చెన్నై: తమిళనాడు అసెంబ్లీ ఎన్నికల ఫలితాలు వెలువడి 4 రోజులు గడిచినా, కొత్త ప్రభుత్వం ఏర్పాటులో కొనసాగుతున్న ప్రతిష్టంభన రాష్ట్రాన్ని ఒక రకమైన రాజకీయ అనిశ్చితిలోకి నెట్టివేసింది.
ఎన్నికల్లో 107 స్థానాలు సాధించి అతిపెద్ద పార్టీగా అవతరించిన ‘తమిళగ వెట్రి కళగం’ (TVK) అధ్యక్షుడు విజయ్, ఇప్పటి వరకు గవర్నర్ను రెండుసార్లు స్వయంగా కలిసి మాట్లాడినప్పటికీ, ప్రభుత్వం ఏర్పాటుకు గవర్నర్ అనుమతి ఇవ్వకపోవడం పెద్ద సంచలనంగా మారింది.
రెండోసారి కూడా గవర్నర్ నిరాకరణ: నేపథ్యం ఏమిటి?
మే 4వ తేదీన ఎన్నికల ఫలితాలు వెలువడగా, ప్రభుత్వం ఏర్పాటుకు కావాల్సిన ‘మ్యాజిక్ నంబర్’ 118ని ఏ పార్టీ కూడా అందుకోలేకపోయింది. 107 స్థానాలు గెలుచుకున్న విజయ్, కాంగ్రెస్ పార్టీకి చెందిన 5గురు ఎమ్మెల్యేల మద్దతు లేఖతో గవర్నర్ రాజేంద్ర విశ్వనాథ్ అర్లేకర్ను కలిశారు.
అయితే, స్పీకర్ మినహాయిస్తే టీవీకే కూటమి బలం 111 మాత్రమే ఉంది. మెజారిటీకి కావాల్సిన మరో 7 స్థానాలను ఎలా భర్తీ చేస్తారని గవర్నర్ అడిగిన ప్రశ్నకు టీవీకే తరపున స్పష్టమైన సమాధానం రాలేదని సమాచారం. “అసెంబ్లీలో మెజారిటీని నిరూపించడానికి తగిన మద్దతు ఆధారాలు సమర్పించలేదు” అని పేర్కొంటూ, గవర్నర్ కార్యాలయం విజయ్ విన్నపాన్ని రెండోసారి కూడా తిరస్కరించింది.
డీఎంకే – ఏఐఏడీఎంకేల రహస్య వ్యూహమా?
మరోవైపు, తమిళ రాజకీయ చరిత్రలో ఇప్పటి వరకు చూడని విధంగా, 59 స్థానాలు పొందిన డీఎంకే మరియు 47 స్థానాలు పొందిన ఏఐఏడీఎంకే కలిసి పనిచేసే అవకాశం ఉందని వార్తలు వస్తున్నాయి. ఒకవేళ ఏఐఏడీఎంకేకు డీఎంకే బయటి నుండి మద్దతు ఇస్తే, ఆ కూటమి బలం 106 అవుతుంది. వారితో వీసీకే (2), కమ్యూనిస్ట్ పార్టీలు (4), ఐయూఎంఎల్ (2) మరియు డీఎండీకే (1) కలిసినా మొత్తం బలం 115 మాత్రమే అవుతుంది. ఇందులో పీఎంకే చేరితే వీసీకే బయటకు వెళ్తుంది. బీజేపీ, కాంగ్రెస్ రావడానికి వీలు లేదు.
ఇలాంటి పరిస్థితుల్లో ఏ కూటమి కూడా 118 మార్కును దాటలేకపోవడంతో, గవర్నర్ ఎవరినీ ఆహ్వానించకుండా జాప్యం చేస్తున్నారు. ఇది టీవీకే కార్యకర్తల్లో తీవ్ర ఆగ్రహాన్ని కలిగిస్తోంది.
రాష్ట్రపతి పాలనకు అవకాశం ఉందా?
రాజ్యాంగం ప్రకారం, ఎన్నికల ఫలితాలు వచ్చిన నిర్ణీత కాలంలోగా స్థిరమైన ప్రభుత్వం ఏర్పాటు కాకపోతే, గవర్నర్ రాష్ట్రపతి పాలనకు సిఫార్సు చేయాల్సి ఉంటుంది. ప్రస్తుతం తమిళనాడు అటువంటి క్లిష్ట పరిస్థితిలోనే ఉంది.
ప్రస్తుత గణాంకాలు:
- విజయ్ వద్ద ఉన్నవి: 106 + 5 (కాంగ్రెస్) = 111.
- కావాల్సిన సీట్లు: 7.
- వీసీకే, సీపీఐ, సీపీఎం: మద్దతు ఇచ్చే అంశంపై సందిగ్ధత.
- పీఎంకే (4): అవకాశం లేదు.
విజయ్ తదుపరి అడుగు?
విజయ్ వర్గం ప్రస్తుతం న్యాయ నిపుణులతో తీవ్రంగా చర్చిస్తోంది. “అతిపెద్ద పార్టీ అనే ప్రాతిపదికన మొదట మమ్మల్ని ప్రభుత్వం ఏర్పాటుకు ఆహ్వానించాలి, ఆ తర్వాత మేము అసెంబ్లీలో మెజారిటీ నిరూపించుకుంటాం” అనే వాదనను టీవీకే వినిపించనుంది. ఒకవేళ గవర్నర్ నిరంతరం నిరాకరిస్తే, ఈ వ్యవహారం సుప్రీంకోర్టు వరకు వెళ్లే అవకాశం కనిపిస్తోంది.
తమిళనాడు మొత్తం ఉత్కంఠగా చూస్తున్న ఈ రాజకీయ చదరంగంలో, రాబోయే కొన్ని రోజులు అత్యంత కీలకం. ప్రజాస్వామ్యబద్ధంగా ఎన్నికైన ప్రతినిధులు ఉన్నప్పటికీ, అధికారం ఎవరి చేతికి చిక్కుతుందనేది ఇంకా మిస్టరీగానే ఉంది.
దీనివల్ల తమిళనాడులో ఎవరు కలిసి కూటమి కట్టినా ప్రభుత్వం ఏర్పాటు చేయలేని పరిస్థితి ఏర్పడవచ్చు.
విజయ్ ముందున్న ఏకైక మార్గం: ఏఐఏడీఎంకేలో చీలికా?
ప్రస్తుత చట్టపరమైన చిక్కులు మరియు రాజకీయ అడ్డంకుల మధ్య, విజయ్ ప్రభుత్వం ఏర్పాటు చేయడానికి ఒకే ఒక మార్గం మిగిలి ఉందని రాజకీయ విశ్లేషకులు భావిస్తున్నారు. ‘పార్టీ ఫిరాయింపుల నిరోధక చట్టం’ నుండి తప్పించుకోవాలంటే, ఏఐఏడీఎంకేకు చెందిన మొత్తం ఎమ్మెల్యేలలో మూడింట రెండు వంతుల (2/3) సభ్యులను తన వైపు తిప్పుకోవాలి.
అంటే ఏఐఏడీఎంకేకు ఉన్న 47 మంది ఎమ్మెల్యేలలో దాదాపు 32 మందిని విజయ్ తన మద్దతుదారులుగా మార్చుకుంటేనే ఆయన స్థిరమైన ప్రభుత్వాన్ని ఏర్పాటు చేయగలరు. అయితే, ఏఐఏడీఎంకే వంటి బలమైన క్యాడర్ ఉన్న పార్టీలో ఇది సాధ్యమేనా అనేది ఒక పెద్ద ప్రశ్న.