకు నార్కోటిక్స్ కంట్రోల్ బ్యూరో (NCB) కస్టడీకి పంపింది. దావూద్ ఇబ్రహీంతో సంబంధం ఉన్న అంతర్జాతీయ డ్రగ్స్ స్మగ్లర్గా డోలా పేరు బయటకు వచ్చిందని ఏజెన్సీ కోర్టుకు తెలిపింది. జూన్ 2023లో దక్షిణ ముంబైలో పట్టుబడిన ‘మెఫెడ్రోన్’ (Mephedrone) డ్రగ్స్ సరఫరాలో ఇతనే ప్రధాన సూత్రధారి అని గుర్తించారు.