తమిళనాడు శాసనసభ ఎన్నికల్లో అధికార పార్టీని ఓడించి టీవీకే (TVK) అధికారంలోకి వచ్చింది. విజయ్ ముఖ్యమంత్రిగా బాధ్యతలు చేపట్టిన తర్వాత, నేడు కొత్తగా ఎన్నికైన సభ్యులతో తాత్కాలిక స్పీకర్ (ప్రోటెం స్పీకర్) కరుప్పయ్య ప్రమాణ స్వీకారం చేయించారు.
నేడు ఉదయం సరిగ్గా 9.30 గంటలకు శాసనసభ హాల్లోకి అధికార పార్టీ టీవీకే, ప్రతిపక్షాలైన డీఎంకే, ఏఐఏడీఎంకే సభ్యులు వచ్చారు. ముఖ్యమంత్రి సీటులో విజయ్, ప్రతిపక్ష నేత సీటులో ఉదయనిధి కూర్చున్నారు. అనంతరం తాత్కాలిక స్పీకర్ కొత్త ఎమ్మెల్యేలతో ప్రమాణ స్వీకారం చేయించడం ప్రారంభించారు.
విజయ్, ఉదయనిధి, ఎడప్పాడి ప్రమాణ స్వీకారం
ముందుగా ముఖ్యమంత్రి, ఆ తర్వాత మంత్రులు, ఆపై శాసనసభ పక్ష నేతలు, మాజీ ముఖ్యమంత్రి, మాజీ మంత్రులు, ప్రభుత్వ ప్రధాన విప్లు ప్రమాణం చేస్తారని.. ఆ తర్వాత తమిళ అక్షరమాల క్రమం (Alphabetical Order) ప్రకారం సభ్యులు ప్రమాణ స్వీకారం చేయాలని స్పీకర్ ప్రకటించారు. ఆ క్రమంలో మొదట ముఖ్యమంత్రి విజయ్ పెరంబూర్ నియోజకవర్గ ఎమ్మెల్యేగా ప్రమాణ స్వీకారం చేశారు. ఆ తర్వాత మంత్రులు ఎన్. ఆనంద్, ఆధవ్ అర్జున, అరుణ్రాజ్, సెంగోట్టయన్, వెంకటరామన్, నిర్మల్ కుమార్, రాజ్మోహన్, టి.కె. ప్రభు తదితరులు వరుసగా ప్రమాణం చేశారు.
మంత్రి కీర్తనకు అనుమతి నిరాకరణ
అనంతరం మంత్రి కీర్తన ప్రమాణ స్వీకారం చేయడానికి స్పీకర్ ముందుకు వచ్చారు. ఆ సమయంలో అసెంబ్లీ సెక్రటరీ శ్రీనివాసన్ ఆమెను ఎన్నికల్లో గెలిచినట్లుగా ఇచ్చే ‘డిక్లరేషన్ సర్టిఫికేట్’ (గెలుపు పత్రం) చూపమని కోరారు. అయితే మంత్రి కీర్తన ఆ ధృవీకరణ పత్రాన్ని వెంట తీసుకురాని కారణంగా, ఆమె ఎమ్మెల్యేగా ప్రమాణ స్వీకారం చేయడానికి వీలులేదని అనుమతి నిరాకరించారు.
దీంతో ఆమె ఎమ్మెల్యేగా ప్రమాణం చేయకుండానే వెనుతిరిగారు. ఇదే విధంగా ఏఐఏడీఎంకే మాజీ మంత్రి కె.సి. కరుప్పన్నన్ కూడా గెలుపు పత్రాన్ని తీసుకురాని కారణంగా ప్రమాణ స్వీకారం చేయలేకపోయారు. వీరంతా ఈరోజు సాయంత్రం స్పీకర్ ఛాంబర్లో ప్రమాణ స్వీకారం చేయవచ్చని అధికారులు తెలిపారు.