సియాటెల్: ప్రపంచం మొత్తం ఆర్టిఫిషియల్ ఇంటెలిజెన్స్ (AI) దిశగా పరుగులు తీస్తోంది. ఈ క్రమంలో టెక్ దిగ్గజం ‘మెటా’ సంస్థలో జరిగిన ఒక సామూహిక తొలగింపు (Layoff) ఇప్పుడు కార్పొరేట్ ప్రపంచంలో చర్చనీయాంశంగా మారింది. ఒక ఉద్యోగి తన చేతులతో రూపొందించిన AI సాధనమే, చివరికి తన ఉద్యోగాన్ని కోల్పోయేలా చేయడం అందరినీ షాక్కు గురిచేస్తోంది.
మెటాలో ఏం జరిగింది? మెటా సంస్థ గత కొంతకాలంగా తన ఉద్యోగులను AI సాంకేతికతకు మారాలని, ‘AI ఫస్ట్’ విధానాన్ని అనుసరించాలని కోరుతోంది. భారీ టీమ్లను చిన్నవిగా మార్చడం, వేగంగా పనిచేయడంపై మేనేజర్లు ఒత్తిడి తెచ్చారు. ఈ క్రమంలో, మే 20న మెటా తన సంస్థలో భారీ స్థాయిలో ఉద్యోగులను తొలగించింది. సింగపూర్, యూరప్ మరియు అమెరికా ప్రాంతాల్లోని వేలాది మంది ఉద్యోగులకు తెల్లవారుజామున 4 గంటలకే మెయిల్ ద్వారా తొలగింపు సమాచారం పంపారు.
AI వారోత్సవాలు మరియు జూలియన్ భార్య ఉదంతం: కొన్ని నెలల క్రితం మెటా సంస్థ ‘AI వీక్’ పేరుతో ఒక కార్యక్రమాన్ని నిర్వహించింది. ఆ సమయంలో దైనందిన పనులను నిలిపివేసి, ఉద్యోగులందరినీ AI పరికరాలను తయారు చేయాలని, వాటిని నేర్చుకోవాలని కోరారు. ఆ శిక్షణలో భాగంగా, జూలియన్ అనే వ్యక్తి భార్య, ఉన్నతాధికారులు మరియు ఇంజనీర్లతో కలిసి ఒక AI సాధనాన్ని రూపొందించారు. దీనికోసం ఆమె నెలల తరబడి కష్టపడింది. అయితే, తాను తయారు చేస్తున్న ఈ AI సాధనమే తన ఉద్యోగానికి ఎసరు పెడుతుందేమోనన్న భయం ఆమెకు అప్పుడే కలిగింది. ఆమె భయపడినట్టే, ఆ AI సాధనం పూర్తయిన కొద్దిరోజులకే, జూలియన్ భార్య మెటా నుంచి తొలగించబడ్డారు.
కార్పొరేట్ ప్రపంచంలో మార్పులు: మెటా తన పని విధానాన్ని పూర్తిగా మార్చుకుంటోందని సంస్థ యొక్క హెచ్ఆర్ (HR) అధికారి జానెల్లె గేల్ తెలిపారు. సుదీర్ఘమైన అనుమతుల ప్రక్రియతో కూడిన భారీ వ్యవస్థల నుంచి, వేగంగా నిర్ణయాలు తీసుకోగల చిన్న AI టీమ్ల వైపు సంస్థ అడుగులు వేస్తోంది.
భారీ పెట్టుబడులు: AI మౌలిక సదుపాయాలను అభివృద్ధి చేయడానికి మెటా ఈ ఏడాది సుమారు 100 బిలియన్ డాలర్ల వరకు పెట్టుబడి పెడుతోంది. AIపై దృష్టి పెట్టడం కోసమే సంస్థ ఈ తొలగింపులు చేస్తోందని, దీనివల్ల దాదాపు 3 బిలియన్ డాలర్లు ఆదా అవుతాయని సమాచారం. సుమారు 7,000 మంది ఉద్యోగులను AI సంబంధిత టీమ్లకు బదిలీ చేసినట్లు కూడా తెలుస్తోంది.