లక్నో: ఉత్తరప్రదేశ్లో 26 గంటల వ్యవధిలో ముగ్గురిని కాల్చి చంపిన మాజీ సైనికుడిని పోలీసులు ఎన్కౌంటర్లో హతమార్చారు. “నిందితుడిని 45 ఏళ్ల గురుప్రీత్ సింగ్గా గుర్తించాం. సోమవారం అర్థరాత్రి నిందితుడిని నేర స్థలాన్ని పునర్నిర్మించడం (సీన్ రీకన్స్ట్రక్షన్) కోసం తీసుకెళ్లడం జరిగింది.
ఆ సమయంలో అతను పోలీసుల వద్ద ఉన్న పిస్టల్ను లాక్కొని, కాల్పులు జరిపి తప్పించుకోవడానికి ప్రయత్నించాడు. పోలీసులు జరిపిన ఎదురు కాల్పుల్లో అతను మరణించాడు” అని ఒక అధికారి తెలిపారు. ఈ ఘటనలో ముగ్గురు పోలీసు సిబ్బంది తీవ్రంగా గాయపడ్డారని, వారు ఆసుపత్రిలో చికిత్స పొందుతున్నారని ఆయన పేర్కొన్నారు.
అసలేం జరిగింది?
అమృత్సర్ మూలాలున్న గురుప్రీత్ సింగ్ ఆరేళ్ల క్రితం సైన్యం నుండి పదవీ విరమణ పొందారు. ఆదివారం ఉదయం సకల్దిహా రైల్వే స్టేషన్ సమీపంలో ఒక ప్యాసింజర్ రైలులో ఘాజీపూర్ జిల్లాకు చెందిన మనగ్రూ అనే వ్యక్తిని కాల్చి చంపి పరారయ్యాడు.
అదే రోజు (ఆదివారం) అర్ధరాత్రి దీన్ దయాల్ ఉపాధ్యాయ రైల్వే స్టేషన్ సమీపంలో కోల్కతా-జమ్ము తావి ఎక్స్ప్రెస్ రైలులో ప్రయాణిస్తున్న బిహార్లోని గయ జిల్లాకు చెందిన దినేష్ షా అనే వ్యక్తిని అతని కుటుంబ సభ్యుల ముందే కాల్చి చంపాడు. ఆ తర్వాత అక్కడి నుండి కూడా తప్పించుకున్నాడు.
మరుసటి రోజు ఉదయం (సోమవారం) చందౌలీలోని ఒక ప్రైవేట్ ఆసుపత్రిలోకి చొరబడిన సింగ్, అక్కడ చికిత్స పొందుతున్న ఒక మహిళను అక్కడికక్కడే కాల్చి చంపాడు. ఈ ఘటన తర్వాత పారిపోవడానికి ప్రయత్నించగా, స్థానికులు అతనిని పట్టుకుని పోలీసులకు అప్పగించారు. అయితే, అరెస్టయిన వెంటనే జరిగిన ఎన్కౌంటర్లో అతను మరణించినట్లు నివేదికలు చెబుతున్నాయి.