వాషింగ్టన్: అమెరికాలో ఉన్న వేలాది మంది భారతీయ ఐటీ ఉద్యోగులు గత కొన్ని నెలలుగా తీవ్ర సందిగ్ధంలో ఉన్నారు. ఒకవైపు మెటా, అమెజాన్, ఒరాకిల్ వంటి దిగ్గజ సంస్థలు పెద్ద ఎత్తున ఉద్యోగాల కోత (Layoffs) విధిస్తుండగా, మరోవైపు హెచ్-1బి (H-1B) వీసా హోల్డర్లు కేవలం 60 రోజుల్లోపే కొత్త ఉద్యోగాన్ని వెతుక్కోవాల్సిన క్లిష్ట పరిస్థితి ఏర్పడింది.
అమెరికాలో ఉద్యోగం చేయడం భారతీయులకు ఒక కల. హెచ్-1బి వీసాతో అక్కడ స్థిరపడితే జీవితమే మారిపోతుందని చాలా మంది ఆశపడతారు. గత కొన్నేళ్లలో వేలాది మంది ఈ లక్ష్యాన్ని విజయవంతంగా సాధించారు కూడా.
క్లిష్ట పరిస్థితుల్లో భారతీయులు
కానీ, గత కొన్ని నెలలుగా అక్కడ పరిస్థితి ఏమాత్రం సానుకూలంగా లేదు. ఒకవేళ ఉద్యోగం పోతే, అది కేవలం జీతం, ఇల్లు, పిల్లల విద్యకే పరిమితం కాకుండా, దేశంలో నివసించే హక్కునే (Visa Status) ప్రశ్నార్థకం చేస్తోంది. ఏళ్ల తరబడి అమెరికాలో జీవితాన్ని నిర్మించుకున్న ఎందరో భారతీయులు ఇప్పుడు భరించలేని ఒత్తిడిని అనుభవిస్తున్నారు.
60 రోజుల గడువు – సవాలు
హెచ్-1బి వీసా నిబంధనల ప్రకారం, ఉద్యోగం కోల్పోయిన విదేశీ ఉద్యోగులు వెంటనే కొత్త ఉద్యోగంలో చేరాలి. దీనికోసం వారికి కేవలం 60 రోజుల గడువు మాత్రమే ఉంటుంది. ఈ గడువులోపు ఉద్యోగం దొరక్కపోతే, వారు అమెరికాను వీడి వెళ్లాల్సిందే. చాలా మంది ఈ కాలాన్ని పెంచుకోవడానికి తాత్కాలికంగా ‘బి-2’ (B-2 Visitor Visa)కి మారాలని ప్రయత్నిస్తున్నారు. ఈ వీసాపై వారు ఆరు నెలల వరకు అమెరికాలో ఉండవచ్చు. అయితే, ప్రస్తుతం ఉన్న కఠినమైన వలస నిబంధనల వల్ల ఈ ప్రక్రియ కూడా చాలా కష్టతరంగా మారిందని నిపుణులు హెచ్చరిస్తున్నారు.
బి-2 వీసాకు మారాలనుకునే హెచ్-1బి ఉద్యోగుల నుండి అధికారులు అదనపు పత్రాలను అడుగుతున్నారు. అలాగే వీసా తిరస్కరణలు కూడా పెరుగుతున్నాయి. చట్టబద్ధంగా వీసా మారే అవకాశం ఉన్నప్పటికీ, ఆమోదం పొందడం మాత్రం చాలా కష్టతరంగా మారింది.
భారతీయులపై తీవ్ర ప్రభావం
అమెరికన్ ఇమ్మిగ్రేషన్ లాయర్ రాజీవ్ ఖన్నా మాట్లాడుతూ, “ఉద్యోగం కోల్పోయిన హెచ్-1బి ఉద్యోగులు బి-1/బి-2 వీసా కోరినప్పుడు, అధికారులు అదనపు పత్రాలు అడగడం, వీసాను తిరస్కరించడం గతంతో పోలిస్తే బాగా పెరిగింది. నా టీమ్కు కూడా ఇలాంటి కేసులు ఎక్కువగా వస్తున్నాయి” అని తెలిపారు.
2026 నాటికి 144 టెక్ కంపెనీల్లో 1.10 లక్షల మందికి పైగా ఉద్యోగాలు కోల్పోయారు. వీరిలో వేలాది మంది హెచ్-1బి వీసా హోల్డర్లు, అందులోనూ అధిక శాతం భారతీయులే ఉన్నారని అంచనా. 2025లో మంజూరైన 4,06,348 హెచ్-1బి వీసాల్లో, 2,83,772 వీసాలు భారతీయులకే లభించాయి. అంటే భారత్ ఇప్పటికీ ఈ వీసా పథకం ద్వారా అత్యధికంగా లబ్ధి పొందుతున్న దేశం. కానీ ప్రస్తుత మార్పులు భారతీయుల పాలిట శాపంగా మారుతున్నాయి.
ఇతర అవకాశాలు
ఉద్యోగం కోల్పోయిన వారు బి-2 వీసాతో పాటు, ఎఫ్-1 (స్టూడెంట్), ఓ-1 (అసాధారణ ప్రతిభావంతులు) మరియు ఎల్-1 వీసాల ద్వారా అమెరికాలో ఉండే ఆప్షన్లను పరిశీలిస్తున్నారు. కొందరు కెనడా ‘ఎక్స్ప్రెస్ ఎంట్రీ’ లేదా ‘గ్లోబల్ టాలెంట్ స్ట్రీమ్’ పథకాల ద్వారా కెనడాకు వెళ్లేందుకు ఆసక్తి చూపుతున్నారు.