జార్ఖండ్లోని కలెక్టరేట్ నుండి నేడు ఒక విలక్షణమైన దృశ్యం వెలుగులోకి వచ్చింది. ప్రభుత్వ యంత్రాంగం గనుక సున్నితంగా, మానవీయంగా స్పందిస్తే.. సామాన్య ప్రజల వాయిస్కే వలం వినబడటమే కాదు, దానిపై తక్షణ చర్యలు కూడా ఉంటాయని ఈ ఘటన నిరూపించింది.
జామ్తాడా డిస్ట్రిక్ట్ కలెక్టర్ (డీసీ) నిర్వహించే ‘జనతా దర్బార్’ (ప్రజావాణి) దూరాన ఉన్న గ్రామ ప్రజలకు ఒక పెద్ద ఆశాదీపంగా మారింది. అక్కడికి ప్రజలు తమ సమస్యలతో వస్తుంటారు, వారి బాధలను అధికారులు ఆలకించినప్పుడు పరిపాలనపై జనాల్లో నమ్మకం మరింత బలపడుతుంది. సరిగ్గా ఇలాంటి ఒక ప్రజా దర్బార్లోనే ఒక వృద్ధుడు కన్నీరుమున్నీరవుతూ కలెక్టర్కు న్యాయం చేయాలంటూ మొరపెట్టుకున్నాడు.
బీహార్లోని భోజ్పూర్ ప్రాంతానికి చెందిన ఠాకూర్జీ యాదవ్ అనే వృద్ధుడు కలెక్టరేట్కు వచ్చి తన ఆవేదనను వెళ్లగక్కాడు. కన్నీటి పర్యంతమవుతూ.. వణుకుతున్న గొంతుతో, కళ్లల్లో ఆశతో వచ్చిన ఆయన డీసీ అలోక్ కుమార్తో తన బాధను చెప్పుకున్నాడు. ఎంతో కష్టపడి, పైపైసా కూడబెట్టి 4 నెలల క్రితం ఒక పశువుల జాతర నుండి 11 దురదూ (పాలు ఇచ్చే) ఆవులను కొనుగోలు చేసి పశుపోషణ నిమిత్తం తీసుకెళ్తుండగా, మిహిజామ్ పోలీస్ స్టేషన్ పరిధిలో వాహన తనిఖీల సమయంలో సరైన పత్రాలు లేవనే నెపంతో పోలీసులు ఆ ఆవులన్నింటినీ జప్తు (సీజ్) చేశారని వాపోయాడు.
13 ఆవులను బలవంతంగా సీజ్ చేసిన పోలీసులు
ఆ ఆవులన్నీ పాలు ఇచ్చేవేనని, తాను కేవలం పశుపోషణ కోసమే వాటిని కొనుగోలు చేసి తీసుకెళ్తున్నానని ఆయన స్పష్టం చేశాడు. సీజ్ చేసిన ఆ పశువులను ప్రస్తుతం ‘శ్రీ కృష్ణ గోశాల’లో ఉంచారు. అక్కడ ఆ ఆవులలో 11 గర్భం దాల్చిన ఆవులు దూడలకు జన్మనిచ్చాయి. అయితే సరైన సంరక్షణ లేకపోవడం వల్ల వాటిలో 6 దూడలు మరణించాయి మరియు ఆవులు కూడా అనారోగ్యానికి గురయ్యాయి. వీటికి తక్షణమే సరైన సంరక్షణ అవసరం. గత నాలుగు నెలలుగా ఈ వృద్ధుడు న్యాయం కోసం పోలీస్ స్టేషన్, సబ్ డివిజనల్ ఆఫీస్ (SDO) చుట్టూ తిరుగుతున్నాడు. అన్నింటికంటే బాధాకరమైన విషయం ఏంటంటే.. సీజ్ చేసిన ఆవుల మేత, మందులు మరియు సంరక్షణ ఖర్చులు కూడా ఈ వృద్ధుడే భరించాల్సి వస్తోంది. ఈ బాధను వివరిస్తూ ఆయన గొంతు మూగబోయింది. జనతా దర్బార్లో కలెక్టర్ ముందు తన వ్యధను చెప్పుకుంటూ ఆయన కన్నీరు పెట్టుకున్నాడు.
‘సార్.. ఆ ఆవులే నా సర్వస్వం’
“సార్, ఆ ఆవులే నా సర్వస్వం… వాటి వల్లే నా ఇల్లు గడుస్తుంది… వాటిని కాపాడండి సార్…” అంటూ ఆయన డీసీని వేడుకున్నాడు. ఆ సమయంలో జనతా దర్బార్లో ఉన్నవారంతా భావోద్వేగానికి లోనయ్యారు. కానీ ఆ తర్వాత జరిగిన పరిణామం అక్కడ ఉన్న ప్రతి ఒక్కరి హృదయాలను గెలుచుకుంది. కలెక్టర్ అలోక్ కుమార్ ఆ పత్రాలను పరిశీలించి, విషయాన్ని తీవ్రంగా పరిగణించి.. వెంటనే అక్కడికక్కడే ఎస్డీఓ (SDO) కి ఫోన్ చేసి ఆవులను సీజ్ చేయడానికి గల కారణాన్ని అడిగి తెలుసుకున్నారు.
పశువుల జాతర నుండి కొనుగోలు చేసిన రసీదులు ఉన్నప్పటికీ ఆవులను సీజ్ చేయడంపై ఆయన తీవ్ర అసంతృప్తిని, ఆగ్రహాన్ని వ్యక్తం చేశారు. నిబంధనల ప్రకారం వీలైనంత త్వరగా చర్యలు తీసుకుని, సీజ్ చేసిన పశువులను వెంటనే ఆ పశుపోషకుడికి అప్పగించాలని గట్టిగా ఆదేశించారు. సామాన్య ప్రజల సమస్యల పట్ల నిర్లక్ష్యాన్ని లేదా ఆలస్యాన్ని సహించేది లేదని అధికారులకు డీసీ స్పష్టమైన మార్గదర్శకాలను ఇచ్చారు. ప్రజలు ప్రభుత్వ కార్యాలయాల చుట్టూ తిరగాల్సిన అవసరం లేకుండా, నిబంధనల ప్రకారం చేయగలిగే పనులను ఎలాంటి అనవసర ఆలస్యం లేకుండా పూర్తి చేయాలని, అప్పుడే పరిపాలనలో పారదర్శకత, జవాబుదారీతనం సాధ్యమవుతుందని పేర్కొన్నారు.
కలెక్టర్ పై ప్రజల ప్రశంసలు
జనతా దర్బార్లో డీసీ చూపిన ఈ కఠినమైన మరియు మానవీయ వైఖరిని చూసి అక్కడ ఉన్న ప్రజల ముఖాల్లో సంతోషం వ్యక్తమైంది. కలెక్టర్ మాటలు విన్న తర్వాత ఆ వృద్ధుడి కళ్లల్లో మళ్లీ ఆశల కాంతి చిగురించింది. నాలుగు నెలలుగా నలిగిపోయిన ఆ వృద్ధుడు, తనకు ఇప్పుడు న్యాయం జరుగుతుందనే నమ్మకాన్ని పొందాడు. ప్రభుత్వ యంత్రాంగం ఇలాగే ప్రజా సమస్యలను తీవ్రంగా పరిగణిస్తే.. పేదలు, నిరుపేదలు న్యాయం కోసం రోడ్లపై తిరగాల్సిన అవసరం ఉండదని ప్రజలు కొనియాడారు. ప్రస్తుతం ఈ ఉదంతం జిల్లా వ్యాప్తంగా చర్చనీయాంశంగా మారింది, డీసీ తీసుకున్న తక్షణ నిర్ణయాన్ని అందరూ అభినందిస్తున్నారు.
కాగా, డీసీ అలోక్ కుమార్ తన కార్యాలయంలో జనతా దర్బార్ నిర్వహించి సామాన్య ప్రజల సమస్యలను ఆలకించారు. ఈ ప్రజా దర్బార్కు జిల్లాలోని వివిధ మండలాల నుండి 40 మందికి పైగా బాధితులు విచ్చేసి తమ ఫిర్యాదులను కలెక్టర్ ముందు ఉంచారు. అందిన దరఖాస్తులను పరిశీలించి, వారం రోజుల్లోగా సమస్యలను పరిష్కరించి నివేదిక సమర్పించాలని సంబంధిత శాఖల అధికారులను డీసీ ఆదేశించారు. కొన్ని ఫిర్యాదులను అక్కడికక్కడే (On the spot) పరిష్కరించారు.
బర్త్ సర్టిఫికేట్ కోసం చిన్నారి అభ్యర్థన
జనతా దర్బార్లో తన కుటుంబ సభ్యులతో కలిసి వచ్చిన ఒక చిన్నారి.. తాను 2010లో ప్రభుత్వ సదర్ ఆసుపత్రిలో జన్మించానని, అయితే ఎలాంటి ఆధారాలు (డాక్యుమెంట్లు) లేకపోవడం వల్ల తనకు పుట్టిన తేదీ ధృవీకరణ పత్రం (Birth Certificate) రావడం లేదని, దీనిపై కలెక్టర్ జోక్యం చేసుకోవాలని కోరింది. డీసీ వెంటనే ఆ దరఖాస్తును ఎస్డీఓకు బదిలీ చేస్తూ, చిన్నారికి బర్త్ సర్టిఫికేట్ జారీ అయ్యేలా తగిన చర్యలు తీసుకోవాలని ఆదేశించారు.
దీనితో పాటు, కేసీసీ (కిసాన్ క్రెడిట్ కార్డ్) రుణ మాఫీ ఆశతో వచ్చిన ఒక మహిళ డీసీకి తన బాధను వివరించింది. రెండేళ్ల క్రితం తన భర్త రోడ్డు ప్రమాదంలో మరణించాడని, ఇటీవల తాను కూడా ఒక ప్రమాదంలో గాయపడ్డానని తెలిపింది. చిన్న పిల్లల బాధ్యత తనపైనే ఉందని, బ్యాంకు నుండి తీసుకున్న కిసాన్ క్రెడిట్ కార్డ్ రుణాన్ని తీర్చలేకపోతున్నానని వాపోయింది. దీనిపై కలెక్టర్ మానవీయంగా స్పందిస్తూ, జిల్లా వ్యవసాయ అధికారి మరియు ఎల్డీఎం (LDM) లకు తగిన చర్యలు తీసుకోవాలని ఆదేశాలు జారీ చేశారు.
ఇవే కాకుండా.. భూ వివాదాలు, ప్రభుత్వ భూముల ఆక్రమణలు, గృహ నిర్మాణ సమస్యలు, విద్యుత్ కనెక్షన్లు, 11 కేవీ విద్యుత్ స్తంభాల మార్పిడి, అంబేద్కర్ ఆవాస్ యోజన ఇళ్ల మంజూరు వంటి పలు సమస్యలపై వచ్చిన దరఖాస్తులను సంబంధిత అధికారులకు పంపుతూ తక్షణ పరిష్కారానికి ఆదేశించారు. సివిల్ కోర్టుల పరిధిలోని కేసులకు సంబంధించి చట్టపరమైన కోర్టులను ఆశ్రయించాలని ప్రజలకు అవగాహన కల్పించారు.