నెదర్లాండ్స్ వేదికగా ఒక చಾರిత్రాత్మక ఘట్టం ఆవిష్కృతమైంది. దాదాపు 1000 సంవత్సరాల నాటి చోళుల కాలపు అత్యంత అరుదైన రాగి శాసనాలు అధికారికంగా భారతదేశానికి హస్తగతమయ్యాయి. ప్రస్తుతం నెదర్లాండ్స్లో పర్యటిస్తున్న ప్రధానమంత్రి నరేంద్ర మోదీ సమక్షంలో ఈ చారిత్రాత్మక బదిలీ ప్రక్రియ విజయవంతంగా పూర్తయింది. దీనితో భారతదేశానికి చెందిన ప్రాచీన అమూల్యమైన వారసత్వ సంపద మళ్లీ స్వదేశానికి తిరిగి వస్తోంది.
ಈ రాగి శాసనాలు మొదటి రాజరాజ చోళుడి పరిపాలనా కాలానికి, అంటే క్రీ.శ. 11వ శతాబ్దానికి చెందినవి. చరిత్రలో వీటిని ‘ఆనైమంగళం కాపర్ ప్లేట్స్’ లేదా ‘లైడెన్ ప్లేట్స్’ (Leiden Plates) అని పిలుస్తారు. చోళ సామ్రాజ్యానికి సంబంధించిన అత్యంత ప్రాముఖ్యత కలిగిన చారిత్రాత్మక ఆధారాలు ఇవి.
ఈ విషయమై ప్రధానమంత్రి నరేంద్ర మోదీ సోషల్ మీడియా వేదికగా స్పందిస్తూ, “ఈ రోజు ప్రతి భారతీయుడు గర్వించదగ్గ రోజు. 11వ శతాబ్దానికి చెందిన చోళుల కాలపు రాగి శాసనాలు తిరిగి భారతదేశానికి చేరుకున్నాయి” అని రాసుకొచ్చారు. ఈ అధికారిక హస్తాంతరణ కార్యక్రమంలో నెదర్లాండ్స్ ప్రధానమంత్రి రాబ్ జెట్టెన్ (Rob Jetten) కూడా పాల్గొన్నారు.
శాసనాల ప్రత్యేకత మరియు చరిత్ర
ఈ చారిత్రాత్మక ఆధారాలలో మొత్తం 21 పెద్ద రాగి రేకులు, 3 చిన్న రాగి రేకుల సమూహం ఉన్నాయి. వీటిపై నాటి తమిళం మరియు సంస్కృత భాషలలో లిఖించిన శాసనాలు చెక్కబడి ఉన్నాయి. ఇవి గొప్ప పాలకుడైన మొదటి రాజేంద్ర చోళుడి కాలానికి చెందినవి. అతని తండ్రి అయిన మొదటి రాజరాజ చోళుడు ఇచ్చిన మౌఖిక వాగ్దానాన్ని (దానాన్ని) అధికారికం చేస్తూ ఈ శాసనాలను రూపొందించారు. ఇవి నాటి చోళుల వైభవాన్ని కళ్లకు కడతాయి.
ఈ సందర్భంగా ప్రధాని మోదీ మాట్లాడుతూ.. “భారతదేశంలో మనకు చోళ రాజులు, వారి విశిష్ట సంస్కృతి మరియు వారి నౌకా నిర్మాణ, సముద్రయాన నైపుణ్యాల పట్ల అపారమైన గౌరవం, గర్వం ఉన్నాయి. 19వ శతాబ్దం మధ్యకాలం నుండి ఈ రాగి రేకులను భద్రపరిచిన నెదర్లాండ్స్ ప్రభుత్వానికి, ముఖ్యంగా లైడెన్ విశ్వవిద్యాలయానికి నేను కృతజ్ఞతలు తెలుపుతున్నాను” అని పేర్కొన్నారు.
ఈ అమూల్యమైన చారిత్రాత్మక సంపదను సుమారు 300 సంవత్సరాలకు పైగా నెదర్లాండ్స్లోని లైడెన్ విశ్వవిద్యాలయంలో అత్యంత భద్రంగా సంరక్షించారు. 17వ శతాబ్దంలో డచ్ పరిపాలనా కాలంలో, తమిళనాడులోని నాగపట్నం ప్రాంతం నుండి ఈ శాసనాలను యూరప్కు తరలించినట్లు చరిత్రకారులు చెబుతున్నారు.
14 ఏళ్ల నిరంతర దౌత్య ప్రయత్నం
భారత ప్రభుత్వం 2012 నుండే ఈ అరుదైన రాగి శాసనాలను తిరిగి స్వదేశానికి తీసుకురావడానికి దౌత్యపరమైన ప్రయత్నాలను ప్రారంభించింది. సుదీర్ఘ చర్చల అనంతరం, 2023లో జరిగిన ఉన్నత స్థాయి సమావేశంలో భారతదేశం వ్యక్తం చేసిన చారిత్రాత్మక వాదనకు బలమైన మద్దతు లభించింది. దీనితో నెదర్లాండ్స్ ప్రభుత్వం ఈ చారిత్రాత్మక సంపదను భారతదేశానికి తిరిగి అప్పగించే ప్రక్రియకు తుది ఆమోదం తెలిపింది.