భద్రతా ఏర్పాట్లలో లోపాల గురించి హెచ్చరించినా పట్టించుకోని అధికారుల నిర్లక్ష్యం ఒక యువతి ప్రాణాలను బలితీసుకుంది.
చైనాలోని సిచువాన్ ప్రావిన్స్లో ఉన్న హువాయింగ్లోని మాలియువాన్ ఎక్స్పెడిషన్ పార్క్లో (Maliuyan Expedition Park) దేశాన్ని దిగ్భ్రాంతికి గురిచేసిన ఈ ఘోర ప్రమాదం జరిగింది. 17 ఏళ్ల ‘లియు’ అనే బాలిక ఈ ఘటనలో మరణించింది.
నిర్లక్ష్యం చేయబడిన హెచ్చరిక
168 మీటర్ల ఎత్తున్న జలపాతం సమీపంలో ఉన్న క్లిఫ్ స్వింగ్ (Cliff Swing) వద్ద ఈ ప్రమాదం జరిగింది. ఆ బాలికను స్వింగ్ కోసం బయటకు నెట్టడానికి ముందు, తన సేఫ్టీ బెల్ట్ లేదా తాడు సరిగ్గా బిగించలేదని ఆమె పదేపదే కేకలు వేయడం వీడియోలో వినిపిస్తోంది. అయితే, అక్కడ ఉన్న సిబ్బంది ఆమె మాటలను పట్టించుకోకుండా ఆమెను స్వింగ్ నుండి బయటకు నెట్టేశారు. కొన్ని క్షణాల్లోనే పైనున్న సేఫ్టీ లాక్ ఊడిపోవడంతో ఆ బాలిక లోతైన లోయలోకి పడిపోయింది. ఆసుపత్రికి తరలిస్తుండగా మార్గమధ్యలోనే ఆమె మరణించినట్లు నివేదికలు తెలుపుతున్నాయి.
ప్రమాదం కాదు.. నిర్లక్ష్యంతో కూడిన హత్య
ఈ దారుణ ఘటనకు సంబంధించిన వీడియో చైనా సోషల్ మీడియాలో 20 కోట్ల మందికి పైగా చూశారు. ఇది చైనా అంతటా ప్రజల్లో పెద్ద ఎత్తున ఆగ్రహానికి కారణమైంది. “ఇది ప్రమాదం కాదు, కేవలం అజాగ్రత్త వల్ల జరిగిన హత్య” అని ప్రజలు మండిపడుతున్నారు. ఈ సంఘటన తర్వాత అధికారులు పార్కును మూసివేశారు. క్లిఫ్ స్వింగ్ల నిర్మాణం మరియు నిర్వహణ కోసం చైనా మార్కెట్ రెగ్యులేషన్ విభాగం గత ఏడాది కఠినమైన నిబంధనలను తీసుకువచ్చింది. అయితే, మాలియువాన్ పార్క్లో ఈ నిబంధనలు ఏవీ పాటించలేదని నివేదికలు చెబుతున్నాయి. ఇక్కడ డబుల్ సేఫ్టీ రోప్లకు బదులుగా కేవలం ఒకే ఒక తాడును మాత్రమే ఉపయోగిస్తున్నారని గతంలో అక్కడికి వెళ్లిన పర్యాటకులు కూడా సాక్ష్యం చెబుతున్నారు. “భద్రత అనేది కేవలం మాట కాదు, అది కచ్చితంగా అమలు చేయాల్సిన బాధ్యత. చిన్నపాటి అశ్రద్ధ ఒక ప్రాణాన్ని బలితీసుకుంది” అని షాంగ్యూ న్యూస్ రిపోర్ట్ చేసింది. ఈ ఘటనపై అధికారులు ప్రస్తుతం విచారణ జరుపుతున్నారు.