మెల్బోర్న్: సిరియా నుండి పిల్లలతో కలిసి తిరిగి వచ్చిన ముగ్గురు మహిళలను ఇస్లామిక్ స్టేట్ (ISIS) గ్రూపుతో సంబంధాలు ఉన్నాయనే ఆరోపణలపై ఆస్ట్రేలియా అధికారులు గురువారం అరెస్ట్ చేశారు.
వారిపై బానిసత్వం మరియు ఉగ్రవాదానికి సంబంధించిన వివిధ సెక్షన్ల కింద పోలీసులు కేసులు నమోదు చేశారు. ఇస్లామిక్ స్టేట్ పతనం తర్వాత ఈ మహిళలు ఈశాన్య సిరియాలోని నిర్బంధ శిబిరాల్లో చాలా ఏళ్లు గడిపారు. అక్కడి నుండి స్వదేశానికి రప్పించిన నలుగురు ఆస్ట్రేలియన్ మహిళలు మరియు తొమ్మిది మంది పిల్లలతో కూడిన బృందంలో వీరు ఉన్నారని ఏఎఫ్పీ (AFP) నివేదించింది.
తిరిగి వచ్చిన వారితో కూడిన ఖతార్ ఎయిర్వేస్ కు చెందిన రెండు విమానాలు గురువారం మెల్బోర్న్ మరియు సిడ్నీలలో ల్యాండ్ అయినట్లు వార్తా సంస్థ ఏపీ (AP) తెలిపింది. మెల్బోర్న్లో దిగిన విమానంలో ముగ్గురు మహిళలు, ఎనిమిది మంది పిల్లలు ఉండగా.. ఒక మహిళ, ఆమె కుమారుడు సిడ్నీలో దిగారు. మెల్బోర్న్ విమానాశ్రయంలో 54 ఏళ్ల మహిళను అరెస్ట్ చేశామని, బానిసత్వానికి సంబంధించిన నాలుగు నేరాలను ఆమెపై మోపనున్నట్లు ఆస్ట్రేలియా ఫెడరల్ పోలీసులు తెలిపారు.
సిరియాలో బానిసలను కలిగి ఉండటం, బానిసలను ఉపయోగించడం, బానిసల వ్యాపారం చేయడం వంటి ఆరోపణలు వీరిపై ఉన్నట్లు రాయిటర్స్ నివేదించింది. ఇదే విమానంలో వచ్చిన 31 ఏళ్ల మరో మహిళను కూడా అరెస్ట్ చేశారు; ఆమెపై బానిసత్వానికి సంబంధించిన రెండు కేసులు నమోదయ్యాయి. కాగా, సిడ్నీలో అరెస్టయిన 32 ఏళ్ల మహిళపై ఉగ్రవాద సంస్థలో సభ్యురాలిగా ఉన్నందుకు మరియు నిషేధిత ప్రాంతాలకు ప్రయాణించినందుకు కేసులు నమోదు చేశారు.
ఈ మహిళలకు కఠిన శిక్షలు పడే అవకాశం ఉందని, వారు సిరియాలో చేసిన పనుల ఆధారంగానే ఈ అభియోగాలు మోపినట్లు అసిస్టెంట్ కమిషనర్ స్టీఫెన్ నట్ తెలిపారు. కొన్ని నేరాలకు గరిష్టంగా 25 ఏళ్ల వరకు జైలు శిక్ష పడే అవకాశం ఉంది. 2012 నుండి 2016 మధ్య కాలంలో చాలా మంది మహిళలు సిరియాకు వెళ్లినట్లు సమాచారం. ఐఎస్తో సంబంధం ఉన్న తమ భర్తలతో కలిసి వీరు సిరియా చేరుకున్నారు.
2019లో ఉగ్రవాద సంస్థ ఓటమి తర్వాత, దాని సభ్యులను ఈశాన్య సిరియాలోని ‘అల్-రోజ్’ వంటి శిబిరాల్లో బంధించారు. సిరియాలోని ఆ కఠినమైన శిబిరాల్లో తమ పిల్లలతో కలిసి దాదాపు 12 ఏళ్ల పాటు నరకం అనుభవించామని కొందరు మహిళలు విలేకరులతో చెప్పారు. తమ పిల్లల భవిష్యత్తు కోసం, వారు ఆస్ట్రేలియాకు తిరిగి వచ్చేలా చేయడానికి తాము అరెస్ట్ కావడానికి కూడా సిద్ధపడ్డామని వారు పేర్కొన్నారు.