తమ పిల్లలు అన్ని రంగాల్లోనూ రాణించాలనే కోరికతో తల్లిదండ్రులు వారిని రకరకాల శిక్షణా తరగతులకు పంపిస్తుంటారు.
అయితే, అలా పంపించే చోట పిల్లలు సురక్షితంగా ఉన్నారా అనేది ఇప్పుడు పెద్ద ప్రశ్నార్థకంగా మారింది. ప్రస్తుతం సోషల్ మీడియాలో వైరల్ అవుతున్న ఒక వీడియో చూస్తుంటే గుండె తరుక్కుపోతోంది. ఆ వీడియోలో, యోగా శిక్షణ సమయంలో ఒక విద్యార్థిని నొప్పితో విలవిలలాడటం, “అయ్యా, చాలా నొప్పిగా ఉంది, దయచేసి వదిలేయండి” అని ఏడుస్తూ బతిమాలడం వినిపిస్తోంది.
కానీ, ఆ యోగా ఉపాధ్యాయుడు ఏమాత్రం మానవత్వం లేకుండా యోగా పేరుతో ఆ అమ్మాయిని హింసించడం తీవ్ర దిగ్భ్రాంతిని కలిగిస్తోంది. ఈ వీడియో ఎక్కడ, ఎప్పుడు తీశారనే వివరాలు తెలియనప్పటికీ, ఇది ఇంటర్నెట్లో పెద్ద చర్చకు దారితీసింది.
యోగా శిక్షణలో శరీరం సరళంగా (Flexibility) మారడం కోసం చేసే ఇటువంటి పనులు అనాగరికమని, ఇది ఒక రకమైన వేధింపు అని నెటిజన్లు మండిపడుతున్నారు. ముఖ్యంగా, ఆడపిల్లలకు మహిళా ఉపాధ్యాయులే శిక్షణ ఇవ్వాలని, తమ పిల్లలు ఎక్కడికి వెళ్తున్నారు, అక్కడ ఏం జరుగుతోంది అనే విషయంలో తల్లిదండ్రులు చాలా అప్రమత్తంగా ఉండాలని సామాజిక కార్యకర్తలు హెచ్చరిస్తున్నారు.
లక్షలాది మంది వీక్షించిన ఈ వీడియో, ప్రస్తుత విద్యా మరియు శిక్షణా కేంద్రాల భద్రతపై అనేక ప్రశ్నలను లేవనెత్తుతోంది.