కేరళలో కాంగ్రెస్ నేతృత్వంలోని యునైటెడ్ డెమోక్రటిక్ ఫ్రంట్ (UDF) పదేళ్ల తర్వాత మళ్లీ అధికారంలోకి వచ్చింది. సోమవారం తిరువనంతపురంలోని సెంట్రల్ స్టేడియంలో వి.డి. సతీశన్ ముఖ్యమంత్రిగా ప్రమాణ స్వీకారం చేశారు.
అయితే, ఈ ప్రమాణ స్వీకార మహోత్సవంలో అందరి దృష్టిని ఆకర్షించిన ఒక ఆసక్తికరమైన సన్నివేశం చోటుచేసుకుంది. ముఖ్యమంత్రిగా ప్రమాణ స్వీకారం చేసిన తర్వాత వి.డి. సతీశన్ నేరుగా కాంగ్రెస్ ఎంపీ రాహుల్ గాంధీ వద్దకు వెళ్లారు. రాహుల్ గాంధీ ఆయనను ఆలింగనం చేసుకుని ఆత్మీయంగా అభినందించారు. ఆ తర్వాత సతీశన్ తన సీటులో కూర్చోవడానికి వెళ్తుండగా, రాహుల్ గాంధీ ఆయన చెవిలో ఏదో చెప్పారు. రాహుల్ మాట వినగానే సతీశన్ వెంటనే వెనక్కి తిరిగి, వేదికపై ఉన్న కాంగ్రెస్ అధ్యక్షుడు మల్లికార్జున ఖర్గే సహా ఇతర సీనియర్ నాయకుల వద్దకు వెళ్లి వారిని కలిసి మాట్లాడారు.
ఈ మొత్తం ఉదంతం కార్యక్రమంలో ఉన్నవారితో పాటు సోషల్ మీడియా వినియోగదారులలోనూ తీవ్ర ఉత్సుకతను రేకెత్తించింది. కొత్త ముఖ్యమంత్రి అంత వేగంగా సీనియర్ నేతల వద్దకు వెళ్లేలా రాహుల్ గాంధీ ఆయన చెవిలో ఏం చెప్పి ఉంటారు? అనే చర్చ మొదలైంది. రాహుల్ గాంధీ, సతీశన్ల మధ్య జరిగిన సంభాషణ ఏమిటనేది అధికారికంగా వెల్లడి కానప్పటికీ.. పార్టీలోని ఇతర సీనియర్ నాయకులను వ్యక్తిగతంగా కలిసి వారి ఆశీస్సులు, శుభాకాంక్షలు తీసుకోవాలని రాహుల్ ఆయనకు సూచించి ఉంటారని రాజకీయ వర్గాలు భావిస్తున్నాయి.
కేరళలో కాంగ్రెస్-ముస్లిం లీగ్ కూటమి ప్రభుత్వ ప్రమాణ స్వీకార కార్యక్రమం జాతీయ గీతం ‘వందేమాతరం’తో ప్రారంభమైంది. ఈ కార్యక్రమంలో కాంగ్రెస్ అధ్యక్షుడు మల్లికార్జున ఖర్గే, రాహుల్ గాంధీ, ప్రియాంకా గాంధీతో పాటు కాంగ్రెస్, యుడిఎఫ్ (UDF) కూటమికి చెందిన పలువురు అగ్రనాయకులు పాల్గొన్నారు.
వి.డి. సతీశన్తో పాటు మరో 20 మంది మంత్రులు కూడా ప్రమాణ స్వీకారం చేశారు. దాదాపు ఆరు దశాబ్దాల తర్వాత ముఖ్యమంత్రితో పాటు పూర్తి మంత్రివర్గం అంతా ఒకేసారి ప్రమాణ స్వీకారం చేయడం ఇదే మొదటిసారి. ఈ కొత్త క్యాబినెట్లో రమేష్ చెన్నితాల, కె. మురళీధరన్, సన్నీ జోసెఫ్, పి.కె. కున్హాలికుట్టి, పి.కె. బషీర్, కె.ఎం. షాజీ వంటి ప్రముఖ నాయకులు ఉన్నారు.
కేరళ అసెంబ్లీ ఎన్నికల్లో కాంగ్రెస్ అతిపెద్ద పార్టీగా అవతరించింది. మొత్తం 140 స్థానాలు ఉన్న కేరళ అసెంబ్లీలో కాంగ్రెస్ ఒంటరిగా 63 స్థానాలు గెలుచుకోగా, యుడిఎఫ్ (UDF) కూటమి మొత్తం 102 స్థానాల్లో విజయం సాధించింది. తద్వారా సిపిఐ(ఎం) నేతృత్వంలోని ఎల్డిఎఫ్ (LDF) ప్రభుత్వ పదేళ్ల పాలనకు ముగింపు పలికింది. గత ఐదేళ్లుగా ప్రతిపక్ష నేతగా ఉన్న వి.డి. సతీశన్కు క్షేత్రస్థాయిలో కాంగ్రెస్ సంస్థాగత నిర్మాణాన్ని బలోపేతం చేసిన ఘనత దక్కుతుంది. అందుకే హైకమాండ్ ఆయనకు రాష్ట్ర ముఖ్యమంత్రి పగ్గాలను అప్పగించింది.