హర్యానా: హర్యానాలోని నూహ్ (Nuh) జిల్లాలో ఒక అత్యంత సంచలనాత్మకమైన, దారుణమైన ఘటన వెలుగులోకి వచ్చింది. బిఛోర్ పోలీస్ స్టేషన్ పరిధిలోని ఒక గ్రామంలో గ్యాంగ్రేప్ మరియు బ్లాక్మెయిలింగ్ తట్టుకోలేక ఒక యువతి విషగుళికలు మింగి ప్రాణాలు విడిచింది. బాధిత యువతి తండ్రి ఇచ్చిన ఫిర్యాదు మేరకు బిఛోర్ పోలీసులు నలుగురు యువకులపై కేసు నమోదు చేశారు.
పోలీసులు నిందితులపై ఎఫ్ఐఆర్ నమోదు చేసి దర్యాప్తు ప్రారంభించారు. పోలీసులు తెలిపిన వివరాల ప్రకారం.. బాధిత తండ్రి తన ఫిర్యాదులో- “మూడు రోజుల క్రితం రాత్రి సమయంలో నేను ఏదో అత్యవసర పనిమీద బయటకు వెళ్లాను. ఇంట్లో నా భార్య, కుమార్తె మాత్రమే ఉన్నారు. అర్ధరాత్రి సుమారు 1:00 గంటల ప్రాంతంలో మా గ్రామానికే చెందిన అసద్, జాహుల్ మరియు మరో ఇద్దరు మూడు యువకులు మా ఇంట్లోకి అక్రమంగా చొరబడ్డారు. ఒక యువకుడు బయట కాపలా కాయగా, మిగిలిన నిందితులు లోపలికి వెళ్లి నా కుమార్తెపై ఒకరి తర్వాత ఒకరు వరుసగా లైంగిక దాడికి (గ్యాంగ్రేప్కు) పాల్పడ్డారు” అని పేర్కొన్నారు.
ఫోటోలు, వీడియోలు రికార్డ్ చేసి వేధింపులు
నిందితులు అంతటితో ఆగకుండా ఆ ఘోరకృత్యానికి సంబంధించిన ఫోటోలను, వీడియోలను తమ మొబైల్ ఫోన్లలో రికార్డ్ చేసుకున్నారు. ఈ విషయం ఎవరికైనా చెబితే ప్రాణాలతో ఉంచబోమని ఆ యువతిని తీవ్రంగా బెదిరించారు. అంతేకాకుండా, తాము చెప్పిన చోటుకు ఒంటరిగా కలవడానికి రాకపోతే ఆ ఫోటోలు, వీడియోలను ఇంటర్నెట్లో వైరల్ చేస్తామంటూ యువతిని నిరంతరం బ్లాక్మెయిలింగ్ చేస్తూ మానసిక వేధింపులకు గురిచేశారు.
మానసిక ఒత్తిడి తట్టుకోలేక బలవన్మరణం
నిందితుల బెదిరింపులు, భయంకరమైన మానసిక ఒత్తిడిని భరించలేక సదరు యువతి మంగళవారం నాడు ఇంట్లోనే విషపూరిత పదార్థం (విషం) మింగేసింది. గమనించిన కుటుంబ సభ్యులు ఆమెను వెంటనే చికిత్స నిమిత్తం స్థానిక ప్రైవేట్ ఆసుపత్రికి తరలించారు. అక్కడ వైద్యులు ఆమె విషం మింగినట్లు ధృవీకరించారు. పోలీసులు ఆసుపత్రికి చేరుకుని కుటుంబ సభ్యుల స్టేట్మెంట్ రికార్డ్ చేశారు. ఆ తర్వాత యువతి పరిస్థితి విషమించడంతో మెరుగైన చికిత్స కోసం మరో ఆసుపత్రికి తరలిస్తుండగా మార్గమధ్యలోనే ఆమె కన్నుమూసింది.
స్థానికులలో తీవ్ర ఆగ్రహావేశాలు
ఈ అమానుష ఘటనతో ఆ ప్రాంతంలో తీవ్ర ఉద్రిక్తత, ఆగ్రహావేశాలు వ్యక్తమవుతున్నాయి. నిందితులను వెంటనే అరెస్ట్ చేసి కఠినంగా శిక్షించాలని బాధితురాలి కుటుంబ సభ్యులు, స్థానికులు ఆందోళనకు దిగారు. బిఛోర్ పోలీస్ స్టేషన్ ఎస్హెచ్ఓ (SHO) రాజ్వీర్ మాట్లాడుతూ- “నలుగురు యువకులపై వివిధ సెక్షన్ల కింద కేసు నమోదు చేసి దర్యాప్తును వేగవంతం చేశాం. కేసును అన్ని కోణాల్లోనూ పరిశీలిస్తున్నాం, నిందితులపై కఠిన చర్యలు తీసుకుంటాం” అని తెలిపారు.