కర్ణాటక: హాసన్ జిల్లా సకలేశపురలో ఒక యువతిపై జరిగిన అత్యంత క్రూరమైన అత్యాచారం మరియు హత్య ఉదంతం దేశం మొత్తాన్ని దిగ్భ్రాంతికి గురిచేసింది.
బెంగళూరులో నర్సుగా పనిచేస్తున్న 35 ఏళ్ల రమ్య, తన అత్తగారి అంత్యక్రియల్లో పాల్గొనేందుకు అత్తిహళ్లి గ్రామానికి వచ్చారు. ఆ సమయంలో అదే ప్రాంతానికి చెందిన చంద్రు (41) అనే వ్యక్తి, రమ్యను లోబరుచుకోవాలని చూస్తూ లైంగికంగా వేధించాడు. రమ్య అతనిని తీవ్రంగా వ్యతిరేకించడమే కాకుండా గట్టిగా హెచ్చరించారు.
ఒక మహిళ తనను వ్యతిరేకిస్తుందా అనే కోపంతో, ఆ కామాంధుడు రమ్యపై విచక్షణారహితంగా దాడి చేయడమే కాకుండా, ఆమె జననేంద్రియాలపై అత్యంత క్రూరంగా కాలితో తన్నాడు. ఈ దాడిలో తీవ్రంగా గాయపడి రక్తపు మడుగులో పడిపోయిన రమ్యను బంధువులు కాపాడి హాసన్ జిల్లా ఆసుపత్రికి తరలించారు. అయితే, పరిస్థితి విషమించడంతో తీవ్ర చికిత్స పొందుతూ ఏప్రిల్ 30న రమ్య కన్నుమూశారు. ఈ ఘటన స్థానికుల్లో తీవ్ర ఆగ్రహాన్ని కలిగించింది. పరారీలో ఉన్న నిందితుడు చంద్రును పోలీసులు తాజాగా అరెస్ట్ చేశారు.