తమిళనాడు: ఇంటెలిజెన్స్‌కు అందిన రహస్య సమాచారం.. వెంటనే రంగంలోకి దిగిన పోలీసులు..!

చెన్నై: తమిళనాడు రాజకీయ చరిత్రలో గతంలో ఎన్నడూ లేని విధంగా 2026 అసెంబ్లీ ఎన్నికల ఫలితాలు టీవీకే (TVK) ద్వారా పెను ప్రకంపనలు సృష్టించాయి.

మొదటిసారి ఎన్నికల బరిలోకి దిగిన ‘తమిళగ వెట్రి కళగం’ 108 నియోజకవర్గాల్లో విజయం సాధించి, రాష్ట్రంలోనే అతిపెద్ద పార్టీగా అవతరించింది. అయితే, ప్రభుత్వ ఏర్పాటుకు అవసరమైన పూర్తి మెజారిటీ లభించకపోవడంతో పరిస్థితి సంక్లిష్టంగా మారింది.

ఈ నేపథ్యంలో, టీవీకే అధ్యక్షుడు విజయ్ గవర్నర్ రాజేంద్ర విశ్వనాథ్ అర్లేకర్‌ను కలిసి ప్రభుత్వం ఏర్పాటుకు హక్కును కోరడం తమిళ రాజకీయాల్లో మరింత వేడిని పెంచింది. నేడు ఆయన మళ్ళీ గవర్నర్‌ను కలిసేందుకు నీలాంగరై నివాసం నుండి బయలుదేరారు. గత 24 గంటల్లో ఆయన గవర్నర్‌ను కలవబోతుండటం ఇది రెండోసారి.

మరోవైపు, ఇంటెలిజెన్స్ వర్గాలకు అందిన రహస్య సమాచారం మేరకు చెన్నైతో పాటు రాష్ట్రవ్యాప్తంగా కీలక ప్రాంతాల్లో భద్రతను కట్టుదిట్టం చేశారు. ఇది రాజకీయ వర్గాల్లో ఆందోళనను పెంచింది.

ప్రభుత్వ ఏర్పాటుకు విజయ్ ప్రయత్నం

ఎన్నికల ఫలితాలు వచ్చిన తర్వాత, విజయ్ నిన్న సాయంత్రం గవర్నర్‌ను కలిసి ప్రభుత్వం ఏర్పాటుకు అనుమతి కోరారు. తన పార్టీకి చెందిన 108 మంది ఎమ్మెల్యేలతో పాటు, కాంగ్రెస్‌కు చెందిన 5 మంది ఎమ్మెల్యేల మద్దతు లేఖలను (మొత్తం 113) సమర్పించారు.

అయితే, తమిళనాడు అసెంబ్లీలో మెజారిటీ నిరూపించుకోవడానికి 118 మంది సభ్యుల మద్దతు తప్పనిసరి. ఆ సంఖ్యను చూపిస్తేనే ప్రభుత్వాన్ని ఏర్పాటు చేయడానికి అనుమతి ఇస్తానని గవర్నర్ స్పష్టం చేసినట్లు తెలుస్తోంది. దీనివల్ల విజయ్ ముఖ్యమంత్రిగా ప్రమాణ స్వీకారం చేసే అవకాశం తాత్కాలికంగా వాయిదా పడింది. ఈ క్రమంలో టీవీకే నాయకత్వం తలా ఇద్దరు ఎమ్మెల్యేలు ఉన్న వీసీకే, సీపీఐ, సీపీఎం పార్టీలతో చర్చలు జరుపుతోంది.

తమిళనాడు అంతటా భారీ భద్రత

రాష్ట్రంలో నెలకొన్న రాజకీయ ఉత్కంఠ దృష్ట్యా, ప్రధాన ప్రాంతాల్లో భద్రతను పెంచాలని ఇంటెలిజెన్స్ విభాగం పోలీసులను హెచ్చరించింది. ఎన్నికల ఫలితాల తర్వాత ఏర్పడిన రాజకీయ అనిశ్చితి వల్ల శాంతిభద్రతల సమస్యలు తలెత్తే అవకాశం ఉందని పేర్కొంది.

చెన్నై సహా ప్రధాన నగరాల్లో నిఘా పెంచడంతో పాటు, కీలక రాజకీయ నేతల నివాసాలు, పార్టీ కార్యాలయాలు, ప్రభుత్వ భవనాల వద్ద భద్రతను కట్టుదిట్టం చేశారు.

సోషల్ మీడియాలో వైరల్ అవుతున్న వార్తలు

విజయ్‌కు ప్రభుత్వం ఏర్పాటు చేసే అవకాశం వెంటనే లభించకపోవడంతో, ఆయన అభిమానులు మరియు మద్దతుదారులు ఆందోళనలకు దిగే అవకాశం ఉందనే వార్తలు సోషల్ మీడియాలో హల్చల్ చేస్తున్నాయి. కొన్ని ప్రాంతాల్లో మద్దతుదారులు స్వచ్ఛందంగా నిరసనలకు సిద్ధమవుతున్నట్లు పోలీసులకు సమాచారం అందడంతో భద్రతా దళాలు అప్రమత్తమయ్యాయి.

ఒకవైపు మెజారిటీ కోసం టీవీకే కూటమి చర్చలు జరుపుతుంటే, మరోవైపు పాత రాజకీయ ప్రత్యర్థులు సైతం కొత్త కూటముల వైపు చూస్తుండటం ఉత్కంఠను రేపుతోంది.