చెన్నై: మే 4న ఓట్ల లెక్కింపు ఫలితాలు విడుదలైనప్పటి నుండి తమిళనాడు రాజకీయ రణం అత్యంత ఉత్కంఠభరితంగా మారింది.
ఏఐఏడీఎంకే (AIADMK) అధినేత ఎడప్పాడి పళనిస్వామి, డీఎంకే మద్దతుతో ముఖ్యమంత్రి పదవి కోసం ప్రయత్నిస్తున్నట్లు రాజకీయ వర్గాల్లో వార్తలు వ్యాపిస్తున్నాయి. ఇది చాలా మందికి ఊహించని పరిణామం. ఈ కూటమిలో చేరే చిన్న పార్టీలకు తదుపరి మంత్రివర్గంలో చోటు దక్కుతుందని, దీని ద్వారా ప్రభుత్వం ఏర్పాటుకు అవసరమైన మెజారిటీని సాధించవచ్చని భావిస్తున్నారు. అయితే, టీవీకే (TVK) చేసిన ఒక చిన్న పొరపాటే ఇప్పుడు డీఎంకే-ఏఐఏడీఎంకే పొత్తు దిశగా అడుగులు వేయడానికి ప్రధాన కారణమైంది.
ఆదవ్ అర్జున చేసిన తప్పు..
నటుడు విజయ్ నేతృత్వంలోని తమిళగ వెట్రి కళగం (TVK) చేసిన పొరపాటే ప్రస్తుత చిక్కులకు కారణమని విశ్లేషకులు భావిస్తున్నారు. టీవీకే సీనియర్ నాయకుడు ఆదవ్ అర్జున.. కాంగ్రెస్ పార్టీ మద్దతును స్వీకరించాలని, వెంటనే గవర్నర్ను కలవాలని విజయ్పై ఒత్తిడి తెచ్చినట్లు సమాచారం. అనుభవజ్ఞుడైన నాయకుడు సెంగోట్టయన్ ఈ నిర్ణయం వల్ల కలిగే పరిణామాలను ముందే హెచ్చరించినప్పటికీ, ఆదవ్ అర్జున దానిని పట్టించుకోలేదని సోషల్ మీడియాలో వార్తలు వస్తున్నాయి.
సెంగోట్టయన్ సలహా ఏంటి?
108 స్థానాల్లో గెలిచినందున టీవీకే అతిపెద్ద ఏకైక పార్టీ (Single Largest Party) అని, ఎమ్మెల్యేలందరి మద్దతు ఉందని పేర్కొంటూ మొదట ప్రభుత్వం ఏర్పాటు చేయడానికి అనుమతి కోరాలని, ఆ తర్వాత అసెంబ్లీలో మెజారిటీ నిరూపించుకోవచ్చని సెంగోట్టయన్ సూచించారు. కానీ టీవీకే, కాంగ్రెస్ పార్టీకి చెందిన 5గురు ఎమ్మెల్యేల పేర్లను కూడా కలిపి గవర్నర్కు జాబితా సమర్పించింది. దీనివల్ల విజయ్ ‘ఏకైక పెద్ద పార్టీ’గా కాకుండా, ‘కూటమి’ ప్రాతిపదికన ప్రభుత్వం ఏర్పాటుకు హక్కు కోరుతున్నారని గవర్నర్ రాజేంద్ర విశ్వనాథ్ అర్లేకర్ భావించారు. అందుకే “మరి మిగిలిన 5గురు ఎమ్మెల్యేల మద్దతు ఎక్కడ?” అని గవర్నర్ ప్రశ్నించారు.
ఈ కారణం చేతనే రెండోసారి గవర్నర్ను కలిసినప్పుడు ‘అతిపెద్ద ఏకైక పార్టీ’గా అవకాశం ఇవ్వాలని కోరినప్పటికీ, గవర్నర్ అడిగిన ప్రశ్నలకు సమాధానం చెప్పలేక, పూర్తి మెజారిటీ చూపలేక ప్రభుత్వం ఏర్పాటు చేసే ప్రయత్నాలు విఫలమయ్యాయి.
ముఖ్యమంత్రి కాకుండానే ఆగిపోయిన విజయ్
రాజకీయాల్లో ఎంతో అనుభవం ఉన్న సెంగోట్టయన్ సలహాను విస్మరించి విజయ్ తీసుకున్న నిర్ణయం వల్ల, ఆయన ఇప్పుడు ముఖ్యమంత్రి కాలేక ఇబ్బంది పడుతున్నారు. అతిపెద్ద పార్టీగా అవతరించినప్పటికీ, పూర్తి స్థాయి మెజారిటీ లేకపోవడంతో అధికార పీఠం కల దూరమవుతోంది.
టీవీకే ఎమ్మెల్యేల రాజీనామా హెచ్చరిక?
ఒకవేళ డీఎంకే మరియు ఏఐఏడీఎంకే కలిసి ప్రభుత్వం ఏర్పాటు చేసే పరిస్థితి వస్తే, టీవీకే ఎమ్మెల్యేలందరూ రాజీనామా చేస్తామని హెచ్చరించినట్లు సమాచారం. ఈ నిర్ణయం పార్టీ లోపల, బయట పెద్ద చర్చకు దారితీసింది.
బుస్సీ ఆనంద్ ఇచ్చిన భరోసా
ఈ క్లిష్ట సమయంలో టీవీకే ప్రధాన కార్యదర్శి బుస్సీ ఆనంద్ ఎమ్మెల్యేలతో మాట్లాడారు. “ఎదురు పార్టీలు మన ఎమ్మెల్యేలను లాక్కోవడానికి కోట్లు కుమ్మరించినా, విజయ్ ఫోటోను చూసి నమ్మకంతో ఉండండి. దేనికీ భయపడకండి, కంగారు పడకండి. నిజాయితీగా ఉండండి, అంతా మంచే జరుగుతుంది” అని ఆయన ధైర్యం చెప్పారు. అంతేకాకుండా, వీసీకే మరియు వామపక్షాలు త్వరలోనే టీవీకేతో కలుస్తాయని ఆయన ఆశాభావం వ్యక్తం చేశారు.