కాసరగోడ్: కాబోయే భర్త బైక్ ప్రమాదంలో మరణించాడనే వార్త విని తట్టుకోలేక ఓ యువతి ఆత్మహత్య చేసుకుంది. కుంబళకు చెందిన బి. జయానందన్ కుమార్తె ప్రఫుల్ల మృతి చెందిన యువతిగా గుర్తించారు.
ఆమె తన ఇంట్లోని హాల్లో ఫ్యాన్కు ఉరివేసుకుని ఆత్మహత్య చేసుకుంది. ప్రఫుల్ల రాసిన ఆత్మహత్యా లేఖను పోలీసులు స్వాధీనం చేసుకున్నారు.
నాలుగు నెలల క్రితం తమిళనాడుకు చెందిన మణి అనే వ్యక్తితో ప్రఫుల్లకు వివాహం నిశ్చయమైంది. అయితే, నెల రోజుల క్రితం మణి బైక్పై వెళ్తుండగా ప్రమాదం జరిగింది. ఆసుపత్రిలో చికిత్స పొందుతూ ఆయన గత రెండు రోజుల క్రితం మరణించారు. ఈ ఘటనతో ప్రఫుల్ల తీవ్ర మనోవేదనకు గురైంది. ఇంట్లో వారు ఒక వివాహ వేడుకకు వెళ్లిన సమయంలో ఆమె ఈ అఘాయిత్యానికి ఒడిగట్టింది.
మణి అంత్యక్రియలు ఎక్కడ నిర్వహించారో, తనను కూడా అక్కడే ఖననం చేయాలని ఆమె తన ఆత్మహత్యా లేఖలో కోరింది. పోలీసులు పంచనామా పూర్తి చేసి మృతదేహాన్ని పోస్ట్మార్టం నిమిత్తం ఆసుపత్రికి తరలించారు. అనంతరం మృతదేహాన్ని బంధువులకు అప్పగించనున్నారు. అంత్యక్రియలు తమిళనాడులోని మణి స్వగ్రామంలో నిర్వహించాలా అనే విషయంపై ఇరు కుటుంబాలు ఇంకా నిర్ణయం తీసుకోలేదు.